اخطائي الزوجية وكيف استفدت منها

السلام عليكم
الصراحة استفدت منكم كثير اخواتي وحابة تستفيدو من بعض تجاربي
اول ما تزوجت كنا نحب نشرب شاي الصباح مع بعض . اعمل الشاي واخذه على غرفة نومي وهو بيجهز نفسو للشغل وانا اقعد استني انو يخلص ويجي علشان نشرب الشاي وهو يطول في التجهيز وانا من جوة اغلي من الغيظ لاني احب اشرب الشاي ساااااااااااااخن مرة وهو على العكس يشربو دافي وانتظر على اساس حنشرب مع بعض ونتيجة الانتظار اني اشرب الشاي بارد ومرات نقلبها مشكلة تعال اشرب الشاي خلاص برد وهو ولا على بالو .يعني بدل ما نشرب برومانسية مع بعض تكون مشكلة.وبعد كدا اتعودت اني ما انتظره اعمل الشاي واناديه وانا اشرب شاهيا وهو يجي يشرب على مهلو . منها استفدت ان كل واحد منا له طبايع مختلفة كليا عن الاخر وهو مولازم يكون طبق الاصل عني ولا انا وكمان استفدت اني ما ا
اترك نفسى اعمل الشي الذى احبه انا وفي نفس الوقت ما افرض عليهو انو يكون مثلي.
حاجة تانية اول ما تزوجت كنت اظن ان الحب معناهو انو انا وهو نفس الشى يعني واحد ومع مرور الزمن اكتشفت انو ما كل ما في نفسك تبوحي له به لازم في اشياء تفضل جوا ماتخرج ابدا يعني اذا انا متضايقة منو ما اقول كل شي جواي لانو ساعة الغضب ممكن تقولي كلام جارح ويفضل اثر عميق من وراه.
وكمان في مشاكلي مع اهلو كنت اجي احكي له على اساس ياخذ لي حقي من اهلو وهو ما يدخل نفسو في الموضوع وكانت تحصل مشاكل كثيرة بسبب اهلو وانا طبعا كنت اظن انو اهم شي عندو اهلو وما يحبني لانو ما يدافع عني (لاني كنت صغيرة في السن) بس الان عرفت انوما كان يتدخل لانو ما يحب يخسر كل الطرفين انا زوجتو وهذي اختو فيصعب عليهو التدخل بينا وهو على حق فتعلمت اني اخذ حقي بيدي من غير ما ارجع له من غلط عيا اوقفو عند حدو وبذلك صارو يحترموني ويعملو لي حساب من غير ما ادخل زوجي .