اخوي مات ليله 25 رمضان تعالوا شوفوا كيف كانت خاتمته وابي منكم الدعاء له

السلام عليكم ورحمه الله وبركاته

اخواتي اتمنى منكم دعوة صادقه لاخوي رحمه الله عليه انا صاحبه الرؤيا اللي حطتها الاخت الفاضله ام باسل عن اخي الميت ودي اقولكم كيف كانت خاتمة اخوي ومابي منكم الا الدعوة له والدعوة لكل مسلم تحت التراب او فوقه

اللهم احسن خواتمنا يارب العالمين

يوم الاربعاء 24 رمضان اخوي رحمه الله عليه كان وقت الفطور هادئ جدا مع انه من النوع اللي يحب الفرفشه وكان في هاليوم توه محلق بعد الفطور راح للوالده وهو مبسوط انه بيطلع سيارته كان لها شهر في الوكاله اخوي كان عمره 21 وطلب منها فلوس عشان يغسل السياره امي تمت تناظر وجهه وهي تقوله وش فيك اليوم اشوف البياض زايد بياض وحطت عيونها عليه تناظر وجه وتحس ان وجهه اجمل من كل مره وبعد صلاه العشاء والتراويح اخوي الكبير في المسجد التفت يمه وحصل اخوي الله يرحمه يصلي جنبه وماانتبه انه كان طول الوقت يمه بعد الصلاه اخوي الكبير راح لسيارته مع اخوي الصغير واخوي الله يرحمه لاحق وراه وركب يمه واستغرب اخوي الكبير وقاله وصلني عند الكهربائي عند سيارتي اخوي وصله وعطاه فلوس للبنزين وقبل ماينزل تم يطالع اخوي الكبير وكانه يودعه رجع البيت وحصل ابوي وصديقه عند الباب نزل وسلم عليهم وهو دايم يسلم عليهم من بعيد بس هالمره كانت غير نزل وقعد معاهم وسلم عليهم وراح طلع مع اصحابه وفي الخط السريع الساعه 12 ونص صار الحادث هو الوحيد اللي مات وكان معاه 3 في السياره ماصار فيهم شي الحمدلله وصديق اخوي تم قاعد معاه لين جات الاسعاف وطول الوقت وهو يتشهد حتى في سياره الاسعاف طول الطريق يتشهد ويقرا السور اللي حافظها من القراان ماطول في المستشفى الله اخذ امانته والحمدلله اخوي مانزاع اطلعت روحه مثل النسمه ابتسم وغمض وثاني يوم اللي هو يوم الدفن رحنا وشفناه بعد ماغسلوه اقسم لكم يابنات ان عمري ماشفت اخوي جميل كثر ماشفته ذاك اليوم كان مثل العريس اللي بيزفونه وكان مثل النايم ومبتسم والبياض والنور يشع من وجه وقبل مابيدؤن يصلون عليه حطوا معاه اجنه خدج والشيخ قال هذي رحمه من الله وبعد بيومين كانت ليله العيد صار في بيتنا شي غريب اللي كان يجي بيتنا كان يشم في الحوش ريحه طيبه وكانت مثل ريحه اخوي الله يرحمه لما كانوا يغسلونه كانت الريحه تلف على البيت وريحه زكيه وجميله جدا وسألنا قالوا هذي بشاره للميت وبعدها انا شفت رؤيا جميله جدا لاخوي واااااااه لو اني اشوفه كل يوم اخوي كان مصلي وكل من يعرفه يحبه كان اجتماعي وقلبه طيب وهو اللي كان يحث اصحابه على صلاه الجماعه ولما يجمعهم في المجلس كان دايم هو الامام ماكان عنده سوالف االشباب وطيشهم ولا خرابيطهم

:44:
اللهم ارحم اخي واغفر له واجعل قبره روضه من رياض الجنه اللهم ادخله الجنه من غير حساب وضاعف حسناته وابدله دارا خير من داره واهلا خيرا من اهله



اللهم نسألك حسن الخاتمه ياارب العالمين
اللهم اني اسالك حسن الخاتمه


بناااااااااااات تكفووووون ادعوا ربنا انه يصبر امي وابوي واااااااايد تعبانيين وللحين مو مستوعبين ان اخوي خلاص رااح كل يوم حالتهم اسؤ من اليوم اللي قبله

يااارب صبر امي وابوي يااارب رجتوك ياارحم الراحمين ارحم حالهم وألهمهم الصبر والسلوان