صحيح ومن ناحية توصيل البنات والحريم بالسيارة معاكم اغلب الحريم ما يحبوا هالشي وانا منهم نكره ذا الشي حتى لو اضطر الزوج يوصل معاه بنات او حريم بالنادر فتأكدي الزوجة ما تكون مرتاحة

طيب مو اجتماعيه الحرمه قاعده في بيتها كافيه خيرها شرها ومسالة الزواج اتوقع من المشاكل الي مرت فيها وهي صغيره وان طبع قبيلتكم تعدد وهي مو من نفس القبيله فالموضوع شكل خوف عندها خلي اخوك يجلس معها جلسة مصارحه ويحسسها بالامان وان هذا الموضوع ما يفكر فيه وشكلها مرة اخوكم حساسه وطيبه وظروفها القديمه كسرتها الله يفرج همها

السلام عليكم اتوقع هدوء اخوك هو الي رافع ضغطها ..تعرفين الحرمه تحب السوالف والتفاصيل بالمواضيع عكس الرجال كلمه ورد غطاها ..ف اتوقع انها تفكر اخوك يفكر بغيرها لما يكون ساكت كثييير وانه ما متقبلها ..لازم ياخذها بالحنيه ويكسب ثقتها بكلامه وافعاله ويمدحها امام اهلها وامامكم بين فتره واخرى ..خلي يعززها دايماا قولي له انا بجي عندكم واذا زوجته قدمت لك عصير او قهوه امدحي مثلا شو نوع هالعصير عجبني واذا ردت انه من النوع الفلاني خلي اخوك يقول صحيح انه هالمنتج لذيذ بس لانه فيه لمسه من يد الغاليه يطلع الذ ربي لايحرمني منها ..شوفي كيف بتتغير تدريجيا ..ونحن حريم نفهم لبعض كيف المدح يطيرنا .ربي يسخرهم لبعض ويبعد عنهم مداخل الشيطان..

اولا فعلا في ناس مو اجتماعيه وتكره الجمعات
وانا كذا ما اطيق الاجتماعات ابدا
بالرغم ان الناس تحبني و تحب سوالفي واذا عرفوا طبعي يستغربوا ليش ما تحضر الاجتماعات
لكن انا اكره مجتمع النساء و اشوف ان الجمعات للرجال اما الحريم ما من ورا جمعاتهم خير الا من رحم الله
و اهل زوجي كانوا محرقين الدنيا لان يتفشلون اذا حضروا عزيمة وانا ما جيت و في البدايه شبت الدنيا
بس الحين الكل استسلم و عرف طبعي
ثانيا عادي من حقها تغار ع زوجها
بس اللي مو طبيعي مسئلة خوفها من انه يتزوج عليه
وواضح جدا انها تحبه بجنون واكيد هي عايشه في مجتمع كله تعدد او تسمع سوالف بشكل يومي عن هذا الشيء و واضح ان نفسيتي و شخصيتها مهزوزه


والحل بسيط جداً
مو الطلاق


حرام هي طيبه جدا لكن مشكلتها غبيه
وزوجها ما فهمها
هي تكرر عليه كل هالسوالف
لانها اكيد محتاجه كل لحظه تسمع منه كلمه
انا احبك و مستحيل اتزوج عليك
لازم يعالج خوفها لانها هي خايفه كثير من كثر ماتحبه
لازم يطمنها
وبيشوف بنفسه كيف ترجع تهتم فيه و تريحه اكثر
و هو برضوا اذا اظطر يودي احد مو لازم تدري
لان نوعيتها ابدا ماتتحمل و لاتتفهم


نصيحتي يعالج خوفها بنفسه
اذا كان فعلا يهمه اولاده
مهما كان هذي ام عياله
واكيد يحبها
هي بس تحتاج كلام حلو بشكل متكررررر

بنات ترا اللى رجله في النار مو زي اللى بالماء
والرجال ما اشتكى لاخته الا بعد ماطفح الكيل
ومن كثر ماهي منكده عليه - على حسب فهمي
ع اتفه شي تسوي مشكله ودايما عندها وسواس الزواج والطلاق وخانقه الرجال بذا الموضوع وغاثته فيه
الرجال يبي راحة بال وحياة بلا مشاكل
زوجته الله اعلم اذا خوفها بالشكل هذا معناه فيها مرض نفسي
ومتأثره كثير بالماضي
الواجب ع زوجها يوقف معها لإن المرض النفسي شي خارج ارادتها هي تتعب قبل ماهو يتعب
هي اللى تشعر بعدم الامان والاستقرار اكثر منه
لانها عانت
قولي لاخوك اذا أنت متضايق فزوجتك تتألم
لازم يؤديها لدكتور نفسي تتعالج
بس لازم يحسن اختيار الدكتور


الله يصلح حالهم