احمد الله واشكر فضله ولدت بعد طلوع الروح تعالوا اسمعوا حكايتي..

اهلين بالكروشاااااااات وحشتوني كلكم حبي ابشركم باني ولدت وجبت ولد سميته أبان>>>>يعني ايه معنى اسمه ولد عثمان بن عفان كان اسمه كده وماخود من البيان والوضوح
وكمان عشان يمشي مع اسم اخوه أوس
المهم في صباح يوم الاربعاء الموافق 7-10كانت الساعة 6ونص في الصباح اخد زوجي الاولاد على المدرسة وانا كالعادة دايركت على النت الا دوبي جالسة واحس بسيل بين رجولي خارج في ثواني فقط والله عبيت الكنب موية وجري على الحمام الله يكرمكم واحط فوطة الاستحمام تخيلوا في بال مارجع زوجي والمدارس قريبة كانت الفوطة تنعصر والله من كثرة الموية المهم كلمت الدكتورة وقلتلها نزلت الموية قالت يالله على المستشفى عدل المهم في بال مارحت كانت الساعة سبعة ونص ولما قاسوا الرحم قالوا لسه يادوب سانتي ونص استني شوية المهم جلست لغاية الساعة 4العصر وانا بطلق واتالم وده كله والرحم مافتح الا3سانتي وعلى الساعة 8 بالليل فتح 5سانتي وقلت يالله قرب الفرج ومن 8 الين 5 الفجر وهوا فاتح على الخمسة فقالت الدكتورة خلاص قيصيري البيبي تعب وهيا كمان تعبت بس لحظتها انا انهرت وجلست ابكي بكاءءاين بكيت كل اللي حوليني حتى الدكتورة ياحياتي عليها حزنت مررررررررة عليا وجلست تصلي ليا الاستخارة تشوف تعمل قيصيري ولا لا وفي النهاية وقع زوجي على الملية ودخلت 5ونص الفجر بعد ماعانيت كا الالام الولادة الطبيعية مابقى الا الراس والساعة 6 خرجت من العمليات بس بعد ماشفت والله الموت كم مرة وبجد ولاداتي كلها بدي الولادة بس الحمد الله الان انا بخير والبيبي بخير فده اهم شي

المهم نصيحتي لكم لاتجلسوا تشربوا اعشاب وبلاوي قبل الطلق الفعلي والخروع ده ابعدوا عنه تماما
وتاني شي انا ولدت بالتخصصي عند الدكتورة سماء ناظر مهما شكرت ومدحت في دي الانسانة ماوفيت حقها انسانة بجد رائعة الله يسعدها ياااااااااااارب ويكونوا كل دكاترة بلدنا زيها بجد تخاف عليكي كانك بنتها او اختها وتخاف عليكي بجد
المهم>>>>زودتها هههههه ادعولي
وقريبا بس افضى انزل موضوع عن زينة الغرفة والضيافة باذن الله:)