اخت زوجي الحيه

قبل الزواج أخت زوجي كانت تكرهني من أول شهر بدون سبب وتحاول تحرض اخوها لايطلعني ولايسفرني ولايكرمني وللأسف كلمتها مسموعه مع العلم انها أصغر من زوجي وأكبر مني. ..
تزوجت وقلت خلاص باعيش حياتي بس للاسف حياتي صارت أسوء بسببها
تخيلو تجي تشتكي لزوجي أن زوجها قالها البسي عبايه رأس وتجلس تبكي عنده وتقوله كل البنات يلبسون عبايه كتف حتى زوجتك وطبعا زوجي المصون على طول يجي يقولي من اليوم انسي عباية الكتف
ومره تتصل فيه تقول زوجي مايطلعني وبعدها اخوها العزوه حبسني فالبيت شهر
ومره اتصلت تبكي تقول زوجي مايسفرني وكنت مسافره وقتها واتخيلو رجعني البيت بسببها
والله حتى المطاعم صارت ترسل اذا عرفت انه بيوديني وتجيب أي حجه عشان يبطل وفعلا أحيانا تنكد علي
ومره طلعنا واتصلت تقول جيب لنا أكل انا واولادي جوعانين وجلست تبكي حسيت انها مااكلت لها شهر الكذابه وزوجي للأسف راح أخذ لهم من افخم مطعم ورجعني البيت عشان ماتدري وتنجرح
حتى أغراض البيت ماتبيني اشتري أي شي مو موجود عندها والله العظيم لدرجة اشتريت شاشه وجلست أيام تسوي مشاكل لاخوها تقول خذو نفس اللي عندي لاتاخذ أغلى! !!
مقهوره يابنات واللي قهرني أكثر انها مرفهه مع زوجها عندها خدامه وتسافر بأستمرار ولبسها أغلى واحلى مني والله يرزقها مااحسدها بس ليش تكذب على اخوها
واللي يقهر أكثر انها ماتشتكي إلا لزوجي من بين اخوانها
قولو لي كيف أتصرف معاها حياتي مربوطه فيها بكل شي زوجي مو راضي يصدق أنها كذابه والله العظيم تعبت لااروح ولااجي ولااعيش مثل الاوادم وهي مبسوووطه لا وفوق كل هذا أي انشوده حزينه أو شيله عن هم الدنيا ترسلها لاخوها وتقول هذي تمثلني وترسل فيسات حزن ودي اذبحها وارتاح
لاتقولون لاتعلمينها بطلعاتك والله بدون مانقول أي شي يسويه زوجها لازم تخلي اخوها يسويه فيه