كارهه الدنيا @karhh_aldnya

عضوة جديدة

احس ان اللي سويته صح بس انتم وش رايكم ادخلوا رجااااااااء

السلام عليكم ورحمه الله وبركاته

انا قلبي بينفجر عشان كذا بدخل في السالفه على طول

انا قبل كم يوم رحت المستشفى العسكري في العيادات الخارجيه وجيت والاقي انهم مغيرين المدخل الاساسي حق قسم النساء لانهم عندهم اصلاحات وخرابيط المهم واجي عند الاستقبال واحصل موظفه سعوديه فرررحت يوم شفتها قلت كويس سعوديه افضل من اجنبيه واجي عندها واسالها بكل ادب وهدوء قلت لها هنا اسجل اسمي لان المكان تغير علينا قالت ايوه هنا ردت عليه وهي تنافخ سجلت اسمي وجلست انتظر دوري ودخلت قاسوا الضغط والوزن وكله وبعدين رجعت انتظر دوري ادخل على الدكتوره

شويه الا وتجي حرمه كبيره في السن وتعبانه معاها شغالتها وراحت الحرمه لموظفه الاستقبال مدري وش قالت لها شويه الا الموظفه قامت تصيح على الحرمه مسكينه وترفع صوتها وتكلمها باسلوب جدا سيئ

انا هنا ما تحملت قمت على طول ورحت وسالت الحرمه اشفيك يا خاله قالت ما ادري وش اسوي ولا اعرف من وين اروح هذي اوراقي وابغى ادخل للدكتوره قلت لها طيب خير ان شاء الله
وارجع للموظفه وهزئتها لين قالت بس
قلت لها وش مشكلتها قالت اوراقها ناقصه قلت لها واذا اوراقها ناقصه كذا تعاملينها مو عيب عليك مو حرام اللي تسوينه والله وطرت فيها قامت ترفع صوتها تقول انا مو مسؤله عن اوراقها انا بس اسجل الاسماء

قلت لها انتي من اول جالسه على مكتب ماعندك شغل الا تسجيل اسماء يعني شغلك مريح وراتبك اكيد انه اعلى من الممرضات ودوامك اقل منهم وفوق هذا اخلاقك زفت والممرضات هم اللي يكرفون و12 ساعه متواصل والابتسامه على وجوههم ونشيطات وانتم يالسعوديات مافي شي عاجبكم قلت لها مو من حقك ترفعين صوتك على علي ولا على غيري انتي هنا جيتي لخدمه المرضى واذا مو عاجبك قدمي استقاله وارتاحي في بيتكم وغيرك تتمنى وظيفتك هذي وتبوس عليها الايادي عشان اخر الشهر تاخذ الفين ريال تعيش بها هي وعيالها اذا منتي قد المسؤليه ولا لك خلق للناس محد بيجبرك وبعدين انتي اساسا متعينه هنا بالثنوي ما جبتي شي جديد لا دكتوراه وعلى غيره ويمكن الناس اللي قدامك وتعاملهم بهذا الشكل افضل منك في اشياء كثير وقمت وخوفتها قلت لها انا الحين بروح اقدم فيك شكوى وان وصلت للمدير صدقيني راح تنازل عنك بسهوله لان قدامه الاف المتقدمات مو عجزان يلاقي موظفه استقبال بثنوي شوي الا وتقوم حرمه ثانيه وتتكلم نفس كلامي شوي الا الموظفه مالها صوت سكتت وقامت تعتذر قالت ضغط عمل قلت لها ماعندك ولا ضغط عمل انتي قاعده مرتاحه في مكانك هذا مو عذر بس اللي خلاك تتمادين الناس المساكين اللي يسكتون ولا يحتجون على تصرفاتكم يالسعوديات

ورحت من عندها وهي قاعده تتاسف لانها خافت اقدم شكوى

للاسف هذا حال اغلب بناتنا والله والله العظيم كثير مرات اصادف معامله سيئه من دكتوره او موظفه سعوديه هذا غير المرقعه في الشغل الوحده كنها تمشي على طبق بيض ونص الوقت يروح في سوالف وقصص بينهم

في المستشفى العسكري مره موظفه رمت الاوراق في وجهي لاني طلبت تغيير الدكتوره وقدمنا فيها شكوى وانفصلت بعد فتره

ودكتوره الله لا يسامحها سعوديه برضه وصفت لي دوى سبب لي مرض ثاني انا كنت في غنى عنه لو انها شخصت كويس واعطتني دوى مناسب

هذي هي السعوده حقتكم

هذي هي اخر مطالبكم انه يكون لكم مكان في المجتكع على قولتكم

انا اوجه كلامي لكل موظفه على شاكله من تكلمت عنهم

اللي جايه للوظيفه بس همها الكسب المادي تقدر ترتاح في بيتها وتقدم على الشؤوون تاخذ ضمان او تقدم في حافز او تشتغل من بيتها لا تضر احد ولا تهين احد ولا تاخذ مكان انسانه مستعده للعمل الجاد وتقدر تخدم بصدق

الوظيفه قبل لا تكون راتب هي عمل انساني هي عطاء هي رحمه هي موده واخلاص

اخلاااااااااااااااااااااااااااااااااااااااااااااااااااص

عن ابي هريره رضي الله عنه رواه عنه ابن عدى في ( الكامل ) ( 6 / 288 ) قال
ثنا أحمد ثنا محمد حدثنى أبى حدثنى مالك حدثنى أبو الزناد عن الأعرج عن أبى هريرة رضى الله عنه قال قال رسول الله صلى الله عليه وسلم :
ليس الإيمان بالتحلي ولا بالتمني ، ولكن ما وقر في القلب وصدقه العمل ، والذي نفسي بيده لا يدخل عبد الجنة إلا بعمل يتقنه ،
قالوا : يا رسول الله ما يتقنه ؟
قال " يحكمه "

وكلامي لا يعني ان الاجنبيات افضل كل جنس فيه الصالح والطالح

ولكن سبق وقلت كلامي للموظفات السيئات فقط

يلزم عليك تسجيل الدخول أولًا لكتابة تعليق.

تسجيل دخول

شجره طيبه • 12 سنة

ايه صح اللي سويتيه

وكل جنس فيه الصالح وفيه الطالح

بيلسان 66 • 12 سنة

يعطيك العافية بصراحة انا معك بكل كلمة قلتيها لكن الله يهدي الجميع يارب

رآن موري • 12 سنة

الله يسلم البطن اللي حملك عجبتيني والله تستاهل

بنت التريبان • 12 سنة

تسلم يدينك ولله زين سويتي ولله الممرضات الفلبينيات اهون من بنات ديرتنا

أم فهد6 • 12 سنة

آآآآآآآآآآآآآآآه بس

ذكرتيني باللي يصير لي يوم أروح المستشفى

مرة داخلة وتعبانة حدي
ولقيت ذيك الممرضة
جالسة وقدامها الجوال تلعب فيه
وعندها حرمة

طبعا بكل قلة أدب قالتلي اطلعي برا

طيب في اسلوب احسن من كذا
ومرة ثانية طبعا وحدة ثانية جيتها على نهاية الدوام على الساعة 11 بالليل وأنا مدري ان الدوام انتهى
قامت تصارخ علي وتقول ما تعرفون ان الدوام انتهى !!!

قلت لها وش دراني الواحد تعبان وما فيه حيل يرد

حسبي الله على هذي الأشكال

اللي سويتيه صح وتستاهل ويمكن تتعدل أخلاقها بعد الدرس اللي اعطيتيها اياه

وصحيح مو كل السعوديات كذا في ناس منهم تنحط على الجرح يطيب
ومنهم مدري على ايش شايفة نفسها

ونفس الشي المقيمات : مرة رحت لدكتورة أردنية في مركز صحي وأنا عندي مغص كلوي
المهم تكلمني من طرف خشمها لا وجالسة تدرس بنتها في المركز

حتى يوم جت تقولي وين يعورك تأشر باصبعها حسستني إني جاية اشحت منها

العتب على مين بس ولا مين المسؤول عن تعيين هالأشكال

الأخلاق الأخلاق الأخلاق قبل كل شي وقبل أي شي

مشكورة يا الغلا حسيت إني فضفضت وطلعت اللي في نفسي هههه الحين ارتحت