اخووووووووووي صدمني فيه ........

السلام عليكم

ابغي ابدا في الموضوع بدون أي مقدمات راجيه منكم انكم تلقون لنا حل سريع لانها مش مشكلتي انا
هي بصراحه مشكله العايله كلها تقريبا ويمكن ما تخص أي واحد فينا لكن الطرف الرئيسي فيها شخص عزيز علينا ومانقدر نشوفه على هالحال ..

انا عندي اخ عزيز وااااااااااااايد على قلبي ويهمني امره مثل ما يهم امي وكل اخواني واخواتي
اخوي هذا ما شاء الله عمره الحين 36 سنه وقريب داخل على الـ 37 ان شا ء الله

المهم مشكله الاخ هذا انه ما يفكر ادنى تفكير بشي اسمه زواااااااااااج ..
مع انه ناجح جدا جدا في حياته وله بيته المستقل ومشاريع وشركه واشغال خاصه فيه
يعني الناحيه الماديه عنده اكثر من ممتازة ولا تساوي مصاريف العرس عنده شي ..
من ناحيه ثانيه اقدر اقول عنه اطيب ما خلق ربي في هالكون ..
صدق يا بنات والله اني ما شفت مثله في طيبه .. يعني حنوووووووووون بشكل فضييييع وعاطفي ما يحب يشوف احد متضايق وغير عن جذا تعامله مع الكل ممتاز وما فيه احد يكرهه بالعكس كل واحد يتمنى له الخير ومزوحي يحب السوالف وهادي في نفس الوقت ومتسامح وكريم مع كل حد ..
وحتى شكله ما يبين عليه ابد ان عمره 36 سنه .. واللي يشوفه يعطيه في اواخر العشرينات وما فيه أي عيب شكلي ولله الحمد ..
ومن عايله معروفه بالامارات وكل وحده تتمناه ..
حتى فيه بنات ما ينعابن يقولونها لي صراحه دليه علينا نحن نبغيه لكن شو اقدر انا اسوي وهو رافض الفكره تماما
انا هالاخ بالذات احبه وااااااااايد ولا اقدر استغنى عنه .. وبعده عنا يوم والله يسبب لنا الضيق خاااصه لامايه لانها متعلقه فيه واااااااااايد لانه الوحيد اللي باقي عندها بالبيت وكلهم متزوجين وعندهم عيال كبار مع انه مش اصغر واحد فينا ..
اخوي هذا كلما قلنا له بنخطب لك قال مابغي
نقوله اوكي مو لازم من العايله مع ان كل بنات العايله يتمننه لكنه مصر انه ما يبغي يتزوج ولما نسأله ليش يقول مو لازم ..
انا بقولكم ليش اخوي كان يفكر هالتفكير .. لانه لما كان صغير في اول شبابه كان يحب وحده من الاهل وبعدها هي تركته وتزوجت غيره وهو تأثر من هالشي وللأسف لعب لحد ما قال بس وما خلى شي ما سواه .. سود ويهنا جدام الناس الله يعافيكم ولا يبلاكم يا رب امين
لكن قبل تسع سنين تقريبا الحمدلله الله هداه وعاف كل شي وترك كل شي والتزم بصلاته وتحسنت اخلاقه والحين مرت سنين صار كل حد كان يحتقره يحبه لانه تغير تغير جذري فاجأنا كلنا ..
اللهم لك الحمد كما ينبغي لجلال وجهك وعظيم سلطانك
المهم يا بنات .. مرت سنين ونحن نحاول فيه ونقوله عن فلانه وفلانه لكنه ما يسوي لنا أي سالفه
صارت مشااااااااااعره بارده برود الثلج وكل حياته شغل
والله ان دمعتي تنزل عليه ساعات لما اشوفه وحيد خاااصه في الويك اند لما يكونون كل اللي من عمره من ربعه مع عوايلهم وهو وحيد وبعد كارف نفسه في الشغل ..
تخيلوا حتى طلعات ما يطلع ولما امايه تقول له ليش ما تطلع تخيلوا يكذب عليها عشان ما تتضايق ويقول الحين بروح لاني مواعد فلان واخرتها اكتشفت انه لا مواعد احد ولا حد يكون معاه الا يطلع بروحه ياخذ له لفتين في الشارع ويرجع عشان يستحي من امايه ان ما عنده احد ..
كلنا ملينا من كثر ما نحن عليه واخرتها خليناه على هواه .. وقلنا اذا فكر هو من نفسه بيي يخبرنا
اللي خلاني اكتب هالكلام كله هنا هو شي انصدمت فيه ..
والله اني بكيت لما عرفته وحسيت بغصه وقهر الدنيا لكن الواحد ما يقول الا الحمدلله على كل حال..

هو حاط على الديسك توب ماله صورة بنت صغيروووونه وااااايد حلوه واموووووره
والله كانت تجنن موووت
وقال انها بنت صديقه ..
ما عليه كل هذا عادي ..
امسات دخلت الغرفه ادوره وشفت اللابتوب ماله مفتوح

انا ما احب اتلقف في خصوصيات الناس لكن لما شفت اللابتوب وكان هو نازل تحت ما ادري شو يسوي قلت بدخل على النت لاني من متابعين المنتدى هذا باستمرار
المهم لما ييت ايلس على الجهاز شفت انه فاتح فايل وفيه اشياء احس قلبي عورني لما شفتها ..
انا شفت صورة البنت هاذي نفسها اللي على الديسك توب وشفت صورة عين حلووووووة كان باين انها لوحده كبيرة مو صغيره ..
بس كانت تجنن ما شاء الله تبارك الله ..
تدرون لما شفت العين وشفت صورة الصغيره لقيت انها نفس العين سبحان الله
لان لون العين مو مألوف عندنا يعني ما كان لون اسود او بني او حتى العسلي اللي تعودنا عليه في الخليج

ما ادري ليش حسيت وقتها ان الصغيره هاذي هي نفسها صاحبة العيون الكبيرة
وتأكدت اكثر لما لقيت مكالمات في الماسنجر محفوظة في نفس الفولدر
يا بنات انصدمت صدمة عمري في اخوي
ما ادري شو صابني وانا اقرا المكالمات
ما كانت وقحه مثل ما تتصورون
ولا كانت سوالف خربطان وبس ...

اكتشفت من هالمكالمات ان اخوي حب انسانه عن طريق النت
وهالحب ما دام الا شهرين بسسسس
انا اعرف اخوي عمره ما فكر يلعب على النت ولا يحب يدخل الماسنجر او يكلم بنات وشفته كاتب هالشي لها وقايل لها اني من قبل ما اعرفج ما افتح الماسنجر لكن من يوم ما دخلتي حياتي ما اقدر اطلع منه دقيقه وحده

يا بنات المكالمات كل وحده عليها تاريخها
وفيه ايميلات بعد كل واحد وتاريخه
وهالتاريخ يرجع لسنتين ورا ..
يعني كل هالكلام صار قبل سنتين ومحد عنده خبر
..

البنت ما كان مبين عليها انها لعابه او ما شابه ..
الصراحه حتى اسلوبها كان راقي في التعامل يعني ما عندها سوالف الحب وهالخرابيط
ولاحظت انها تنصحه واااايد بالالتزام وتقول له انا ما ادري ليش طاوعتك وكلمتك مع اني ما كنت افكر بهالشي ابد ..

انا يا بنات ما اعرف كيف بدايتهم لكن اللي فهمته من المحادثات والايميلات انها بنت متربيه وشفت ان اخوي ابدا ما حاول يتمادى معاها في الكلام مثل ما يسوون معظم الشباب
حتى في اول المحادثات كانت العلاقه عاديه جدا لكن قدرت استشف منها ان اخوي تعلق فيها وهي ما كانت تقول شي يثيره
كل سوالفها عن الجامعه ومواقفها وهي صغيره والا تناقشه في الشركه اللي يملكها وتسأله لان تخصصها مشابه لتخصصه مثل ما فهمت ..
وفي المكالمات الاحدث بدت قصه الحب واعترف اخوي لها انه يبغيها لكن تدرون كيف كانت السالفه .. وهالشي اللي يقهر واايد ..
هو ما اعترف لها بشي لكن هي يته في يوم وخايفه لانها انخطبت واهلها خلاص وافقوا حتى من دون ما يشاورونها ..
هنا شفت ان اخوي انهار وعصب وقال كل اللي في خاطره
حتى انه قال لها مستحيل تروحين لغيري ومن اليوم بطرش ناس صوب بيتكم عشان يتوسطون لي عندكم
لكنها منعته وقالت انها مستحيل تتزوجه مع ان فيه كل المواصفات اللي تبيها الا انها من عايله فقيره ومو من نفس مستواه الاجتماعي ..
لاحظت ان اخوي انقهر واترجاها ما تفكر بهالشي وتدله على بيتهم واهلها لكنها كانت تمنعه وتقول اذا الله راد شي بيستوي غصبن عني وعنك وللحين ما صارت الملجه ويمكن ما يتم الزواج فرجته انه يصبر وهو اقتنع وما كان بيده شي ..

وبعدها لاحظت ان حب اخوي لها زااااد اكثر واكثر يمكن لان الخطبه طالت شهر تقريبا وما صار شي فحس بالامل ..
وهي تعلقت فيه حيل كل هذا كان واااضح يا بنات ومو لعب او طيش شباب
نسيت اقول لكم انها اصغر عنه 15 سنه تقريبا
والصراحه ما ادري كيف تعلق بها مع انه ما يهمونه البنات وغير قابل للتأثر بهالسوالف خااصه ان البنت صغيييييييييييره وما ادري كيف حبها ..
المهم بعد قصه حبهم اللي دامت شهرين شفت محادثه تبلغه البنت فيها وباين انها وااااااااااااااااااااايد متأثره بصورة مو طبيعيه ان اهلها خلاص حددوا الملجه مع انها بلغتهم برفضها لكن النصيب لما ايي محد يقدر يرده ..

اخوي تخبل كانت ردوده تعور القلب وحسيت اني ابغي اروح له واخفف عنه
حتى هي كانت مثله ولا هي تدري شو تسوي بعمرها لانها هي بعد تمووت فيه .. لكن حسيت ان فيه شي يمنعها انها تتزوجه ..
يمكن مثل ما قالت تحس بالفرق الاجتماعي وتخاف منه والله اعلم ..

المهم كان فيه كلام اخويه قاله لها انه مستحيل يتزوج وانها المفروض تكون له وانه بيبقى يحبها وانه في حياته ما حس بمثل هالحب حتى مع اللي حبها قبل ..
حتى هو بنفسه مستغرب كيف قدرت تخليه يحبها .. وهي قالت له انها مستحيل تتواصل معاه لو ملجت لانها تخاف ربها وحرام ولد الناس اللي بيصير زوجها تخونه وهو ما سوى لها شي .. حتى انها ندمانه لانها تجرأت وكلمته وخانت ربها واهلها ..

الصراحه انا بكيت لما قريت لحظات فراقهم
حسيت اني قاعده اشوف فلم مو اخوي وهالبنت ..

تأكدت ان البنت ما قامت تكلمه لان ما فيه تاريخ بعد ذاك التاريخ ..
وييت ابغي اقرا الايميلات الباقيه الا يطب علي اخوي وانا على هالحال وما ادري ليش تيبست في مكاني وشفته وانا مب قادره اسوي شي
هو حس فيني وعلى طوووووول يى صوبي وشاف اللي اشوفه
اااااااه يا بنات بغيت الارض تنشق وتبلعني
موقف مب حلو ابد

هو تم ساكت وما قال شي وانا تميت ساكته
بعدها سألني شو شفتي وما قدرت اكذب وقلت له بصراحه ليش ما قلت لنا انك تبغيها

ما رد علي بس قال لو يرجع الزمن سنتين كنت سويتها صدقيني ولا ترددت لحظة وحده

حسيت انه يقولها بحسره فقلت له ليش ما تنساها
رد علي اللي مثلها ما ينتسى
ولما سالته شو فيها غير قال لي عمري ما بحصل شراتها ..
كان كل رد علي يحسسني انه للحين غاااااارق في حبها .. خذ مني الجهاز وابتسم لما شاف الصورة وبنفسه كمل وقال تدرين عمري ما حسيت بصدق احد كثر هالانسانه وانا مو صغير ، انا كبير فاهم وعاقل وهالبنت شفااافه لابعد الحدود ومع اني ما احب اكلم البنات وحتى ما اتأثر بهن الا انها الوحيده اللي في شهر واحد بس خلتني افكر اني اتزوج وانا رافض هالفكره من الاساس


انا قلت له هالشي ممكن يصير مع غيرها وانت لازم تعطي نفسك الفرصه
قال لي عفت الزواج ولا ابغيه الا اذا كانت هي عروسي

قلت له يعني شو تنتظر
تخيلوا شو رد علي
قال لي وبكل صراحه انا ما فقدت الامل للحين

حسيت انه بيغمى علي وذكرته ان البنت متزوجه ويمكن الحين عندها نونو وسالته عن اللي يقصده وقال انه يحبها ولا يفكر يأذيها او يتمنى لها الشر ولا حتى يفكر يتدخل في حياتها .. بس في داخله يحس انه للحين عايش على امل انه يلقاها ..
ولما قلت له انها اكيد نستك وان لازم تنساها قال لي صدقيني انا عندي احساس كبييير اني للحين على بالها ومحد حبني كثرها ..

تقدرون تتصورون يا بنات هالشي .. انا ما عرفت شو اقول له ..لاني شفت شكثر يحبها
حتى في المكالمة القبل الاخيره لهم قالت له انها بتسكن في شقه لان اللي بيتزوجها بعده شاب مو مكون نفسه عشان يكون عنده بيت
تخيلوا شو رد عليها وهو كان في ذيك الفتره في لندن ....... قال لها والله امري بس والحين لو تطلبين الحين انا ارجع البلاد واسجل بيتي باسمج وعيشي فيه طول عمرج مع ريلج وعيالج
وحتى قال لها لو حبيتي تشتغلين ما يحتاي تدورين أي مكان بس ارسلي لي ايميل واكتبي فيه وين تبين تشتغلين وشو تبين تشتغلين ان شاء الله لو مديره وكم تبين الراتب ومن ثاني يوم روحي داومي واستلمي اللي تبين طبعا في شركته ..

لكن ردودها عليه كانت مؤدبه وواضح انها مش طمعانه في فلوسه ابد ..

يا بنات انا لو ما اعرف انه اخوي كان قلت هالانسان كذاااااااااااب لكن انا اعرف اخوي ومن بعد ما كلمته تأكدت انها لو تطلب حياته بيعطيها .. الحين عرفت انا ليش هو رافض الزواج من الاساس ولاني اعرفه من النوع العاطفي وااايد اعرف انه ما بينساها .. انا اول مره اشوفه جذا الصراحه ..
ياليتني عرفت هالبنت وقربتها منه ... كانت ارتاحت امايه وكلنا ارتحنا ..
خبروني يا بنات شو نسوي معاه .. كل يوم يكبر وهو ما يفكر بالزواج ..
من اللي بيهتم فيه بعدين وكم فرق العمر بينه وبين عياله لو تزوج متاخر ..
كلنا نحاتيه لكن محد يعرف السبب غيري ..
خبروني كيف اقنعه وكيف اخليه ينساها ..
هو اشترى له بيت في لندن وعاش فيه من بعد ما تزوجت وما قام ايينا الا في المناسبات

والله ان حالة امايه تعور القلب .. وبعده عنها ذابحنها
اذا تعرفون حل لمشكلتنا خبرونا .. اذا عندكم اخوان رافضين الزواج كيف اقنعتوهم..
ياليت تخبرونا والسموحه لاني طولت عليكم وان شاء الله ما تهملون رسالتي لكم ..