احنا وأمي وخواتي محتاجين لكم ولدعائكم ..

السلام عليكم ....
خواتي خوات منتدى حواء...
أكتب لكم لاني مالقيت احد بعد الله غيركم يسمعني ويعطيني حلول والاهم يدعي لنا

بداية خلوني اقولكم السالفه ...
كتب الله علينا وجت لنا خدامه وكان عندنا خدامه قبلها وبتروح اول ماتجي الجديده
خدامتنا القديمة :
كانت غير مسلمه وملقوفه وتخوف (ماادري لانها غير مسلمه ولاتقولون لي ليش غير مسلمه اول مره نجيب غيرمسلمه لان الظروف حدتنا مالقينا الا هاذي بوجهنا خذيناها وقلنا بندعوها للاسلام ووووو )

ومزاجيه درجه اولى مره تجي حبوبه ومره نذله .. وتسفهنا اذا ناديناها
وكل يوم ندخل عليها نلقاها تصيح كذا من غير سبب .

المهم قالت انا ابي اروح هي باقي عليها كم شهر وتنتهي مدتها ..
المهم قدمنا على خدامه بعد ماقعدنا نصيح ونترجى ابوي وكل يوم نكلمه وكل يوم نفاتحه بالموضوع ...
يقول عادي تروح وامك وخواتك الصغار يشتغلون (علما بان خواتي3-4 ابتدائي اي مساعده الله يهديه يقصد ابوي وابوي من النوع الحاركل شيء يبغاه بوقته وملابسه كل ساعه يغير غتره ثوب ملابس داخليه وكله كب على امي)(غير اخواني الشباب وملابسهم والصغار والاكل والمواعين ووووووووووووو)

وامي انسانه تعبانه ضعيفه صحتها ماتساعدها ويدها اليمنى تخيلوا يجي فيها زي الكهرب اذا اشتغلت ومع كذا ساكته وصابره

المهم قدمنا على الخدامه بعد 6 شهور من الصياح عند رجلين ابوي يالله وافق تخيلوا
وجتنا الخدامه وراحت خدامتنا القديمه


هينا المشكله ... تخيلوا ماتبي تشغل تتصدد .. وكل مانقول لها شيء تقول مااعرف
ماااعرف اكوي
مااعرف اغسل
مااعرف اكنس
مااعرف اقطع بصل

قلنا مو مشكله نعلمك واحنا ماعندنا مانع صبورين بدرجه ماتتخيلونها عارفين ابوي وطلباته ...

بدينا نعلمها انا وامي ...
جبنا الثياب حقت ابوي واخواني الشباب ... وكوتهم كوي زي الزفت
وقعدت ساعه بثوب واحد ( المشكله يبين على اللي ماتعرف ..شكلها تعرف بس تسوي نفسها غبيه)( المشكله تقول انا قد اشتغلت 3 سنوات )يعني معقوله ماكانوا يكوون ولايغسلون ولاينظفون..

وقعدت امسك الثوب واكوي قدامها اعلمها قامت وراحت وجلست على الارض بعيد عني . وكل ساعه تمسك ظهرها ولاتناظر وشلون اكوي

وتنظيفها للبيت اي كلام ..... وكل مادورناها لقيناها بغرفتها
واذا ناديتها قالت انا كنت رايحه للحمام انا كنت رايحه اصلي

تخيلوا والله وبدون مبالغه يروح اليوم .. واحنا نناديها تعالي انزلي من غرفتك


والله ان لي يومين مانمت قاعده اصيح اتذكر امي...
تخيلوا امي يوم شافت كويها قامت تغسل وتكوي ويدها تعورها ورجولها صالت عليها
عيوني ماتحملت اشوفها يوم جت تنام خذت المسكن حقها هذا حق الالام المزمه ماتآخذه كثير زاد عليها تعب يدها ...


وش اسوي يابنات ؟؟ والله ان القديمه كانت ارحم منها صح ملقوفه وكافره بس ارحم على الاقل كانت شايله الكوي والتنظيف شوي عن امي

ماادري وش قصد الخدامه يوم تطنشنا وتسفهنا ...
تآخذها اختي الصغيره توريها ادراجها حقت الملابس تعلمها على الادراج وكل درج وش تحط فيه من الملابس تناظر فوق بعدين تقولين خلاص خلصتي كلام وتطلع ...


مالنا غيركم بعد الله .....

ادعوا ان ربي يسخر هالخدامه لامي ويجعلها مطيعه وتتعلم ...

ولاتقولون رجعوها للمكتب ابوي مايرحم والله مايرحم بيقول ارجعها واقعدوا يعني نفس الشيء مااستفدنا شيء..

وماراح نآخذ من ابوي الا الصياح والهواش بيقول انا قايل ماابي خدامات خلوا امكم تشتغل .... ابوي لو يحصل له يخلينا صاحين 24 ساعه مايقصر


انا آسفه اذا طولت عليكم ..... لكن حسيت نفسي مخنوقه ومحتاجه اتكلم وتعبت من الصياح ...

اللي ابيه منكم :::
اولا الدعاء
ثانيا احد صار له مثلنا ... جتها خدامه وش سووا معها ؟؟

طلبتكم لاتردوني


الله يوفقكم ويبارك لكم في صحتكم وعيالكم وازواجكم

انا مواصله ابجلس انتظر ردودكم ....