اختي الصغيره ماتحترمني

السلام عليكم

ياجماعه انا مشكلتي مشكله !
مشكلتي مع اخت اللي اصغر مني بسنتين !
لما كنا صغار كنا قراب لبعض مره
كنت اخاف عليها حتى من الهوى
واي احد يزعلها او يجرحها بكلمه بوجهه لدرجة مره بالابتدائي
كان في بنت بس تضايقها وانا اللي رحت ودافعت عنها
لدرجة من قهري ومن وقاحة البنت ضربتها
كنا دائما سوى وكنا نقول لبعض كل شي
لما كبرنا تغيرت اختي كثير صارت وحده ثانيه !
وصارت اللي اقرب لي اختي الكبيره اللي عمري ماتوقعت تكون قريبه لي فيوم من الايام
اختي اكبر مني ب7 سنوات كنا بعاد عن بعض مررره
لكن هالسنه صارت اقرب لي من اي احد تحنن علي مره
واذا تضايقت تحاول قد ماتقدر تسعدني
تفهمني مره واقولها كل اسراري افضفض لها واشكيلها
جد هي نعمه الله لا يحرمني منها
وجد ماني متخيله بعد ماتتزوج كيف البيت بدونها :(
هي زواجها قريب جداً ان شاء الله والله يتمم لها على خير

طيب وين المشكله ؟!
المشكله بأختي الصغيره وقحه معاي يابنات لدرجه مو طبيعيه
انا كل مره اقول طايشه بكره تكبر وتعقل لكن هي الحين بالجامعه ولسه على حالها !
تتصرف معاي بدون اي احترام ولا كأني اختها الكبيره
وهذا بس معاي انا دون عن اخواني
وتحاول تفرض شخصيتها علي
لدرجة الحين ثقتي بنفسي مره ضعيفه واذا طلعت معاها مكان اجلس
ساكته وهي بس تتفلسسسف وتتكلم
والمشكله تتفلسف كثير وتحاول تبين ان هي السنعه الزينه وانا الهبله اللي ماتفهم
ومره اتنرفز من حركاتها بس اسكت
وكل مره اقول بقاطعها ماني مكلمتها لين تتعلم احترامي
لكن ماقدر غصبا عني ارجع واكلمها
حتى اذا رحنا مكان عام وجيت بتفاهم مع احد تقاطعني وتسكتني
وتتفاهم معاه هو !
مره بتكلم مع احد بمحل قالت اسكتي انتي وجلست تتكلم
انا مره بهالفتره متضايقه من نفسي ومن شخصيتي احس شخصيتي صارت ضعيفه كثير
ووتويقح معاي بالكلام واذا بينت لها انها قليلة ادب وانها جالسه تتمادى
تضحك بوجهي وتقولي مجنونه ولا مريضه !
من كذا كرهت النقاش معها وكرهت الكلام معها
وربي يابنات ما ابالغ اذا قلت لكم احس اني اكرها !
واذا جت تطلب مني شي ما اعطيها وجه واذا جت تسولف معي اطنشها
عكس اختي الكبيره !
اختي الكبيره تقول اني حنووونه مره واني طيبه واصلا انا اعشق اختي الكبيره مرره !
لكن مادري ايش اسوي مع الصغيره
يعني اول كنت اقول عندي اخت الكبيره اذا تضايقت من الصغيره اروح للكبيره
لكن الحين بتتزوج
وبضطر اقابل اختي الصغيره مافي بالبيت الا هي
يابنات اتمنى احد يفهمني ويكون حكيم ويساعدني
مو حلو علاقة الاخوان في بعضهم تكون كذا !
انا اتمنى نرجع زي ماكنا صغار
كيف كنا ندافع عن بعض ونخاف على بعض ونشكي لبعض ونحب بعض
الحين مالي اي قيمه او اعتبار عندها
وهي بنفسها قالتلي انا ما احترمك
وقالتلي ما كأنك اختي الكبيره
ليش بس لأني طيبه ؟
مع ان حياتي ماقصرت معها
بعمري ماقصرت معها بأي شي لكن الحين مره صارت تتمادى اول اذا غلطت علي
تعتذر الحين اذا غلطت تطنشني
مكتفيه بصديقتها وتبدي صديقتها علي وانا في اخر حسابتها
حتى بالجمعات تتجاهلني كأني جدار جنبها ولا كرسي
اعرف الخوات خاصه اللي سنهم يكون قريب لبعض
يكونون مع بعض يسولفون مع بعض
اما انا وهيا كأننا عدوات !
مع اني وربي يابنات كنت لها زي الام حتى دراستها كنت ادرسها !

قولولي وش الحل ؟!