اخت زوجي وسلفتي حامل وانا؟؟(((الجز الثاني)))

السلام عليكم يالغاليات كيف احوالكم يابنات حواء


معلش اني تاخرت في الرد عليكم ولكن منعني شئ اقوى مني اليوم الي رفعت فيه الموضوع جاتني الالام فظيعه في ظهري وبطني قويه مااستحملتها رحت منها لطورئ طلع عندي حصوه في المراره ومن المها يالله اتحرك واستفراغ وماتهدى علي الا بالمسكنات وهالحين انا على موعد مره ثانيه مع الجراح حتى يحدد موعدالعمليه وقلت بعد ماخف الالم ادخل اقولكم ليه رفعت الموضوع قبل اسوي العمليه


المهم نرجع لموضوعنا حبيت اشكر كل من دخلت موضوعي ودعت لي وكل من راسلتني على الخاص الشكر الجزيل انتم ماتدرون قد اش فرحت بردودكم ودعواتكم


طبعا الاغلبيه تعرف موضوعي وهذا رابطه تدخله اللي تبي تقراه


http://forum.hawaaworld.com/showthread.php?t=1897571


انا نزلته في شهر رمضان لاني حبيت افضفض لكم وايضا كنت اريد دعوه منكن لان دعوة المسلم لاخيه المسلم مستجابه فما بالك في شهر فضيل وربما يؤمن عليها ملك والله شهيد على ماقول اني كنت ادعيلكم في كل صلاه والي كان يحفزني على ذلك ان( ولك مثلها)



حبيباتي طبعا انا زيكم سويت كل شئ استخدمت خلطات ورحت لمراخات وسويت حجامه واخذت منشطات ومافي شئ ماسويته لدرجة اني كنت اخذ كذا خلطه في الدوره الواحده فصار بطني محل عطار بالاضافه للمنشطات وكله في سبيل انه يجيني الضنى..وكل نصائح البنات الي ردو علي صدقوني ماكنت غافله عنا كنت اسويها ولكن الله ماراد احمل في هذه الفتره



ولكن نسيت انه في رحمان رحيم ارحم بخلقه من هالادويه والاطباء والمراخات واذا اراد شيئا قال له كن فيكون رح اكمل لكم قصتي



بديت بتاريخ18/5اقرء سورة البقره وذلك بناء على كلام شيخ لانه قلتله حلم من احلامي وقالي اقري سورةالبقره كامله لمد ة 15يوم حتى لوجتك الدوره ضع حائر وقريها وارجعي دقي علي وقريتها ودقيت عليه ومارد علي وكل يوم سرت ادق ومايرد تعرفون مفسرين الاحلام دايما ارقامهم مشغوله او مايردون وقلت خلاص بقراها يوميا بنيه الحمل والشفاء من اي شئ فيني سواء عين او حسد او اي شئ وطبعا كامله وبدون انقطاع حتى لو جت الدوره



صدقوني يابنات اني ارتحت عليهاوانتظمت دورتي وصرت اروح لشيخ يقرى علي من فتره لفتره وانا صرت اقرى على نفسي


ومرت الايام الى ان دخل شهر رمضان انا ماقول لكم ا ني في هالفتره تركت الخلطات والمنشطات لا


استمريت عليها طبعا دخل شهر رمضان اول مره يدخل الشهر وانا منتظرته بفارغ الصبر مو عشان المسلسلات ولكن عشان العباده واللجوء الى الله حتى ملابس العيد اشتريتها قبل رمضان وهذه اول مره اسويها في حياتي عشان اتفرغ للعباده



صدقوني كنت اروح كل يوم صلاة التراويح وادعي ربي يرزقني الذريه الصالحه ولا يحرمني كنت انتظر الشيخ في الدعاء الى ان يدعي بالذريه حتى ابكي وآمن وادعي ربي ان لا يحرمني هالفرحه ويفرح قلبي وقلب زوجي بالضنى( اللهم إنك تعلم سري وعلانيتي فاقبل معذرتي، وتعلم حاجتي فاعطني سؤالي، وتعلم ما في نفسي فأغفر لي ذنوبي، اللهم إني أسألك إيمانا يباشر قلبي، ويقينا صادقاً حتى أعلم أنه لايصيبني إلا ماكتبته عليّ، والرضا بما قسمته لي يا ذا الجلال والإكرام)



كنت اكثر من الاستغفار وكل شئ ولكن الدعاء اكثر شئ كنت حتى الفطور اساعد ام زوجي فيه وانوي انه افطار صائم اوصدقه وكنت ادعي عند كل افطار‏ وقلبي يحترق



" يا كريم يا رحيم يا رب العرش العظيم نسألك بعزك الذي لا يرام وبملكك الذي لا ‏يضام وبنورك الذي ملأ أركان عرشك أن ترزقنا الولد الصالح يا مسهل الشديد,و يا ملين الحديد,ويا من هو كل يوم في أمر جديد,أخرجني من ‏حلق المضيق,إلى أوسع الطريق,بك ادفع مالا أطيق ,ولا حول ولاقوه إلا بالله ‏العلى العظيم اللهم فرح قلبي وآنس وحشتي ونفس كربتي وفرج همي وأزل ضيقي وعوض ‏صبري وقر عيني بطفلاً صالحاً معافى ليس في خلقه زيادة ولا نقصان وجعله ‏خيراً لي ومن البارين بي ومن المستغفرين لي عند مماتي وجعله من الصالحين ‏ومن حفظة كتابك الكريم يا رب العالمين آآآآآمين



ونزلت موضعي في المنتدى كنت ابغى افضفض شوي وابي دعوه منكن في هذا الشهر الفضيل.كنت كل شئ اسويه بنيه الحمل



ومرت الايام وبتاريخ 17/9 قلت ابي اشتري تحليل حمل واحلل بالرغم من انه بدري على دورتي لان اخر دوره كانت بتاريخ 25/8 وجبته طبعا دون علم زوجي لاني رحت عند اهلي لان المسجد قدام بيتهم واسهل لي عشان الصلاه وحللت و طلع خط واحد والثاني نقطه ودخلت النت وقريت عنه وقالوا معناه ان الجهاز التحليل خربان او مافي حمل قلت اصلا بدري على التحليل ونسيت الامر ويوم 19/9



وانا رجعه من صلاة التراويح وفرحانه اقول لخواتي اليوم نروح نصلي التهجد الا احس شئ نزل مني قلت في نفسي افرازات واروح الحمام امسح الا القاها الدوره اول ماشفتها انصدمت ولكن قلت والدموع في عيوني الحمدلله انا لله وانا اليه راجعون اللهم اجرني في مصيبتي واخلفني خير منها وكان زوجي عندنا رحت اكلمه الا الدموع تنزل من عيوني قالي وش فيك قلتله جاتني الدوره قالي خوفتيني على بالي في شئ وقعد يقولي انتي مؤمنه وعادلي نفس المحاضره الي يقولها في كل مره ورجعت معه البيت لان العذر الي عندي الصلاه وراح مع الدوره

طبعا نمت وقمت الظهر عشان اسوي لي دله قرفه لان دورتي كانت غريبه انا بالعاده دورتي تنزل دم لكن هذه الدوره دم خفيف مع افرازات بنيه قلت اشرب قرفه عشان تنزلها ورحت المطبخ واسوي الدله ووديتها غرفتي ونسيت الكاسه وارجع ابي اخذها الا القى ام زوجي في المطبخ تبي تسوي فطور استحيت اطلع واخليها تشتغل لحالها وقمت اساعدها واجتهدت وصرت اتحرك في المطبخ كثير قلت عشان تنزل الدوره واحتسبت الاجر في الفطورواعتبرته افطار صائم
ومر الوقت وماامداني حتى ابل ريقي بمويه الى ان اذن المغرب كأن الله صادني عن القرفه واروح الحمام الاالقى الدم خف مره قلت لزوجي خلني اروح احلل قالي كيف فيه حمل وانتي جاتك الدوره قلتله دورتي هذه غريبه خلني اتاكد عشان اطمن ونروح نحلل وقاللولنا انتظروا نص ساعه قلت لزوجي خلنا نروح ناخذ اكسسوارات لي للعيد على بال ماتطلع النتجه قال خلص ورحت السوق وحنا راجعين قالي زوجي ماتبغين تدقين تشوفين النتيجه وانا ناسيه قلتله تصدق نسيت وادق وتكلمني الممرضه واسألها عن النتيجه الا تقولي ماما


؟


؟


؟


؟


؟


؟


؟


؟


انتي






حــــــــــــــــــــامــــــــــــــــــــــــل





انا ماصدقت ووقفلت الخط الا اقول لزوجي تقول حامل وانا ابكي ماني مصدقه وقال الحمدلله بس تذكرت الدم وراحت الفرحه وقلت شكلي بسقط قال زوجي خوذي المثبتات زي ماقال الدكتور والي كاتبه الله حنا راضين فيه طبعا اخذت المثبت يومين كذا ووقف الافرازات البنيه والدم ورحنى المستشفى عشان نطمن على الحمل وانه ىداخل الرحم وطمنونا وصارت حياتي طبيعيه ولكن ماعلمنا احد لان الشيخ الي يقرى علي قالي اذا حملتي لا تعلمين احد الى ان يثبت الحمل وزوجي حلفني حتى اهلي مااقولهم



وجى العيد وتعرفون في الجمعات وخاصه في استراحه تكثر الحركه دخلت الحمام الا القى دم يوم شفته بغت تجيني جلطه طلعت بسرعه ودقيت على زوجي وطلعنا من الاستراحه وطبعا عيد مافي مستشفيات ورجعنا البيت وقعدت منسدحه على ظهري ومااقوم الا اصلي وادعي وابكي بس صرت حريصه على الاذكار صباح ومساء واكون دائما على وضوءوطبعا مازلت مستمره على سورة البقره ماتركتها من يوم بديت فيها وشربت نشاء مع المثبت يومين ووقف الدم وارتحت وبعدين رجعت حياتي طبيعه امشي واشتغل وكل شئ اسويه ماعدى الجماع وماحد يدري اني حامل والي ساعدني ان بطني مابان صغير

اهلي مادروا الا وانا في داخله الخامس واهل زوجي وانا دخله السادس والي فضحني بطني صارباين


علمتهم وانا خايفه بس اتكلت على ربي وماتركت الاذكار والبقره والرقيه صرت اروح للشيخ في الشهر مرتين ومابي منكم يابنات حواء تزعلون مني لاني ماقلتلم خفت اقولكم ومايتم حملي وافرحكم وازعلكم في نفس الوقت وادري انكم مقدرين موقفي كنت اتابعكم وكل مره اكتب موضوع عشان ابشركم بحملي ولكن ارجع امسحه خوفا على حملي كان ودي اشكركم لانه يمكن حملي بسبب دعوة وحده منكن آمن عليها ملك


ومرت الشهور ودخلت 7و8و9 ثم











جاء احلــــــــــــــــــى




عبــــــــــــــــــدالرحمـــــــــــــــــــــن




لانه رحمه من ربي بحالي يارب يابنات حواء مايحرمكم ربي الفرحه الي عطاني ايها فديته قاعد يرضع جنبي هالحين


يارب اني استودعك طفلي امانه فاحفظه لي من اعين الانس وانفس الجن وارزقه الصحه والعافيه



يارب ‏" يا كريم يا رحيم يا رب العرش العظيم أسألك بعزك الذي لا يرام وبملكك الذي لا ‏يضام وبنورك الذي ملأ أركان عرشك أن ترزق بنات حواء وقسم تاخر الحمل الولد الصالح يا مسهل الشديد,و يا ملين الحديد,ويا من هو كل يوم في أمر جديد,أخرجهن من ‏حلق المضيق,إلى أوسع الطريق,بك ادفع مالا أطيق ,ولا حول ولاقوه إلا بالله ‏العلى العظيم اللهم فرح قلوبهن وآنس وحشتهن ونفس كربتهن وفرج همهن وأزل ضيقهن وعوض ‏صبرهن وقر عينهن بطفلاً صالحاً معافى ليس في خلقه زيادة ولا نقصان وجعله ‏خيراً لهن ومن البارين بهن ومن المستغفرين لهن عند ممات وجعله من الصالحين ‏ومن حفظة كتابك الكريم يا رب العالمين آآآآآمين




بنات انا في الاربعين يعني باقي نفاس هالحين ومهدده بعمليه مراره لاني في اليوم 24 من ولادتي جاتني الالام في بطني وظهري وطلعت حصوه في المراره ادعولي اني ماروح لموعدي الجاي الا راحت لحالها بقدرة الله والله اني ابكي دايما كيف نفاس وعمليه في نفس الوقت ولكن يمكن لاني تركت قراءة سورة البقره ولكن برجع اقراها انا هالحين لي30 يوم والده ولكن الحمدلله على كل حال اللهم اجرني في مصيبتي وخلفني خير منها


وهذه قصتي واشكرخاصه كل من راسلتني على الخاص ودي اذكرهن ولكن خايفه انه ماودهم......

اوصيكم بسورة البقره لاتقولون حنى فينا مرض عضوي مو عين هي شفاء من كل داء حتى لو موعين فمفعولها عجيب اولا انتظمت دورتي ثم الحمل ثم ثباته والدعاء الدعاء وكتبت لكم التواريخ عشان تشوفون قدرة الله انه ماجى التاريخ الي بديت اقرأ سورة البقره فيه من السنه الي بعدها الا وانا والده حتى اعطيكم دافع لقرائتها وان شاء الله مايجي اليوم الي بديتم تقروها فيه الا واطفالكم بين ايديكم وعلى دعاويكم ماجى نفاس سلفتي الا وانا كرشتي قدامي وصار الزوار بدل مايقولون الله يرزقك صاروا يقولون مبروك الله يتمم لك


وصدقوني يابنات انا كنت مثلكم كنت اتمنى الضنى الي اضمه لصدري واقول معقوله بيجي هذا اليوم معقوله بشيل طفلي بين يديني واسبحه واغسله والبسه معقوله كان كل ماشوف وحده حامل اقول بتصير لي كرشه زيها كل مااشوف وحده شايله بيبي اقول متى اشيل انا بعد متى اشوف حبيب قلبي زوجي شايل طفلنا ويلعبه متى اشوف هالفرحه في في عيونه متى نروح محلات الالعاب عشان اشتريله لعبه متى متى؟؟؟؟؟؟

الى مااكرمني الله وان شاء الله يكرمكم ويعطيكم الي يثلج صدوركم بس كل ماشفتي كذا ادعي وان شاء الله يستجاب لكم

وعلى فكره حنى احسن من غيرنا لانى كذا نحس قيمة الضنى فصرت كل ماشوف ولدي احمدالله ماصدق ان صار معي ولد واهتم فيه اكثر واحبه اكثر واخاف الله فيه اكثر



اللهم إنك تعلم سري وعلانيتي فاقبل معذرتي، وتعلم حاجتي فاعطني سؤالي، وتعلم ما في نفسي فأغفر لي ذنوبي، اللهم إني أسألك إيمانا يباشر قلبي، ويقينا صادقاً حتى أعلم أنه لايصيبني إلا ماكتبته عليّ، والرضا بما قسمته لي يا ذا الجلال والاكرام