اخت زوجي موريتني الويل بعيشتي حسبي الله ونعم الوكيل

السلام عليكم ورحمه الله وبركاته

عزيزاتي بقولكم سالفتي اليوم وش صار وانتوا احكموا وعطوني الحل

كان فيه مناسبه انا وزوجي ودقيت على مطعم فندق وحجزت كل شي
ولمى رحنا جابو لنا كيكه ومكتوبه عليها اسمه وبعدها تعشينا من البوفيه مفتوح
وكان كل شي تمام واخذنا كيكتنا معنا للبيت وطبعا بما ان شكلها على شكل قلب فقصوها نصفين
وكل نصف بكرتون وطلعنا

بعدها رجعنا للبيت وطبعا انا ساكنه بشقه عند اهله
ولمى دخلنا لقيت اخته اللي عمرها 32 توها متزوجه مالها شهر
ولقيت مره اخوه

قال زوجي خذي نص الكيكه اللي بهالكرتون ودخليها على اهلي وخلهم يذوقونها
قلت ابشر ونزلت ودخلت الكيكه عليهم
ولمى فتحتها :06:
صرخت اخته بهذيك الضحكه العاليه قالت كل هذا فقر وبخل ؟
جايبين نص كيكه لنا
قلت انا لا والله مو نص هي كامله بس نص رقيته فوق لزوجي وهذا نص قلت بذوقكم منها
وطلعت جوالي ووريتها الصوره وهي كامله قبل تنقص

قالت لا هذي مصورينها بالمحل وتلعبون علينا يالبخيلين ولمى جت امها تقولها كلي من كيكه هالبخيلين

انا هينا دمعت عيوني قسم بالله يعني هذا الجزاء ؟ ينقلب علي
وعلى فكره اهي من النوع اللي تحب تتريق على زوجي بكثير اشياء قدامي لاني انسانه ما ارد عليها والله العظيم

بعكس زوجات اخوانها الاربعه ماقد تكلمت لاعليهم ولا على ازواجهم لانهم يسكتونها

ولمى قلت لاختي تو قالت ليتك رقيتي ونزلتي الكرتون الثاني وحطيتيه بوجها ورقيتي وسفهتيها
كان تعرف ان الله حق

بنات اهي كل مره تمسخرني انا ماعرف ارد عليها :06:
بس جد مابي اسبب مشاكل مع ان ام زوجي وربي ماعتبرها الا امي وهي تناديني بنتها
بس هالبنت مسببه ازمه لي


كل مره تقولي انتي شكلك صغير ولا انتي اللوك تبعك ولبسك وشعرك يذكرني ببنات الجامعه
علما بان عمري 24 اخواتي يقولولي اهي غايره منك
بس مدري من اصدق
ارشدوني تكفون


تعديل

طيب اشكر كل بنيه ردت علي والله يسهل دروبكم وين ماكنتوا
وان شاء الله نجتمع كأخوات بجنات النعيم قولوا امين

بس بقولكم شي اهي متقصدتني انا ورجلي فاهمين علي
يعني من يقولون سالفه الا تدخل زوجي فيها وتحاول تصغره بعيني مع اني ماشوف فيه هالشي ؟
غير انها تقولي زوجك يافلانه كان يلبس وزار حق اهل جده / طيب وين المشكله ,!
زوجك يافلانه شكله بقره مدري بعير لانه سمين
زوجك يافلانه راح زوجك جا وغيره من الحكي اللي يغث

اهي اسلوبها ينرفز والله يشهد علي ماكتبت هالموضوع الا لاني تعبت من كثر ما اسكت واعدي الموضوع
ابي اعرف كيف ارد عليها واسكتها بنفس الوقت مابي ام زوجي تاخذ بخاطرها لانها والله العظيم ماقد غثتني وماتعتبرني الا بنت لها