احمر برغندي .. بمادة طبيعية ..واقتصادية

السلام عيكم ورحمة الله وبركاته

حبيباتي أخواتي

قبل ما ادخل في الموضوع..عندي سؤال للي يحبون اللون الأحمر البرغندي...:23:

كم مرة صبغتي شعرك هاللون؟؟ وكم كلفك ؟؟؟ وكيف أثر على شعرك؟؟؟
وقد ايش المدة اللي استفدتي فيها من اللون؟؟؟

يمكن بعضكم يجاوب ويقول : عشرات المرات.. وكفلني كثيييييييييير..وشعري صار مثل الليف..

وما يمديني اتهنا فيه الا اللون نازل؟؟

طيب أيش رايكم لو قلت لكم عندي الحل...:27:

وحل طبيعي واقتصادي:19:

حبيباتي .... أنا لما عرفت بالسر هذا ما صدقت الا لما جربت وانبهرت لما طولت الصبغة معي

لمدة شهر...ايه نعم شهر وشعري بذنجاني مخصل بالبرغندي

والاحلى من هذا كله انها طبيعية 99%

فيه وحدة منكم سمعت ب(( القرمز )) أو اللون القرمزي.. اللون القرمزي هو اللون الوردي..

والقرمز هي مادة تستخرجد من الدم ( بس لا تسألوني من الانسان ولا الحيوان لأني ما ادري)

وهو متوفر عند العطارين ويكون شكله مثل الأحجار المكسرة ولونها أخضر زيتي شديد

اللمعان كأنه أحجار كريمة ولما يلامس الماء يلونه باللون الفوشي وسعر النوع الجيد منه

60( ريال سعودي للكيلو ) لكن الموجود عندهم مو قرمز طبيعي 100% لا..

هو قرمز محضر في المختبرات ..يعني كيميائي لكن قرييييييييييييييب جداَ جداَ من الطبيعي..


طريقة استخدامه على النحو التالي:

1- لما تروحين للعطار تشترينه يكفيك ربع كيلو ويزيد بعد لأن الكمية اللي تحتاجينها

قد حبة الفستق لعملية الصبغ الوحده إذا كان شعرك تحت كتوفك وكثيف نوعاً ما..

2-لازم أقولكم ان القرمز هذا في عيب .. وعيبه انه يوسخ ويلون أي شي يجي عليه يعني

ولو لمستيه ويدك مبلله على طول يصير لونها فوشي

لازم يكون مكان الصبغ في دورة المياه وأنتو بكرامة أو حتى داخل البانيو..

ولازم تكونين لابسةقفازات طويلة و ملابس قديمة لأنه إذا جا على الملابس ما يروح

لو بتنططين:06:

ولازم أيضاً تكونين لابسة ملابس(.....) قاتمة أو سودا.. حتى ما تبتلشين بعدين

وتزعجوني ( ملابسي اللي شريتها من( نعومي) و(لا سينزا) توسخت...:o)

3-بعدين تجيبين تقريباً كاسة موية وتحطين بداخلها مثل ما قلت لك كبر حبة الفستقة من

القرمز هذا وتحركينه حتى يصير مثل لون الفيمتو شبه المركز وبعدين تشيلينها من الكاسة

وتجففينها وترجعينها مع خواتها في الكيس ( ما قلت لكم اقتصادية )لأنك لو خليتيها أكثر من

اللزوم يتحول لونه إلى الزيتي (نفص لونه وهو حجر)ويصيرلازم تزيدينه موية ..

4- طبعاً شعرك لازم يكون نظيف وصبيه على شعرك وأنتي منزله راسك على قدام

وممكن تستعملين مرشة الموية حقت الكوي وترشينها على شعرك..

5- دخلي شعرك في كيس واربطيه وبعدين لفي على راسك فوطه قديمة أو شيلة قطن

سودا على شكل ربطة حتى تمنع وتتشرب أي موية زايدة ممكن تسيل على وجهك وجسمك

6- طبعاَ راح تتوسخ يدينك وأجزاء من وجهك .. وممكن تزيلين اللي على يدينك

بفركه بمسحوق غسيل الملابس( تايد -اريال ...الخ) ولو ما راح ممكن

تستخدمين قطنه مشبعة بالأسيتون ( مزيل طلاء الأظافر) وممكن استعمال الأسيتون

على الوجه لكن احرصي على غسل المناطق بعد ذلك بصابون للوجه والجسم وترطيبها

بالمرطب..

7- اتركيه على شعرك لمدة لا تقل عن 6 ساعات .. وطبعاَ لازم تكون بعد صلاة

العشاء أو الفجر حتى ما تفكينه كل شوي للوضوء.. لأنه رح يوسخ يدينك..

8- مرحلة الغسل: لابد من استخدام القفازات في الغسيل أيضاً لأنه _حتى في هذه المرحلة)

يوسخ ويلزق لك تحت الأظافر.. والمفروض أنك لما تغسلين شعرك بعد الصبغة هذي لازم

ما تلمسين شعرك بيدك مباشرة لمدة اسبوعين (للأمانة العلمية فقط وبالنسبة لي تراني موسعى صدري

وكل يوم البنات في الجامعة يسألوني .. وشو هذا اللون اللي في يدك؟؟؟ فشيلة صح )

اغسليه بالموية أول حتى ينزل أكبر قدر ممكن من اللون ثم استخدمي الشامبو على ثلاث مراحل

أو أكثر على حسب طول وكثافة شعرك..

رح تلاحظين ان اللون ما يتوقف عن النزول من شعرك لكن ما عليكي لما تحسين أن أكبر قدر ممكن

من اللون نزل خلاص..

وعلى فكرة ترا الموية اللي تنزل من شعرك بعد الغسل رح تكون زهرية طول ما اللون في شعرك

يعني يمكن لمدة شهر أو اكثر مع انه رح يخف مع الايام لكن لا تخافي من الموية الملونه هذي لأنه ما

تصبغ مثل أول مره غسلتي شعرك من الصبغه ولا تخافي من البانيو أو البلاط اذا تصبغ ممكن تغسلينه

بالتايد و حتى هو رح يخف مع الأيام إلى ما يختفي .. ولازم يكون اللروب اللي تلبسينه بعد الاستحمام

والفوطة اللي تنشفي فيها شعرك قاتمى أو قديمة لأنه رح يظل يصبغ طول ما هو مبلل

(لكن مو مثل أول مره)

9- بعد ما ينشف شعرك رح تحسي كأنك غسلته من الحنا ( ما قلت لكم طبيعية)

ممكن تزيتينه أو تحطي كونديشنر بعدين تشطفيه..

وبعدين رح تنعمي بالشعر البذنجاني أذا كان شعرك أسود أو برغندي أذا كان أفتح..

صدقوني يا بنات النتيجة جداً مبهرة .. وأنا شخصياً ما صدقت الا لما جربت...

جربوها وأدعولي أذا ضبطت معكم بالتوفيق في الدنيا والأخرة..

========================================

وممكن تعملي خصل بالمشقر قبل هالصبغة مثل ما أنا عاملة بس لا تفتحينها حيل يعني يكفي

تكون بني فاتحلأنها اذا كانت فاتحة رح يكون لونها بعد الصبغ وردي يضحك وتصيري

مثل المهرج ..هذا بالاضافةإلى أن الألوان الشاذة هذي حرااااااااااااااام ..اللهم هل

بلغت ..اللهم اشهد..

====================================

ملاحظات هامة:

- حاولوا قدر الامكان ان ملابسكم ما تتوسخ لأنها اذا توسخت ما رح تنظف أبداً.

- ضروري تستخدمي لغسل شعرك شامبو وكونديشنر للشعر المصبوغ حتى

تحافظي على رونق اللون أطول فترة ممكنه.

- المتزوجات أنصحهم أنهم يسونها في بيوت أهاليهم لأنها بجد توسخ هذي الصبغة .

وأنا حاضرة لأي سؤال

أختكم

ولايف:32: