اخصائيين اجتماعيين بحاجة الى اخصائيين اجتماعيين !

كثرة القنوات الفضائيه وكثرة البرامج الحواريه فيها على مدار الساعه يجعل هناك طلب كبير على المتخصصين في جميع المجالات ، هذا الطلب قد يتسبب باستضافة اناس ليسو بذاك الاتقان في مجالهم ولكن لضرورة ملىء وقت البث تتم استضافتهم ليهببو ويخبصو ويرمو بلاهم علينا

واليكم مشاهدتين من تخبيص وتهبيب من انتسبو ظلما وعدوانا الى مهنة الاخصائي الاجتماعي

===============

القناة الثانيه السعوديه ، برنامج حواري كان يناقش اثار الانترنت ويستضيف اخصائيه اجتماعيه سعوديه والمشكله انها بنت حموله معروفه
المذيعه تستفسر من الضيفه وتقول ابن صديقتي تعرف من خلال الانترنت على فتاة اوروبيه واحبها وتعلق بها ويقول لاهله انه بعد ان ينهي دراسته الجامعيه سوف يهاجر ليبقى بالقرب من حبيبة القلب فما هو الحل
واجابت بنت الحمايل بجواب عجيب وقالت ان منع هذا الشاب من محادثة حبيبته سوف يؤدي الى زيادة تعلقه بها ، لذلك دعوه يطق حنك معها ويسولف ويهمق لما تطق تسبده همن يمل ويخليها وان استمر التعلق بها فيحبذ بالاجازه الصيفيه ان تذهب العائله في رحلة الى بلد هذه المحبوبه الشمحوطه وتتعرف العائله عليها ويسولف معها هذا الشاب المملوح على الطبيعه ويطقها معها صداقه بمباركه العائله وساعتها بيتركها لان كل ممنوع مرغوب وبما انه الشي ما صار ممنوع فهو مب صاير مرغوب <<<<<<<< قولي والله ؟ قسم بالله يا شيخه ؟ عسا ما تكلفتي بس ؟ عسا ما جاك فتاق بمخك يوم طلعتي ذا الحل العبقري ؟ ما اقول الا الله يخلف على امك


================

تلفزيون الكويت ، برنامج يتحدث عن تعامل الاباء مع الابناء والضيف برضه اخصائي اجتماعي واستلمو كلامه العجيب :
يقول الاب والام لازم ينزلون لمستوى تفكير ابنائهم عشان ينالو ثقتهم ومحبتهم ويقدرون يوجهونهم التوجيه السليم بدون اصطدام ، مثلا الاب يعلم ان ابنه يدخن بالسر فغلط انك تنصحه او تهوشه ، المفروض وانت جالس معاه تقوله هاه ابو الشباب دخنت اليوم ولا توك ؟ اذا قال لا ما دخنت ، المفروض انت تقوله يالله طلع البكت واشرب اليوم انا سامح لك تشرب 10 سجاير ، الولد ساعتها بيستانس ويقول هذا خوش ابو هذا مخه فري ويبدا يحبك وانت بدورك سوي معاه تكتيك انك تقلل له عدد السجاير الي تسمح له فيها كل يوم لحد ما يبطل باقتناع وبدون ما يكرهك وبتكسبه صديق ! <<<< اي صديق واي بطريق اذا بتخلي الابن بيدخن قدام ابوه اجل من ورا ظهره وش بيسوي ؟ :30:

ويكمل اخينا تخبيص ويقول اذا الام عرفت ان بنتها تعاكس في التلفون ، المفروض ما تقول لها شي وتعرف ان بنتها ناقصها الاشباع العاطفي ولازم تشبعها وترضي غرورها عشان تنال ثقتها وتحس انها تفكر نفس تفكيرها وساعتها ما تكون بحاجة المعاكسات ، يعني مثلا اذا في يوم حبت البنت تطلع للسوق قبل تطلع لازم الام تختار لها لبس حلو وتخليها تسوي مكياج لافت للنظر ، وتمشي معاها في السوق وتقول الله وش حلاتك يا بنتي خبصتي السوق خبص وكل الناس قامو يطالعونك ! شوفي هذاك ما طيح عينه عنك !! وشوفي هذا مسكين تخسبق يوم شاف زينك !!!! <<<<< ونعم التربيه ونعم الاخلاق ! الام مدرسه وانت تبي تخليها مسخره وين الفضيله وين الحشمه يوم انك تبي الام تعرض بنتها بالسوق عشان تشبعها عاطفيا قل امين يا علك الذيب الي يعرمشك ولا يشبع
:mad:
===============

وعشان لا تطلع لنا المزيد من هذي العاهات اقترح على كل قناة تلفزيونيه انها توظف اخصائي اجتماعي يتخصص فقط في الكشف على ضيوف البرامج الحواريه من الاخصائيين الاجتماعيين ليضمن لنا سلامة عقولهم قبل يطلعون لنا على الهوا
منقووول...