أناوالصمـــت @anaoalsmt_1

كبيرة محررات

احرمتني شــوفة امي وابوي والمله الحلــوه ،،/ قديم

والله مدري وش اقول ومن اشكي له

مرات اقول خلها بالقلب تجرح ولاتطلع برا وتفضح

بس خانقتني العبرهـ وضايقة بي الدنيا قلت مالي الا بنات حواء يمكن القى الحل ..

هذي أختي مطلقه وعندها ولد يدرس ابتدائي وموظفة من كان ولدها باللفه وهي عند اهلي.. عوبا ولسانهاا سليط وتكره تشوفك تضحكين والا مبسوطه تنكد عليك

( غيور وحسود ) الله يهديهاا ويبعدها عنا

والله مدري من اشكي له .. نهااية الاسبوع نفسي اروح لبيت امي وابوي ولما يشوفوني يفرحوون ويبوسون الصغار ويدعون لنا بالبركه وطوله العمر ويقولون ليه ماتزورينا والله يابنتي شوفتك ترد الروح لنا وانا والله ماحبهم الا على عيونهم وايديهم ابي رضااهم ولاقد غلطت وكل مابيدي حتى لو اسوي فطيره اكلتهم منها ابي اخدمهم وابي بسمتهم

وأخواتي الحمدلله يرحمني وارحمهن ويسألن عني واخاف عليهن .. الا هالاخت تسوي حركات ترفع الضغط وتستلم وحده وحده منا كل اسبوع وتهزأ وطولة لساان وتقولها بوجهك وتغبط وحسد والله انا صابرات على ازواجنا رغم تقصيرهم ومرات نشوف منهم خيانه ومرات تطنيش وقليلين مسؤوليه بس مانبي الفضايح والطلااق مدري وش تغبطنا عليه وهي عارفه البير وغطاه ..واذا طنشناهاا ولاردينا عليها ترسل ولدهاا ضرب بالصغاار والله ان بنتي ام سنه يوطها بطنهاا وولد اختي يسكر على رااسه الباب وحتى الشغالات مااسلمن منه كل اسبوع يبكي له وحده ياضاربها بنعل والا حجر والا يضايقها بالكلام ويرمي عليها النعال وتتفيل
واذا قلنا شوفي ولدك قالت عشان شغاله طيب انسانه والتربيه تكون على الغلط مالها دخل في الجنسيه قالت وين نرووح انتن لكن بيووت ضفن اعيالكن وشغالاتكن/ ولاعمرها انهرت والا قالت اللي تسويه ياولد غلط صاير فرعون علينا هو امه / والله صرت اترك اعيالي يبكون بيت ابوهم واسرق نفسي لشووفه امي وابوي قلت يمكن تنحل مشكلتهاا الا زادت الطين بله تقط من الكلاام اللي يبكيك وتعيبك بصحتك وتدهورهاا ومرات بخياانه زوجك واهماله لك يعني تبي تعكر عليك وتغثك حتى لما نولد تطردنا بالنفااس وحنا قيصري ولدها كب بحليب الصغار وضرب فينا وحنا غاافيات .. والله كرهتنا ببيت ابونا وعوفتنا جمعتنا .. لما امي تدخل تطول لسانها على امي والله انها تبكيهاا وتعيبها فينا تقول ياام البنات ومرات تقول ليش تجمعينهن قالت بناتي مثل ماانتي بنتي تقول تبينهن روحي لهن لو اهنيهن بعيشتهن وحياتهن وتقوم تنعي وتشعي على حظهاا مع العلم هي اللي اخعلت زوجهاا والله انها كانت تضربه وتبيه لها سوااق وبخيله مرات وهي متوظفه تبيه يعطيهاا من راتبه وكل يوم مشااكل غثووا ابووي وامي وجابت لهم السكر والضغط وطلعت عن اهله ومات امه وهي غاضبه عليها ولايهمها ماسألت عنها
احس ماعندها احساس ولا مشاعر لما يدعي برمضان الحرم ونستمع له مرات تدمع اعيوننا تبسم وتقول من ذنوبكن قلت الله يكفينا شر قلب لايخشع وعين لاتدمع ..
ياابنات انا مخنوووقه امي وابوي كبيرين بالعمر ابي اشووفهم ابي اتونس بينهم وبلمة اخواتي معهم وهذي بهذلتنا .. مع العلم ماارحت انا لهلي اسبوعين والسبب هي اتصل على امي بالجوال وتقول ماعليك منهاا لو ماشاافتكن وهاوشتكن شوفيها مع اخوك يدرس بالكليه كل يوم تهااوشه وتجيه على غداه وتوقف اللقمه بحلقة تبي الناس لها خدم وهي المتسلطه كلامهاا سم والله تعبنا منهاا وش الحل .. خايفة على امي لا تجلطها او تجيب لها مرض والا تموت الله لايقووله..

ياليت المشرفات يعدلن العنوان المله = اللمه

والله مره جاء ابوي من برا ولقااني ابكي جنب امي وسأل امي قالت بنتك فلاانه ضايقتهاا وراح لها وهااوشهاا بس مااينفع تزيد
واخوي الكبير كل يوم هي ويااه هووش لدرجة صار ينام برا البيت منهاا وتسلط ولدها على اغرااضه لدرجة كب الماء على ملازمه ولااب ماله وبغى يذبحه اخوي وهي تصييح فضحتنا بالحااره وامي وابوي تدخلووا وفكووه من يده بس مااينفع تعااند وتقول نشوف من الاقوى وتهدد بالمغثه لنا .. حنا على بالنا تضايق تروح لغرفتهاا وضحك هي وولدهاا وكأنهم ماسوو شي وامي تبكي وابوي يالله يتنفس آآه خلووني سااكته تعبت

تعبنا والله تعبنا

هذا الموضوع مغلق.

$$@اشعارومشاعر@$$ • 13 سنة

حبيبتي الله يعينكم وماعليك منها روحوا عند امك وانبسطوا وهي ولاكانها موجوده طيب مافي وحده منكم حاولت تناصحها عن وضعها

بنت511 • 13 سنة

الله يعينكم حبيبتي هذي خلي اخوك الكبير يوقفها عند حدها ويتفاهم معها هذي مالقت رجال يوقفها عند حدها الله يهديها بس

لمعة ألماســــــة • 13 سنة

لا حول ولا قوة الا بالله العلي العظيم طولي بالك ياحياتي وادعي لها بالهداية واتوقع ان عندها اضطرابات نفسية وتحب السيطرة ويمكن فيها تراكمات نفسية داخلية تدفعها لهتصرف ويمكن عشانها ماتوفقت مع زوجها تنقهر منكم ماتدرين شكلها تعاني من اضطرابات نفسية الله يهديها ويصلحها وان كانت مريضة فالله يعافيها صدقيني محد يتصرف هالتصرف الا وهو فاقد شي الله يصلحها ويهديها وانتي طولي بالك مهما كان هذي اختك ولا تعصبين منها خليها على راحتها وبيني لها انك تقدرين تردين عليها بس انك محترمتها ومحشمتها والا ماهو ضعف منك وان الي جالسه تسويه مو حلو بحق نفسها من قبلكم فانتم اهلها واذا طاحت بتحتاجكم ادعي لها بالهدايه الله يوفقك وتقبلي مروري

اعلنت جنوني • 13 سنة

الله يهديها
تصدقي انهاذكرتني باختي زي كذاعصبيه وماعندهااخلاق وطايحه باختي هواش
الين مااختي الله يرحمهاماتت ومراتغيرت وندمت وصابهاانهيارعصبي وبس تتخيل اختي بكل مكان وتبكي عليها

عفوك يارحمان • 13 سنة

ان بغيت تغله اسكت وخله
اعتبروها ماهي موجوده
هالحركه راح تخليها تراجع حساباتها
وادعولها بصلاح حالها