احزن موقف في حياتي...تفضلي

السلام عليكم ورحمة الله وبركاته
الموضوع مبين من عنوانه ... نبي كل وحده اطال الله بعمرها تدخل وتذكر لنا احزن موقف مر عليها بحياتها...
اتمنى يكون موضوعي خفيف عليكم ..
وانا ببدى افتتح لكم اصعب واحزن موقف اثر فيني وهو (وفاة اخوي بحادث)الله يجعل مثواه الجنه

القصه...كان لي اخو يصغرني بسنه ومره كانت امي تبي اغراض من سوبر ماركت..فطلبته يودينا وكان عمره الله يغفر له وقتها 18سنه الله يغفر له بس:(


المهم مالكم بالطويله حبايبي
ماقصر ودانا السوبر وجلسنا نتقضى انا وامي واختي الكبيره وكانت حامل بالشهر السابع ..
المهم خلصنا متقضين وجانا اخذ اغراضنا وحاسب عليهن وطلعنا وركبنا السياره(كان وقتها توه ماسك السياره بادي يسوق)المهم طلع ودانا البيت وقال لامي يمه تكفين انا ميت من الجوع ابي اي شي اكله..قالت امي ابشر يالله بصلح العشاء شي خفيف عشانك..المهم حطينا عشانا ذيك الليله ساندويتشات ..وجت امي له وهو عند التلفزيون قالت فلان مافيه خبز تروح تجيب؟؟عاد هو فرحان بالسواقه قال ابشري بروح وراح ركض ويوم جاء بيطلع (اخذ علبة عصير من كيس المقاضي بيشربه وهو رايح بالطريق للبقاله)قالت امي لا والله ماتاخذها لانك لو شربته منت متعشي وخذتها منه وهو راح
المهم تاخر جلس نص ساعه ثم ساعه ثم ساعتين الين بدينا نقلق!!!!ماشفنا احد وحنا حاطين السفره بس ننتظره يجيب الخبز ويجي ونتعشى

وفجاه دخل علينا خالي اخو امي وفجعنا بالخبر انه وهو رايح الله يغفر له ياربي كان مسرع واستغل الفرصه انه لحاله رايح بالسياره وجلس يفحط وصدم بتمثال حق الشارع وانقلب وتوفى الله يغفر له يارب...
امي تاثرت مره مره واللي خلاها تنهبل تقول ليته مات شبعان بس !!!!!وليتني ماحرمته من العصير وهي منهاره!!!!موقف لانحسد عليه امي قطعت قلوبنا الله يصبرها!! واختي اللي قلت لكم انها حامل ولدت بعد وفاته بهشر ونص وجابت ولد والله يابنات طلع نسخه نسخه من اخوي هاللي توفى ... وسمته على اسم اخوي الله يرحمه وقالت لها امي طالبتك هالولد اربيه بدال اللي ربي خذه مني!!!!!قالت ابشري يمه وخذته امي وربته وهالحين الولد عند امي مربيته ومدلعته وماتبي اي شي ينقصه وعمره الان 4سنوات ونص...(واختي عندها غيره الله يخليهم لها 3 اولاد يعني هاللي سمته على اخوي الرابع ...وكبر الولد وعلى ان امي هي امه .. بس قليل ادب مايسميني خاله:22: يناديني باسمي يحسبني اخته يالبى قلبه وروح خالته ..ويسمي امه اللي هي اختي باسمها هههههههههههههه وامي يسميها ماما واذا سمع اخوانه يسمونها جده قال جده واذا راحو قال ماما ههههههههههههههههههههههههه عاد انا قبل اتزوج كنت اموت فيه ومازلت اموت فيه وتزوجت وجبت بنوته وصار يغار غيره منها ماتتخيلونها ..بس ربي عالم اني اغليه مثل بنتي او اكثر بعد ...الله يحفظه ويصلحه :42:
وهذي قصتي وهذا اصعب موقف مر علي.... اسفه عالاطاله واتمنى ماتخذلوني الله يخليكم نبي تفاعل ...جزاكم الله خير....