اختي زوجها بيتزوج عليها !

اختي زوجها بيتزوج عليها !
هذي القصه باختصار وبدون مقدمات .. صح انقهرنا اول وحسيت ودي اذبحه ودعيت عليه والله يسامحني ..لكن خلاص صرنا مثل مايقولون تحت الأمر الواقع .. واختي ماهي بمدينتنا بعيده عنا .. اول ماكلمناها .. ماقدرنا نسألها .. وكان صوتها ودها تبكي وتصيح .. بعدين .. تجرينا وسالناها .. قامت تصرف وتضحك وتقول اذا وده الله يعينه ..واحس قلبها يبكي من داخل ..المهم احس صار عندها الوضع مايفرق معها
ـ امي تقول مادام مابيقصر عليها ماعليها الا العافيه
ـ اخواني يقولون ماللواحد وجه يخاصمه هذا شرع الله
ـ وهي تسوي الموضوع متوقع وعادي
وانا احس بقهر .. هي اكبر مني بسنين وتعتبرني جاهله ومالي خبره عشان ماني متزوجه وصغيره
لكن ..ياناس ياحريم الله يرحم والديكم .. الموضوع مايقهر ؟؟
المره سخرت حياتها بمعنى الكلمه له ولعيالها .. وعلى طول تهتم فيه وتصبر عليه واتذكر العام لما سافرنا لها كانت تقول لأمي (الوحده لازم تتحمل
وتصبر تراني صبرت على المر ومشيت اشياء كثيره ..) وسويت اني ما سمعت وشربت الماء وطلعت ..
ــ ياحريم اذا فكرت من ناحيتها اقول ماله حق وظلمها وبناتها الصغار يعلموني يقولون اصلا ابوي مايجي الا بالليل تعبان وينام
وانا عارفه انه مل منهم ومن ازعاجهم وصجتهم لكن عياله وغصب عنه يتحملهم
ــ واذا فكرت من ناحيته اقول ترا فيه فرق بينهم هو متعلم ومخلص الجامعه ومسوي فيها مثقف هو ووجهه واختي المسكينه معها الإبتدائي وترا سواليفها على قدها ومعلوماتها قليله وماهي من الحريم اللي
يحبون الدلع ويلبسون .. لكنها ياقلبي تحاول وتسوي رياضه ورجيم واذا قالت لي وهي تطالع المرايه (سويره ماعندك شي يشد الوجه؟ ) احس قلبي يتقطع .. وكمان هي دايم مشغوله ببناتها واولادها وهو شكله يبغى وحده فاضيه وحلوه تلبس وتتدلع على قولة امي .. وهذا ماهو موجود عند اختي وما الومها تعبانه من الصغار واللي يشوف وجهها وجه زوجها يقول انها اكبر منه .
ـــ المشكله ياحريم ابغى وحده تفهمني احس ودي اصيح وحده تفهمني
وش اللي يخلي الرجال يهمل مرته وينساها وتروح معزتها من قلبه مع السنين رغم انها تحبه وتقدره ولاقد مره سبته او قالت لنا عيوبه
فهموني الله يرحم والديكم .. ليييييييييييه
لييييييييييه الرجال يسوي كذا نسى اللي سوته وتحملته عشانه
يهملها ولا يجلس معها الا اذا جاب الطلبات او ينام ليه كذا
انا وحده محتاره ماعندي خبره وما ادري وش السالفه بس علموني انتوا
يتركها ويهملها ويتزوج عليها عشان ماصارت مثل اول ماهي دلوعه ولا لبسها حلو مثل ايام اول ؟؟
طيب وين راحت المعزه وين المحبه وين الأيام اللي راحت ؟؟ الله اكبر عليه
امي تقول ترا الرجال كلهم كذا يبغون المره اللي تغير وتلبس وكلامها حلو
طيب ليه ياناس وين ... ؟
والله ما ادري وش اقول لكن ودي وحده تعلمني هم الرجال كلهم كذا ؟؟
كلهم سوا مايهتمون للوحده اذا تغيرت ؟؟
فهموني والا انا بس اللي اشوف هذي النوعيه ..
فهموني احس ودي ابكي ...