اخوي وفلوسي

بنات
انا متزوجه بدون اطفال
وزوجي مسجون الله يطلعه لي
عندي مشكله مع اخوي اكبر مني عمره ٣٣ سنه
وانا عمري ٢٧ سنه
حاليا انا عند اهلي وماعندي اي مصدر دخل
بس تعطيني امي واختي الكبيره ١٠٠ او ١٥٠
وماهو دايم بعد يمكن كل بعد شهرين مره .. يعني احتفظ بها للضروره القصوى
اخوي ذا ماهو موظف ولا متزوج يابنات ويطلب مني اعطيه فلوووس حتى لو اقول مامعي يترجاني تشوفينه تقولين شوي ويبكي .. واذا ماعطيته يحقد علي ويقلب علي وينفس ويروح يفر راس امي علي ىتزعل مني بدون سبب !!
والله انا زوجي مسجون وماني موظفه من وين لي طيب ؟ حتى ان جاني فلوس فهي لي انا ، انا احتاجها لنفسي .. وهو لو يشوف معي ريالين ياخذهم !!
امس موقف بي عند صرافة السيارات غصب عني يقول تكفين تكفين اقول مامعي من وين لي يقول يازق انا اخوك تكفين اردها لك > وادري كذاب ماهو مرجعها .. واحذف عليه الصرافه مافيها الا ٥٠ ريال واخذها والله ما استحى وقال لا خليها لك اخخخخذها
المهم اني لقيت وظيفه وان شاء الله من يوم الاحد الجاي اباشر العمل .. راتبي ٣ لاف
وماتصدقون والله على قد ماتمنيت الوظيفه على قد ماني شايله هم الراتب .. اكيد بيروح تناتيف


علموني كيف اتصرف ؟
وش الحل ؟ وش السواة ؟


زوجي بالسجن يحتاج مصروف
كون اهله مايسألون عنه ولا يعطونه
فأنا ملزمه به .. وشيء طبيعي اني بعطيه


شقتي عليها ايجار دفعه اولى ٥ الاف
ومحد راضي يدفع لا اهلي ولا اهله
فاتورة الكهرب الفين ريال
ودي اجمع لليوم الاسود


امي تقول لا تعطين زوجك ولا تدفعين شيء على الشقه ولا الكهرب !! يعني ينرمي عفشي برا البيت واتشتت ؟ زوجي بيطلع من سجنه ان شاء الله اقعد بدون اثاث ؟! اصلا تقول لا يدري زوجك انك توظفتي !
علموني بنات وش الحل ؟ اذا عطيتهم طار راتبي .. وتذا ماعطيتهم بيقلبون علي وينفسون ؟ وش الحل وش الدبره .. ودي احس بالسلام والاستقرار

وادعوا لزوجي يطلع من سجنه عاجلا غير آجل لأني بعده تمرمطت وتشحططت محتاجته جنبي 😭