اخو زوجي

السلام عليكم يابنات
صارتلي سالفة قبل كم يوم وللحين افكر يابنات مدري وش اسوي اعلم زوجي ولا لا
الموضوع يا طويلات العمر ان قبل فترة سلفتي وبنتها زاروني وكان عندنا بعدها عزيمة في الشاليه انا واهل زوجي وقريباتهم
قلت لسلفتي استاذنك لبس دودو علي
طبعا دودو بنتها
ووافقت ورحت السوق جبتلها فستان بسيط وتاج وشنطه وكذا شغلات حق بنوتات زي الاميرات وانا فرحانه لما كنت اتقضى لها وبعد فرحت يوم شفت فرحة البنت فلبسها لاني انا ماعندي بنات عندي بس ولد واحد الله يحفظه لي
فنفسي يكون عندي بنوتة واشتريلها لبس ودلع واسرح شعرها
جا يوم الشالية ورحنا الصباح وانبسطنا
كلنا كنا حريم وبنات صغار وبعد في اولاد بس صغار اكبرهم عمرة ٩ سنوات
وبنت سلفتي عمرها ١٠ سنوات توها صغيرة
يجي العصر ابوها جاء بيجيب لسلفتي حاجة ويسلم على بنته وعدا الموضوع
السالفة ان ثاني يوم من الصباح يندق بابي بقوة ومحد في البيت الا انا وولدي الصغير والشغالة زوجي كان طالع انا انخرشت من اسلوب الدق طيب فيه جرس ليه مايرنه بهدوء
خليت الشغالة تفتح الباب الا اخو زوجي ويدخل الحوش وينادي باسمي بقوة ولا ادري وش يبغا مني انا تمالكت نفسي قدام ولدي لبست عبايتي بسرعة وطلعت له وصرت واقفة ورا الباب وفاتحته شوي بصراحة خفت يدخل علي
جلس يتكلم بعصبية ويقولي انا بنتي تلبس لبس بنات الشوارع جسمها كله باين وقال كلام كثير اهاني فيه ومن بينه مايلبس هاللبس اللي ما عنده اخلاق وطلع وصفق الباب بقوة وراه
جلست ارجف والشغالة تهديني خفت لا يطب علي وقتها وفنفس الوقت زعلت مرة وعصببت
للعلم البنت صغيرة ١٠ سنوات واللبس ماكان فيه حاجة فستان بسيط باكمام ربع وطولة يوصل لتحت الركبة بشبر تقريبا يعني مستوور
انا ماسويت شيء غلط يابنات غير اني بحسن نية قلت افرحها ولاني احب البنات واتمنى تكون عندي بنت وافرحها
الحين انا ماسويت شيء ومدري وش اسوي اعلم زوجي والا لا
اخاف اذا علمته اصير افرق بين الاخوان وانا ما ابغا هالشيء يصير