اخر تطوراتي مع زوجي.. بعد الضرب والبعد وقلة الحياء..

السلام عليكم
اول شي اشكر كل البنات اللي ردوا علي
واللي ارسلوا لي خاص واللي سألوا عني
اعذروني والله ما اقدر ارد على كل وحدة لحالها
بس دعيت لكم بظهر الغيب بالتوفيق والسعادة


اخر التطورات..
كلمني زوجي وانا ببيت اهلي
سلم وسأل عني وعن ابنه..
بعدين قال: وانا ماتبين تعرفين اخباري؟
قلت: طيب كيفك؟
قال: والله لي يومين ما اكلت شي..
واقسم انه نام بالمجلس ولا دخل الغرفه
يقول مالي وجه ادخل غرفتنا وانتي مو فيها!
المهم جلس يحاول يكسر خاطري
وانا مو معبرته وساكته..
قال : طيب خلينا نتناقش..
قلت له: ارجوك بلا نقاش بلا بطيخ.. يكفي نكد..
بس هو اصر يرجع للسالفه ويناقش..
وجلس يبرر الاسباب اللي خلته يفقد اعصابه..
وانا هنا لاشعوريا انفعلت مره من كلامه..
وقلت له بعصبيه: انت لو رجال ماتمد ايدك..
بس الرجوله شرق وانت غرب.. يا واطي ياحقير الخ


ادري بتلوموني والمفروض اخليه غلطان 100٪
بس هو استفزني واجبرني نرجع نتكلم باللي صار..
طبعا بعد ما شتمته قال: ها عساك ارتحتي الحين؟
قلت له: هذي الحياه اللي تبيها يامحترم؟ سب وضرب؟

ما اطول عليكم..
جلس هو يتعذر..
وانا قلت له من الاخر: انا برجع عشان ولدي مو عشانك..
وسألني عن اهلي.. قلت له تطمن ماعلمت احد..
هو ارتاح مره لما قلت كذا.. قال: كنتي بتخوفيني بس؟
قلت: لا كنت جاده وابحسسك ان كل اللي بينا انتهى..
بس ماعلمت ابوي لانه لو درى بيتوطى ببطنك..
لا ودي تنهان لانك ابو ولدي.. فقط لا غير..



المهم بنات.. اتفقنا على وقت..
جا وركبت انا وولدي السياره عشان نرجع..
وللامانه اول مرخ اشوف وجهه كذا..
سوااااااد حول عيونه وشفايفه بيض..
وعلى فكره هو معه الضغط زي ماتوقعتوا..
وبنفس الوقت يجيه رعشه وخفقان بالقلب اذا عصب..
وكان عامل تخطيط قلب من مده..
المهم..
دخلت البيت وهو يرحب ويهلي وانا مطنشه..
ولقيته مرتب كل الكركبه والحوسه اللي بالبيت قبل طلعتي..
ومعبي المطبخ والثلاجة اغراض ومقاضي وحلويات الخ..

نزلني وراح جاب عشاء..
ورجع يحاول يسولف وانا مالي خلق
وجلس ينكت وانا ساكته واضغط بجوالي..
ناظرني وقال والدمعه واقفه بعيونه: ثقلانه علي بزياده..

وجلس يطالع التلفزيون لحد مانعس ونام بالصاله..
وانا اخذت ولدي وغيرت له ورضعته ورحت نمت معه بالغرفه..


علما بانه قال لي بكرا اباخذك السوق اشري لك اغراض انتي والولد..
وقال: انتي وانتي محتاجين فتره نقاهه عشان نرجع شهر العسل..
قصده نسافر برا.. لاننا كنا متفقين الشهر الجاي نغير جو اسبوعين برا..
لكن انا الحين مو طايقته لا هو ولا سفرته..

وهو اصلا ماكان متوقع ابدااااا اني برجع بعد اللي صار
بدون شروط ولا ضمانات ولا رضاوه ولا فضايح ولا شي..
هو للحين مو مستوعب ويحسب براسي شي..

بنات انا ضايق صدري..
وفيني شي غريب.. يعني قرفانه منه
بنفس الوقت فرحت لمارجعت بيتي..
احب بيتي وغرفتي وسريري.. بس هو مو طايقته..
لدرجة اقول ليته يسوي حادث ويموت واعيش لحالي مع ولدي بهالبيت.،
بنفس الوقت حاسه بوجهه ذل وانكسار عاجبني مرررره..
ليته يستمر كذا..
الخين هو بدوامه مدري اذا رجع وش بيصير
حسبي الله ونعم الوكيل