اختي ضاع مستقبلها !!!!!

صديقة بنت خالي تروي قصتها الان وتريد منكم المساعده
تقول :

انا بنت حديثة الزواج ولي اخوات ..
الصغيره في المتوسط لديها ipod
والوسطى في الجامعه لديها هاتف نقال
ولي اخوين في الابتدائي
واخ في الجامعه

اهلي مو متشددين كثير ومو متفتحين كثير يعني متوسطين طبعا احنا البنات مانطلع من البيت بدون امي او اخوي
ومانزور صديقات لوحدنا ناااادر ولازم امي تكون معانا ونص ساعه مانطول
وكل صديقاتنا تعرفهم امي وتعرف امهاتهم
يعني امي مهتمه فينا وخايفه حريصه علينا
بس مشكلتها ماتعرف للجوالات والاجهزه الحديثه


واحتياجانتا وطلباتنا داااائما متوفره وامي تضغط ع نفسها كثير علشان تلبي احتياجاتنا ونكون مرتاحين
امي صديقتنا قبل ان تكون امنا كل شي نقولها وهي تحب تسمعنا وتصادقنا
ابوي بعيد كل البعد عنا ويوفر لنا مصاريفنا ورفاهيتنا ويشترط قبل ذالك الاجتهاد في الدراسه والمعدلات الممتازه يعني مايوفر لنا جوالات واجهزه وسفريات الا كهديه لنجاحنا بامتياز بالدراسه فهو يهتم بالتعليم جدا
لدي اخ بالجامعه 

بتكلم عن اختى الوسطى هي بنت عاقله جداااا واهلي يثقون فيها كثيرا يشاورونها في امور كثيره فهي راجحة العقل وذكيه محافظه جدااا ع صلاتها وصيامها 
لدرجه استحي من نفسي اذا تاخرت انا في الصلاه ولكن بالامور الحياتيه الثانيه متفتحه فيها فهي تريد ان تدخل الطب وليست ملتزمه ولكنها محافظه ع فروضها جدااااا
ولكنها خفيفه يعني سواليفها واجد

بالصدفه اخذت ipod  اختي الصغيره ابتصفحه واعرف ايش المواقع اللي تدخلها عن طريق النت
ولكن انصدمت لقيت لها محادثات في برنامج حملته ع جهازها مع رجل اكبر منها 15 سنه ولكن هي غبيه جدا وعلى نياتها مرره
كانت تكلمه بطيبه وسذاجه وعفويه اسلوبها معه اسلوب طفله تكلم صديقتها
انصدمت وناديت اختى الوسطى اللي في الجامعه وسألتها وقالت ماادري عنها
وتقول لاتهاوشينها ولاتقولين لها انك شفتي المحادثه بس امسحي البرنامج وقوليلها هذا البرنامج مو كويس وبس ..
( بصراحه انا هينا شكيت وخفت انها هي بعد زيها تحادث شباب )
سألتها :  لايكون انتي بعد زيها
قالت : لا وش دعوه (وكانت متوتره)
قلت: جيبي جوالك بشوفه
قالت : تشكين فيني يعني
قلت : لا بس بتفرج 
( رفضت تعطيني الجوال بحجة انو مافي بطاريه )
قلت لها : اشحني البطاريه وعطيني اشوفه

( اخذت الجوال منها بالقوه.. وياليتني مت قبل اشوف اللي شفته واقرا اللي قريته )

انصدمت فيها هذه مو اختي اللي اعرفها
كانها شخصيه ثانيه كانها في انفصام في الشخصيه جد والله شخصيه مختلفه تماما عن اختي اللي اعرفها وماقدرت اتكلم وايديني ترتعش من هول الصدمه انصدمت في :
1/ هي تعرف ان اختي الصغيره تحادث رجل ولاهاوشتها وعادي عندها
2/ هي نفسها تحادث شاب
3/ نوعية المحادثه ماكانت عاديه ابدا
بل كانت جنسيه بحته جدا انا استحي من هذا الكلام وانا متزوجه
4/ مصوره جسمها وترسله

قامت اختي تصيح وتبكي
تقول : خلاص انا اسفه واخر مره تكفين لاتدري امي اهم شي امي لاتعلمينها مابي يصير فيها شي

هاوشتها و طردتها لغرفتها
بعد ساعتين رجعت كلمتها بهدوء وعقلانيه
 
انا: ليش كيذا حرام عليك انتي مصليه مسميه
هي : (ساكته)
انا: احنا مقصرين معاك بشي قولي ناقصك حنان ناقصك صداقه انتي مو ناقصك شي
هي :(خايفه وساكته)
انا: تكلمي ليش ساكته من علمك هالكلام عيب انا ما اقدر اقوله
هي: صديقاتي هم اللي علموني وقلت بجرب 
انا : في احد ثاني تكلمينه 
هي : لا بس هذا حتى ايميلي مافيه شي والله اخر مره 
انا : انتي تقولين له انك طلعتي مع واحد قبل وانك خبره في هالمواضيع صدق ولا لا ؟
هي : لا العب عليه والله اكذب عليه
(وجلست انصحها )

( انا صدقتها وجلست مده زعلانه عليها واخذت الجوال منها .. بس في الاخير رجعته لها .. ومسحت برنامج المحادثات 
بعد يومين تقريبا اخذت جوالها وهي ماتدري ولقيتها الى الان تكلمهم يعني ما تابت ولا خافت عاملتها بالنصح والارشاد والطيب بس مافاد معها اللين يعني كذابه وانا اصدقها
وعدتني انها تترك هالخرابيط وكذبت

وقتها قلت لامي عن الموضوع
وجلست امي تبكي وقالت هذه مو اول مره انا كشفتها مرتين وانتي الثالثه
انا انصدمت طيب ليش ماعلمتيني ؟؟
امي : انا كشفتها المره الاولى تكلم واحد وعندها رقم ثاني بس ماعندها جهاز ثاني وهاوشتها وبكيت عندها وترجيتها تترك هالخرابيط ووعدتني انا تتركها
وبعدين كشفتها مره ثانيه وتعاملت معاه بالطيب ونصحتها كثيرررر وعلمتها ان هذا خطأ وزعلت عليها وبكيت وحبيت يدينها وترجيتها انها تترك المكالمات ونصحتها 
ووعدتني انها تترك هالخرابيط
بس ماتركتها وانتي كشفتيها للمره الثالثه
ووعدتني انها تترك هالخرابيط بس كذبت ورجعت تكلمهم 4 مرات توعدنا وتكذب
وهي تكلم شباب كثيرررر

( وامي تتكلم دخل اخوي وسمع كل الكلام وراح لخواتي وهاوشهم وكسر غرفتهم وكسر مرايه كبيره على الارض بس ماضربهم جلس يكسر الغرفه قدامهم ويرمي التحف عليهم
ضرب الوسطى كف خفيف ودفها ع السرير ورمى كتب الجامعه عليها )
يقول : ياكذابه ياحيوانه ليش تسوين كيذا وين صلاتك انتي الي تقوميني اصلي الفجر وتهاوشيني اذا تهاونت في الصلاة حرام عليك صدمتينا فيك .. بعدين طلع وقفل الغرفه عليهم
انا دخلت مره ثانيه وقالت ليش تعلمين امي
قلت : اتتي وعدتيني تتركين المكالمات وماتركتيها ولا يوم واحد ع طول رجعتي تكلمينهم.. عطيني سبب واحد يخليك تضحين بجامعتك وبا اهلك وبثقتنا فيك ؟؟
قالت : خوذو الجوال خلااااص ما ابيه و زوجوني ( هي اصلا رافضه الزواج قبل بس في هذه اللحظه وافقت )

المهم حبسناهم في غرفه ذليناهم وحرمناهم من الحمام يوم كامل
ونمت عند اهلي وجلست افكر وشلون اتعامل معها ماينفع معها الطيب والنصح
حتى الزواج ماتبي تقول بكمل جامعه .. احترت وش اسوي .. وخايفه ع امي

وامي كانت تعبانه من هذه السالفه 
في الصباح امي دخلت عليهم وضربت اختي بقووووه وتهاوشت معاها 
وقلب امي عورها وطاحت بالارض وهي تتحسب عليها وتدعي عليها وتقول انتي فضحتينا طلعتي معاه من ورانا
انا خفت وشكيت معقوله تسويها وتطلع شلت امي انا واخوي ووديناها لغرفتها جلسنا نهديها واقرا عليها وامي تدعي ع اختي
كانت تبكي وتنتفض وقلبها يعورها
وسألت امي من قالك انها طلعت مع واحدقالت اصلا هي كذابه انا خلاص ما اصدقها دايم تكذب علي وتقول خلاص تبت  

لبست عباتي واخذت اختي لطبيبة نساء علشان تف***ا 
بس الحمد لله قالت انها بنت ماتزوجت

رجعتها للبيت وحبسناها وحرمناها من الجوال ومن الجامعه بنقول لابوي انها تداوم بالجامعه سنه بعدين بنجبرها تقول لابوي انها خلاص ماتبي الدراسه وانها رسبت فيها وصعبه الدراسه عليها 

الى الان مااحد ضربها غير امي  ///
ابوي مايدري واذا درى بيطلق امي وبيقول انتي السبب وماراح يسوي لاختي شي
انا اعرف ابوي كثير والله مايقول لاختي شي
بيحط السبب ع امي

الحين انتو ساعدوني وش نسوي شلون نتعامل معاها؟؟ احنا اذا هاوشناها او نصحناها وكلمناها ماترد طول الوقت ساكته غامضه جدا
ما ادري هل هي ندمانه ولا لا 
هل عقابنا صحيح لها ؟؟
وش الحل ؟؟؟

امي تقول ما يصلح تتزوج لانها خفيفه وممكن اذا قصّرر عليها زوجها بشي تسويها وتكلم شباب وهي متزوجه خليها لين تعقل تكرف في البيت كانها شغاله 
 








:::::::::::::::::::::::::


تكفون اللي ماتقدر تساعدها بحل
تدعي لامها بالشفاء للان بالفراش بسبب اختها
وتدعي لاختها بالهدايه والصلاح