اختي عاقة و صار لنا ٥ سنوات نتحملها

السلام عليكم جميعاً
عندي اخت اكبر مني و من اخواني، عمرها ٤٠ سنة و ما تزوجت
و كل ما يجيها عريس ترفضه بحجة انه بيستغلها او بيلعب عليها
و كل ما ترفض تسوي لنا مصيبة فالبيت و تقول ان نحن السبب و تقول تسب امي و تقول لها انتي سحرتيني عشان ما اتزوج طبعاً انا كل مره اكون موجودة من تضارب مع امي و مرات اخواني يكونو فالبيت و يتدخلون عشان تستحي على وجهها تمينا على هالحال سنة سنتين ثلاث
لين ما تقدم لها عريس و رفضت و قالت لأبوي حسبي الله عليك تبا تصرفني لأي واحد يتقدم مع ان ابوي ما قبل ولا رفض عطاها الاختييار و هي رفضت، ابوي ياه انهيار عصبي و انا فالدوام رجعت وديته المستشفى تم فيه ٥ ايام و طلع عنده شلل الرعاش و بسرعة نزل وزنه و كل ما يشوفها يزيد المرض
قررت اني انفصل عن دوامي و اسافر مع ابوي و امي بعيد عن اختي العاقة و رحنا اعتمرنا الحمدالله و تحسنت حالة ابوي و امي.
رجعنا البيت و بدت المشاكل قالت ليش تروحون مع فلانة يعني انا، و انا تخلوني تحسبوني خدامتكم تعبنا منها والله
مرت سنة و نحن صابرين لين هالشهر قامت تكسر كل اغراض البيت و تهدد ابوي و امي بالقتل انا من شفت الوضع جاتني حالة نفسية و رحت للمستشفى و لقو عندي نسبة من هرمون مهم للقلب طالعه ل ١٠٠٠ بدل ما تكون ل ٣٣ يعني قلبي قاعد يتحمل فوق طاقته و عادي يوقف اي وقت، ما خبرت امي بس ابوي اللي يعرف.
المهم رجعنا البيت و هالمره قامت تسب ابوي و تقوله كلام ما ينقال بس كلام الشوارع، انت كذا و كذا (كلام قبيح جداً) ان شاءالله تموت قريب يالشايب، ربي يعطيك مصيبة تبعدك عن حياتي والله لا اروح لشارع و انزل خشمك، بشوه سمعتك و غيره من الكلام و السب
طحت من الصدمة انا و ابوي و هي تطالع و تضحك جت امي طلعتنا برا انا و ابوي عشان تبعدنا عنها
و نحن نتمشى اول مره اشوف ابوي يصيح و يقول حسبي الله عليها
للحين مو عارفين ليش كل هذا
المهم بالليل رجعنا عشان نرقد و سمعتها تقول لأمي انا اكرهكم كلكم و انتي سويتي لي سحر و شفتك في منامي
المشكله ان امي تصدقها من تقول ان عندها سحر و قاعدة تجبرنا نصبر عليها لأنها " مسحورة" انا ماني مصدقة ابداً انها مسحورة بس طريقة تسويها عشان تتقرب من امي و قاعدة تنجح فهالشي
لأن امي في ٢٤ ساعة قامت تنفرني انا و ابوي و اخواني
للعلم سورة البقرة كل يوم مشغله فالبيت من وين يجيها السحر
السموحة لأن موضوعي طويل بس والله العظيم معانات مع اختي تقهرنا كل يوم اكثر و ما نعرف شو نسوي اذا لجأنا للقانون فضيحة و اذا سكتنا مرضنا
ابي منكم نصيحة .