اختي يابنات وصلت بس لاااااااااااااااازم تدخلوا

السلام عليكم يااهل جده
السلام عليكم ياحوائيات
حبيباتي حابه ابشركم اختي الحمدلله وصلت للبيت الساعه 8 الصباح
ماما بس جلست تضمها واختي ترتجف من الخوف والبكاء وطلعت استحمت ونامت
ولمن صحيت اليوم الساعه 6 المغرب كلمتها
والله يابنات اختي جدا قويه بس والله انها بكيت بكاء على الجوال وتقول انا شفت الموت وحسيت بقيمه الحياه
طبعا قالتلي انها اضطرت تخرج هيا وصاحبتها من العمل على الساعه 12 الظهر لانو المبنى كلو ظلم فجاه وبدا يضرب المبنى ماس كهربائي
المهم كانو مع السواق في سياره نيسان صغيره في طريق الملك فجاه السواق صرخ عليهم قالهم اخرجوا الان بسرعه السياره تغرق
خرجوا من السياره ولقيوا سياره جيمس فيها شاب واخته ( ثالث متوسط) سار الولد ياشرلهم ويناديهم تعالوا بسرعه
المهم راحوا وركبوا معاهم تقولي ضلينا معاه من الساعه 1 الظهر في طريق الملك للساعه 4 العصر
السياره ماتمشي بس تمشي بالمويه تقول بعدين طلبنا منه يوقفنا في اي مكان
وقفلهم عند مسجد وطلعوا اختي وصاحبتهها واخت الولد للدور الثاني اشان يدخلوا الحمام فجاه سار الولد تحت يصرخ انزلوا بسرعه المسجد يغرق والسيل رح يغرقكم
نزلوا يجروا وساروا يجروا في الطريق
طبعا اختي وصاحبتها واخت الولد فكوا الطرح وربطوا نفسهم ببعض بالطرح اشان يكونوا مع بعض والولد ماسك عصايه اشان يحس الطريق ويشوف ادا في حفر او لا
وصلوا لمطعم اوندا بوردر المكسيكي وطلعوا للدور الثاني واختي تقول احنا ندعي ونبكي
بعدين على الساعه 8 العشاء الدفاع المدني سار يطلب منهم اخلاء المطعم لانو رح يغرق بالسيل
تقولي والله اني ساعتها شفت الموت لو نزلنا في السيل ولو ضلينا رح نغرق في المطعم بالمويه
ربطوا بعضهم بقوه وساروا يدعوا وقرروا انهم ينزلوا الاربعه مع بعض
ونزلوا يجروا جري لانو السيل وراهم
تقولي تخيلي والله شفت بعيني الجثث تمشي جنبي والسيارات تنقلب بالعوائل وتغرق
والنفق في طريق الملك يموت رعب
تقولي ركبنا زورق الين وصلنا للسياره وطلعنا فوق السياره كلنا الين جات سياره ثانيه اخدتنا شباب سعوديين
وراحوا حسب تعليمات الدفاع للفنادق رفضوا يستقبلوهم من كثر الناس ولانو مافي حجز وماانتم شخصيات مهمه

راحوا لمركز الجمجوم الساعه 12 الليل وطلعوا للدور الثاني المصلى تقولي امم نااااااااااااس كثير
والدور الاول بدا يغرق
وبعدين على الساعه 3 الولد سار يناديهم يقولهم بسرعه لازم نخرج الان الدنيا بتغرق حسب كلام الدفاع
وخرجوا وجلسوا يلفلفوا في الشوارع الين وصلت البيت الساعه 8 الصباح
طبعا بابا حاول يخرج يجيبها الساعه 12 من الجمجوم
بس اختي رفضت قالتله لا تغامر بروحك انا ربي يحفظني بس انته لاتجي مارح تقدر توصلني

والله يابنات اختي تقول الوضع رععععععععععععععععب وخوووووووووووووووف
والعالم تغرق ومااحد قادر يساعد
تقول جنبها رجال في الشارع وهيا تجري يبكي ويصرخ انقدوا مرتي عمال تولد والحرمه تبكي من الولاده وفجاه قدام اختي جاء السيل شالهم

اللهم لاحول ولاقوه الا بالله
وحسبي الله على كل من خان الامانه