اخوكن في الله محتاج مشورتكن ودعائكن,,عاجل وهام

بسم الله الرحمن الرحيم

اخواتي الكريمات السلام عليكن ورحمة الله وبركاته

اولاً ساعتذر منكن مقدماً على ركاكة اسلوبي وردائة تعبيري في هذا الموضوع بسبب تشتت الفكر وإنشغاله ولاني ساكتبه بالعامي وعلى عجاله.

ابي مشورتكن ونصيحتكن في موضوع مشغلني ومتعب تفكيري

انا شاب عمري 32 سنه ومقدم على زواج وماكان في بالي الا وحده من قريباتي وكنت متردد في الخطبه لسببين: السبب الأول فارق العمر بيني بينها عمري 32 سنته وعمرها مابين الـ 20 و 21 .. والسبب الثاني راح تعرفونه من خلال الموضوع.

بعد مشوارات بشكل غير مباشر واستخارة توكلت على رب العالمين واقدمت على الموضوع. وبحكم ان ام البنت قريبتي ومن محارمي وبيني وبينها تواصل مستمر وعلاقتي بها ممتازة جداً كلمتها في الموضوع واسعدتني ردت فعلها وتجاوبها وقالت لكن العلم عند البنت ولازم أشاورها وأرد لك قلت هذا شي اكيد ومفروغ منه.

انا تقريباً كنت جازم بأن الرد راح بالموافقه والقبول لعدة اسباب منها على سبيل المثال
أني ولله الحمد وما أقول هالكلام مدح في نفسي رجال اخاف الله ومحافظ على واجباتي الدينية
مركزي الوظيفي ممتاز ولي مكانتي بين الاهل والأقارب وسمعتي ولله الحمد ممتازة
علاقتي بأهل البنت لا من ناحية الأب ولا من ناحية الأم ممتازة جداً وبحكم ان ماعندهم ولد كبير صاير كأني ولدهم وأعتبرهم مثل أهلي واقضي لهم الكثير من الحوائج ومتواصل معهم بشكل مستمر.

كل هالامور خلتني اتوقع القبول وبشكل كبير. لكن تفاجأت بالرفض بسبب أن البنت تقول مو قادره أستوعب انه يكون زوجي وأنا ما اعتبره الا اخوي الكبير.

انا في بداية الامر عذرت البنت لاني كنت احس بنفس الاحساس لما بديت افكر فيها كزوجه وهذا هو السبب الثاني اللي قلت لكم عنه في أول الموضوع. ماكنت متقبل الفكره لاني اعتبرها اختي،، لكن مع كثر التفكير بالموضوع ووالنظر له من جميع الجوانب اقتنعت جداً بالفكره لدرجة اني تعلقت. فلما بلغني الرد من الأم قلت لها انا مو مستعجل على الرد وماراح أعتبر الرد هذا نهائي. عيدي الموضوع عليها مره ثانيه وخليها تفكر بشكل جدي وتنظر للموضوع من جميع الجوانب وانا يعلم الله اني شاريها ولا أبي غيرها.

للأسف جاني الرد للمره الثانية بعد فنرة نفس الرد الاول. وانا عجزت اقتنع بالسبب وحاولت أتأكد من الأم اذا كان فيه سبب ثاني مقنع أو لأ .. لأن السبب هذا مو مقنع ولا يمكن اني اتنازل علنها علشان هالسبب. اذا كان فيه سبب ثاني خبروني علشان أقل شي أقتنع وأنسحب بكرامتي. لكن الأم مصره وتحلف انه مافيه غير هالسبب وانها تتمنى اليوم قبل بكرا ان بنتها توافق لأنها على حد تعبيرها ماراح تحصل افضل مني لبنتها لكن في نفس الوقت تقول ما أقدر اجبرها.. وانا اساساً رافض فكرة الاجبار. ابي الموضوع يتم بإقتناع تام.

قبل كم يوم دخلت طرف اخر في الموضوع بعد ما أستأذنت الأم لعل وعسى يقدر يأثر على البنت ويقنعها وتغير رايها وإلى الآن ماجاني رد.

انا طلبي منكم يابنات حواء حاجتين:

الحاجة الاولى تشيرون علي وتوجهوني وش الأمور أو الأشياء أو الوسائل أو السبل اللي من خلالها اقدر أأثر على البنت لعل وعسى تغير رايها وتقتنع. وش في يدي أقدر اسويه لجل أغير رايها. انا من كثر التفكير تعلقت فيها مابي غيرها وماني قادر استوعب انها تكون لغيري. مع اني مؤمن ومقتنع انه في النهاية ماراح يصير الا ارادة رب العالمين سبحانه. لكن هذا ما يمنع من الفعل بالأسباب. وانا اللي اسعى له الأن هو اني افعل بالأسباب قدر المستطاع وما أترك طريق ما أسلكه في مجال اقناعها وتغير رأيها. فلا تحرموني من مشورتكن يابنات حواء. انا ما كتبت الموضوع في هذا المنتدى الا لأجل المشورة والبحث عن طريقة للتأثير عليها والبنات اكثر دراية ببعضهن.

الحاجة الثانية لا تنسوني من دعواتكم الصادقه بان الله ييسر لي أمري وأمور المسلمين أجمعين وأن يتمم موضوعي على خير. ارجوكن يابنات حواء لا تبخلن علي بدعواتكن الصادقه فثقتي بالله كبيره وهو سبحانه السميع المجيب

وختاماً اكرر اعتذاري على ركاكة الاسلوب وردائة التعبير بسبب الفكر المشغول والمشتت

وللجميع مني كل التقدير والإحترام