اخت زوجي عقدتني بحياتي

السلام عليكم ورحمه الله وبركاته
كيفكم يابنات وحريم عالم حواء لكم وحشه ومن العايدين مقدما على حجاجنا وعلى جميع المسلمين والمسلمات
ابيكم تساعدوني بحل مع اخت زوجي الله يهديها صار لها فوق الأسبوعين مبهذلتني من سكنت بمنطقتنا وهي يوميا هذا حالها بقول لكم المشكله وانتو احكمو
اخت زوجي هذي مالي علاقه فيها لانها كانت ساكنه بعيد عننا كثير بس من المشاكل بينها وبين ضرتها زوجها جابها منطقتنا الي هي منطقه أهلها حتي رقمي ماتعرفه وهي اخت زوجي من ابوة المهم بس جات هنا زارتنا ورحبنا فيها واخذت رقمي وتواصلنا وهي طيبه مره مره ودايم تسال وتحاتينا وتسالني ليه ماحملت وكذا وأقول لها اخوك عنده مشاكل صحيه والحمدلله في تحسن كويس بحالته هي مو مقتنعه وكله تقول احد مسوي لكم سحر ومن هالكلام وانا اسلك لها لانه مافي شي واستلمتني قالت لي تعالي نروح لحرمه تفك السحر وتطلع اذا في او لا ومصره ورحت معاها ماابي ازعلها وهي أصرت كثير ورحنا طلعت الحرمه نصابه اول مادخلنا عليها اخذت مني 500 ريال وقالت لي في سحر وهاتي شي من اثرك واثر زوجك مع 3000 ريال وانا رفضت وقلت لها السحر الي بيفكه بالقران مو باثر وخرابيط وطلعنا من عندها واخت زوجي تقول ليه مااعطيتيها وكذا قلت لها شكلها ساحره وطنشنا
يومين فقط وجات لي لقيت وحده تعالج بالقران وردينا من جديد وزوجي مو راضي بس مايبي يزعلها هي اخته الكبيره ويستحي يقول لها لا وانا بعد استحي وهي الله يهديها عقلها صغير وتحب هالشغلات ورحنا للحرمه وطلبت مني بكل جلسه 200 ريال وتقرا علي ومافي شي يتغير وقطعتها بعد 3 جلسات وأقول لها تري الرزق من الله مايصير الي نسويه واليوم من الساعه 6 الصبح داقه علي لقيت واحد يقولو يسوي حجاب عشان الانجاب يااااهو عقدتني بعيشتي وش اسوي معاها من جد سببت لي قلق بحياتي كنت عايشه بروقان واطلع ازور الناس واروح لاهلي من جات وهي يوميا تبي توديني الي هالناس وتكلمني وتعاتبني وكذا انا طفشت وصرت احط الحره بزوجي واخانقه وش اسوي انصحوني ابي حل يخليها تترك هالشي بدون لا اجرحها او ازعلها لانها صراحه مره طيبه ولا ابي اخسرها بس لو تترك هالشغلات تريحنا
ياريت الي عندها حل ماتبخل علي وادعو لي بالذريه الصالحه وربي يحقق امنيه كل وحده بترد علي وتدعي لي ويحرم وجيهكم من النار يارب