اخواتي مادري تصرفي صح ولا غلط

السلام عليكم
عدد اخوان زوجي ٥ وكلهم متزوجين ماعدا واحد فقط عمره ٢٨ سنه المهم
ابو زوجي وام زوجي وخوات زوجي ثنتين مو متزوجات وحده اخر سنه بالجامعه والاخرى في ٣ ثانوي
دائما المسؤل عن تسفيرهم زوجي المصون مع اخوه الغير متزوج ويفضل زوجي يخلي سفراتنا وحده منها صعبه يصرف على سفرت ابوه واهله ثم يصرف يسفرني الحالي فخلانا نروح سوى اوفر له ومنها يوسع صدر اهله الدرجة انه لو بنسافر وحدنا صار زوجي يكذب عليهم انها سفرت عمل وهو الحاله وما اخذني معاه وانا اساسا معاه عشان مايزعل ابو زوجي ويقول ليش ما اخذتونا
بعدها انا قررت بيني وبين نفسي انه خلاص اتنازل عن السفر عشان مااسببله احراج مع اهله وخليته يسافر الحاله يوديهم وانا ريحت بالي وصرت ما اروح معاهم ولا اسافر معاه الحالنا تطور الامر هذي السنه صار اذا بيسافر ياخذ اطفالي معاه اذا جا يسافر مع اهله ويقول تبي تجين معانا حياك الله ماتبين براحتك مرات اروح ومرات اعتذر حسب المزاج
طبعا انا اليوم فتحت الموضوع مع زوجي بعد ١٢ سنه زواج اول مره اتجرئ افاتحه في موضوع اهله
قلت متى ناوي تسفر اهلك ان شاءالله قال بعد اسبوعين ثم قال والله مليت ومسؤلية وتعب ومالي خلق اوديهم هذا غير الصرف اللي اصرفه لكن ابوي واخواتي يبون يغيرون جو ومافيه غيري انا واخوي نوديهم الباقي شايلين يدهم قلت اسمع يافلان الصراحه الموضوع ممل انا لي سنوات مكبره راسي ومابي اقولك لكن انا مليت لازم يصيرلنا خصوصيه نسافر الحالنا زي الناس واخوك فلان (اللي مو متزوج) هو يوديهم ومسؤل عنهم مادامه معاهم بالبيت وبس يتزوج تصير دوريه كل واحد من العيال يتنازل ويمشي الوالد مو انت كل شي فوق راسك انا تعبت مليت لازم تعود فلان الحين يمسك المسؤلية بدالك انت ماقصرت ابي خصوصيه مو اذا جينا نسافر الحالنا تقل مسوين جريمة لازم يتعود الوالد واهلك شوي شوي ان اخوك يشيل المسؤلية عنك موظف وراتبه نفس راتبك واحسن واذا على الصرف عطه فلوس ساعده بالي تقدر عليه
لكن مو لازم تروح انت والبزران وانا تقل رجل كرسي في هاالبيت تبين تجين تعالي ماتبين براحتك تراني متضايقه وحازه في قلبي وممشيتها مابي اضيق صدرك لكن الحل موجود اخوك ماراح يقصر وموجود وساعده انت واخوانك بالي تقدر عليه
اقسم بالله صرت اتنرفز اذا خواته قالو فلان بيسفرنا اللي هو زوجي تجين معنا ولالا واذا جيت تقل ضيفه وبتمشين على نظامهم واذا كبرتي راسك وجلستي ظيم وقهر الدرجة اطفالي صارو يروحون وانا عند اهلي لانه مااخذ راحتي معاهم رغم انه كثير مررره رحت معاهم وتنازلت واسكت لكن جد اخواتي هل فيه امل يتغير زوجي ويخصصلنا شوي من وقته بدون مايتحسس والله ان اخو زوجي الغير متزوج يقوله لاتجي اذا مالك خلق مو لازم لكن زوجي الله يهديه هو يقترح ويواعد وهم تعودو عليه ونسى ان في زوجة تبي وتحتاج لكن يارب بعد كلامي يتغير ويصحصح شوي ويلتفت الزوجته واسرته شوي بدون مايهمل اهله انا ما ابيه يهمل اهله لاوالله لكن لاضرر ولاضرار الوسطيه زينه
تخيلو من ١٢ سنه اول مره افتح معاه هالموضوع رغم انه مضايقني من زمان لكن انا متى قررت اتكلم وقت ماقال باخذ الاطفال معاي قبل صحيح يسفرهم لكن بزراني عندي اما الحين مستحيل يمر يوم ما اشوف اطفالي والله ما اتحمل وقلت بكرا تصير عاده وانا رجل كرسي بالبيت اتحركي اتكلمي قولي وتجرأت وفتحت معه الموضوع انا كنت اخاف يفكرني احرضه على اهله عشان كذا كنت اتحاشى افاتحه في الموضوع لكن الحمدالله احس اني ارتحت يوم تكلمت تدرون قبل كم يوم كنت كاتبه لكم الموضوع وانه بياخذ اطفالي معاه ومضيق صدري الموضوع لكن الحمدالله انه طلعت اللي بقلبي وتكلمت واخواتي رايكم بالسالفه كامله وهل انا معاي حق ولالا