اختي الكبيرة وتصرفاتها معي

السلام عليكم ورحمة الله وبركاته، يا اخوات للامانه انا ما اعرف للمنتديات وسجلت هالمره عشان اكتب هالموضوع بس لان ماعندي اشخاص اخذ منهم استشارة منطقية وصادقة
اتمنى تردون علي وتفيدوني
انا اختي الكبيرة من صغري من لما كنت طفلة وهي تغار مني واتذكر مواقف كثيرة ودايم تحاول ترعبني وتكسرني، والسبب ايش؟ مدري والله العظيم
وانا اصلا امي مهمشتني وصراحة انا متعايشه مع كوني "نكرة" في البيت وان الاهتمام كله لها عادي انا انسانة احب اريح رأسي وما احب اطلب شي واي شي يسبب لي مشاكل ابعد عنه
المهم متعايشه من صغري امي تخليني مع اخواني الصغار وتاخذ اختي معها للمناسبات مع ان الفرق بيني وبين اختي ٣ سنوات فقط، وتقول عادي انتي مو لازم تروحين لان انا ابيها تتزوج وكذا وهالكلام من لما كان عمرها ١٦ سنة يعني امي مهمشتني تهميش مو طبيعي، واختي اصلا اذا امي اعطتني اي اهتمام تنجن وتسكت ماتكلم احد لين يصيرون رسميين معي وبعدها تصير تحبهم وتكلمهم زين، واذا احد عبرني تطنشه ع الاخر لين يتجاهلني
واحسها تتخيل اني حزب وهي حزب ولازم تسوي كذا!
الغريب اني لما اجيب لها شي، او اساعدها في شي
تتعامل معي باهتمام وتناظر في عيوني وهذي الحركة مستحيل تسويها الا لما اقدم لها شي واول مايخلص الشي ترجع للتطنيش وتعتبرني مخفية
واذا سمعتني اتكلم مع احد تصارخ اسكتيييييييييي اسكتي لا تتكلمين لا تسولفين!
انا بس ودي افهم ليش كل هذا؟ انا وش سويت؟
وشخصيتها هذي بس معي، مع باقي العائلة غييييير لما يطنشوني طبعًا
ودايم تحاول تكسرني خصوصًا عند الناس او اذا كنت مبسوطة او مبتسمة تصارخ وتبكي وتنجن واذا شافتني تعبانة ترتاح وابتسامتها ماتتقفل من فمها
يشهد الله ثم يشهد الله ثم يشهد الله
اني مع كل هذا ما احمل لها اي حقد، ودايم اقول لنفسي انتي تتوهمين
مع اني ما اتوهم
بس لاني ما افهم شعورها، ليش تعاملني كذا؟
وللمعلومية حتى عند البنات وصحباتها تتكلم من وراي وتسبني عندهم واجهل السبب المشكلة مابيننا اي تواصل ولا مشاكل يعني ماعمرنا دخلنا في سوالف عميقة انا وهي اصلا .. طول عمرها مهمشتني وتطمح ان التهميش لي يكون من الجميع
وانا متأكدة بس اهدي نفسي واقول اتوهم لان ما ابغا اتعب وتتدمر نفسيتي
ابغا نصيحة واعتبروني بنتكم .. ونفسكم .. واختكم اللي تحبونها
انصحوني كأني شخص عزيز عليكم رجاءً
ولا تقولون حاولي تتقربين لان زي ماقلت اول ماتاخذ الحاجة وجهها يتغير وتناظر لي بس اول ماتنتهي لو بعد خمس دقايق وجهها يقلب مباشرة