اختي وتصرفاتها بتبعدنا عن كل الناس

السلام عليكم ورحمه الله
عندي مشكله وكالعاده مالي غيركم بعد الله اخذ المشورة منه انا عندي اختي الله يهديها والله انها طيبه مره وحبوبه وتاج راسي بعد بس عيبها تنحش الناس عنها يعني ماتعرف تجامل ابد وتعطيهم قنابل ارض جو بوجيههم يعني علي سبيل المثال مرت اخوي بزواجها مزينينها بمركز كبير ومشهور ماخذين عليها ذاك المبلغ تقول لنا وش رايكم انا قلت حلو وانت مزينته اكثر اختي قالت وش هالتعديل احسه ناعم كانه انتي مزينه نفسك بالبيت كسرت خاطرها ومره بنت عمي تسالها عن فستان قامت تضحك بصوت عالي مره وتقول لا تعليق ومن كم يوم بنت خالتنا وصديقتنا مره وتمون جايبه لها فستان الفستان حلو بس ممكن من رميته بالدولاب صار يبي له كوي وبخار واحنا متعودين عادي نتبادل ملابس بعض ونمون علي بعض تخيلو اتصلت عليها وغسلت شراعها تقول لها لو لخدامتكم ماتعطيها فستان كذا وكبرت الموضوع وتهاوشت وقطته بالزباله وانا يوم رحت اخذ بخاطر البنت زعلت اختي علي قالت انتي تقوين عيونهم علينا وماعندك شخصيه والمشكله اذا تزعل من وحده وتقطعها تبيني انا بعد اقاطعها حتي لو مالي شغل واذا اكلم البنت الي هي مقاطعتها تزعل علي وتتغير هي والله طيبه بس لسانها متبري منها مع الكل معانا ومع اخواني واخواتي بس الغرب او الاقارب مايتقبلو هالشي وكل ماكلمتها ماتقتنع تقول مااحب اجامل واكذب واجمل شي قبيح جد تعبت معها دايم تسوي بلاوي وانا ماغير ارقع وراها اعتذر لهذي واتصل اخذ بخاطر هذي واجمع بينهم صايره مصلحه اجتماعيه بسببها جد تعبت عطوني حل معها تعبت من كثر ماهي تغلط وانا اتعذر للناس علي الاقل لا تجامل بس لا تجرح ساعدوني يابنااااات وش اسوي