اخوي وتغيره الكلي بعد زواجه

السلام عليكم
المشكلة تبدأ تقريبا من زواج اخوي هو تزوج من ثلاث سنوات تقريبا
ومن تزوج صار شبه منقطع عنا يعني في السنة بس نشوفه ثلاث مرات واذا جا في ذي المرات ما يقعد معنا على سفرة ابدا اصلا الشاي زين يشربه
في رمضان ابد ما نشوفه مر علينا ثلاث رمضانات ما زارنا فيهم
اذا عزمناه على غدا او عشا يعتذر ويقول مشغول
احيانا احنا نقول له اعزمنا على شي طلعنا كوفي شوب زهقنا من قعدة البيت (طبعا لحنا الحمد لله نطلع ونروح ونجي وابوي واخواني يطلعونا بس قلنا ذا الكلام احتيال عليه عشان نشوفه ونقعد معاه) يودينا المطعم او الكافي ويعطي امي فلوس ويقول بالعافية واذا خلصتوا دقوا علي اجي اخذكم
اصلا انا هنا ودي اقول ابي اروح البيت ما ابي اكل اصلا ما جيت الا ابي اقعد مع اخوي واسالف معه بس مجبورة شسوي
واحيانا نروح شاليه بس ما يجي معنا نقول له تعال يقول مشغول او مب مشتهي احيانا نقول له ابوك واخوانك حطونا ومشوا تعال جب لنا غدا وتفضل عندنا يجينا يحط الغدا ويمشي انا استانس اذا جا بعدين على طول يمشي شدعوة ما يجلس كلش عندنا
مرتين رحنا للعمرة وقلنا تعال انت وزوجتك معنا قال لا ما نبي نزعجكم خذوا راحتكم قلنا له بنستانس اصلا اذا جيت قال لا مب جاي اعتذر
هو احيانا يفطر عند حماته في رمضان بس عندنا ما يقرب ومرة راح معهم مكة واحنا ما يروح
حتى اصلا ما ندري عن اخباره احيانا يسافر مع زوجته ولا يخبرنا ولا ندري عنه ومرة سوا عملية ولا قال ويوم درينا بعد فترة من الناس قال عملية بسيطة وما له داعي اقلقكم معي
ايش السبب الي خلاه يتغير كذا
انا قلت يمكن بيتنا وجمعتنا احيانا فيها ازعاج ومشاكل
يعني اختي احيانا ترفع صوتها على عيالها وامي احيانا تهاوش الخدامة واحيانا عيال اخوي واختي يتهاوشون
بعدين ابائهم يدخلون ويكبرونها اتوقع عشان كذا يمكن ما يجي بس امي تقول ما له دخل ذا
او قلت يمكن يعتقد انه الاستقرار الزوجي يحتم عليه انه ما يجي عند اهله لانه يحسبه ازعاج لهم