اختي تزوج عليها زوجها وانا ضايق صدري عليها

مساء الخير ..

مره انا حزينه على حال اختي تزوج زوجها له الآن 3 اسابيع وأختي احس بيجيها شي..
طول الوقت تفكر وسرحانه اختي بالمره كتومه لأبعد درجه .. اختي عندها ولدين وبنتين ..
وعمرها 33 سنه وزوجها يبي عيال وأختي لها فتره ماحملت ممكن 6 سنوات تقريبا ..

للامانه زوجها مررره كويس وكريم والله ويكرم أهلي ويحسب لهم الف حساب .. ويقدرهم بشكل مشاءالله ..

وعذره من هالزواج ان يبي عيال واجد وهو مقتدر مشاءالله وأول ماخبر اختي بالموضوع اختي علطول قالت طلقني !!!

وقال مستحيل اطلقك وانا احبك وانتي ام عيالي ولافي شي يفرقنا وانا والله ابي عيال ومن هالكلام ..

اختي لها الآن عند أهلي مايقارب شهرين من عرفت بالخبر راحت وزوجها له الآن تقريبا 3 أسابيع متزوج ،، وبعد زواجه ب اسبوع جاء زوجها عند ابوي وكان يبي يقابل اختي ويكلمها وأختي ماطلعت له ولاترد ع اتصالاته وربي العالم كله ف وادي وهي في وادي احس اختي جالسه تنهار بشويش وربي تعبانه عشانها .. مكتومه مره بس اليوم سالتني قالت حنان لو انتي في مكاني وش بتسوين بترجعين له ؟؟

قلت لها هذا زوجك ابو عيالك لاتتخلين عنه بهسوله وهو يحبك قالت لو يحبني ماتزوج علي ؟؟؟؟؟؟؟؟


وانا والله مدري وش اسوي أنتو شرايكم ف الموضوع هل له حق يتزوج وربي اختي تجننن واخلاقها عسل وسنعه عمري ماشفت بسناعتها من يومها صغيره سنعه وكشخه وانا متاكده ان زوجها يحبها ..

بنات حواء هل له حق الزواج ؟؟ وفعلا لو كان يحب اختي ع قولها ماتزوج عليها ؟؟

عيوني نصايحكم تكفون انصحوهااا وأدعو لها ان ربي يصبرها ويجعل زواج زوجها بردا وسلاما عليها ياحي ياقيوم ..