اخواتي استشاره عاجله تكفون تعبت ونفسيتي أسوء

السلام عليكم
اخواتي الغاليات حبيت استشيركم لان فعلا ماخاب من استشار باذن الله
انا محتاره ونفسيتي جدا سيئه من هالموضوع
بقول لكم سالفتي بالتفصيل وياليت ماتحرموني من رأيكم
انا لي سنتين اعاني من نزيف مستمر ينقطع كم يوم ويرجع مع العلم كنت مركبه لولب نحاسي وجلس فيني سنتين وبعدها حسيت انه تحرك وشلته
ومن بعدها اعاني من النزيف ينقطع كم يوم ويرجع استخدمت اعشاب وحبوب يخف لكن مستمر
لين تعبت وسبب لي كآبه وفقر دم وضعف
رحت مستشفى قوى الامن في الرياض واخذوا اشعه
وخذوا مني عينه ومسحه من عنق الرحم وقالوا لازم نعمل لك عملية كحت للرحم هي الحل الوحيد لان السبب سماكه في بطانة الرحم.
فعلا سويت عملية الكحت وتنومت يومين بسبب ارتفاع ضغطي
بعدها عطوني موعد عشان يناقشوني في نتيجة العمليه
جاء الموعد ورحت لهم وكلي امل بالله سبحانه
قابلت الدكتوره والاستشاري اللي سوى العمليه لي
صدمني بكلامه واسلوبه والله يااخواتي حسيت قلبي بينفجر منه ضغطي كان مرتفع من التوتر والقلق وهو شاف بنفسه في ملفي ان ضغطي مرتفع وشايف ولدي مدخلني بعربيه بسبب الدوخه والصداع لان ضغطي مرتفع
ومع كذا تكلم بكلامه بدون اي احساس وببرود تام
قال العمليه سويناها لكن اكتشفنا اثناء العمليه وجود خلايا نشطه ووممكن تتحول الخلايا الى سرطانيه اذا ماعالجناها قلت طيب ايش الحل
قال لك حلين يا اما تاخذين حبوب واسمها بريمولوت مدة ٣ اشهر مع العلم تاخذينها في الشهر ٣ اسابيع واسبوع لا خلال ال ٣ اشهر وبعدها تجينا ونشوف النتيجه
الحل الثاني : نركب لك لولب هرموني ونفس الشي تجينا بعد ٣ اشهر ونشوف نتيجته بعد ان مانفع نستأصل الرحم...
انا انصدمت كان يقولها بكل برود وبعدين ايش دخل الحبوب واللولب الهرموني في الخلايا النشطه.
خفت توكلت على الله واخترت الحبوب وبديت فيها
لكن اخواتي لما سالت وحده تراجع عند دكتوره وسالت دكتورتها وعلمتها بكل حالتي قالت لها اصلا المفروض
ماطلبوا انها تاخذ الحبوب لان الحبوب تزيد نشاط الخلايا
وعلى طول يستاصلون الرحم اذا فعلا كلام اللي قلتيه عن صديقتك صحيح
وعندها عيال وماتفكر تحمل فالافضل تشيل رحمها لان الرحم فقط للحمل وماله اي فائده أخرى
اخواتي وش رايكم والله خايفه مابي استأصل رحمي ومدري كلامهم صح او لا ووش دخل الحبوب واللولب في الخلايا وهل فعلا حبوب بريمولوت تزيد نشاط الخلايا
انتظر اجاباتكم علي احر من الجمر