انتم اعزموا هو وزوجته وعياله وتقربوا منه
ابوك له حق عليه لكن من الجفاء اللي شافوا سحب نفسه
انتم بادروا واوصلوا وحببوا فيكم

الوحيدة لي تستاهل بره هي امه
ابوكي تخلى عنه ورماه لها وهي لي ربته وتعبت عليه ليالي الين كبر وصار ضابط ومنصب ويرفع الراس والف بنت تتمناه كل هذا بسببها
واحسك مقهورة لانه سمى البنت على اسم امه
وش تبغينه يسميها على اسم امك لي طردته يعني 😅😅😅

ولك عين تفتحين موضوع هنا
حبيبتي الحل عند أمك و أبوك
لازم يصلحون غلطهم دامهم عايشين
طفل مارحمتوه وبهذلتوه
والحين لما أشتد عوده رحتم تدورون اخباره
خلكم مثل قبل واعتبروه مو موجود

ماالومه والله من الجفا اللي شافه أبوه مهتم فيكم وساحب عليه
غصب يسمي الولد على أبوه ؟؟
تراه مايعتبر بر ؟؟؟؟ كيفهم يسمون اللي يبون
شي طبيعي أنه مع خواله وأمه هم اللي ربوه واحتووه
تعبت نفسيته المسكين منكم ابو مايسأل عنه وامك ماتبيه يجي وش تبون يسوي يعني يغرقكم هدايا وحفلات اكيد مالقى قبول بينسحب

كلامك ينرفز..
يعني تخيلي هذا كلامك عنه "وانتي من الطرف الشاكي، كيف لو نسمع المشكله من اخوك نفسه!" وبالرغم من كذا تعاطفنا مع اخوك المسكين اللي يلقاها انه عاش بعيد عن ابوه ولا يلقاها من امك اللي كانت تكدر عليه لما يزوركم ولا يلقاها من اخوك اللي يناشبه.. لين ما الولد قطعكم وتعود على الجفا لان بالمقابل ما حرصتوا على وصله يوم قطع..
والحين يوم كبر وصار شايل نفسه.. صرتوا تتشرهون؟!!
اذا انك فعلا حريصه على وصله وتحبينه كأخ مو لمصلحة (يعزمكم، يتوسط لكم... الخ)، فابدوا باظهار حسن النيه له انتم اولا.. سووا عزيمه شننانه رنانه له ولزوجته ولعياله ولامه وخالاته وخيلانه ولكل من يعز عليه، اوقفوا بالعزيمة كلكم انتي وامك وابوك واخوانك واعمامك وعماتك "اللي يتشرهون!"، ثم بعد ذلك تابعوا وصلكم له تاره بالاتصال وتاره بالوصل والذهاب له ببيته، "ولا تنتظرون منه اي شي" لان معدنه طيب ومتى مااحس بصدق حبكم وان خاطره اتجاهكم طاب سيبدا من نفسه بالوصل..
اعانه الله على بر ابوه لان موقفه صعب لا يحسد عليه واعانكم الله على اصلاح الوضع..