اخو زوجي تزوج .. موضوع مفيد

السلام عليكم
ليش بعض الرجال يحبون اللبنانيات والسوريات؟ اخو زوجي تزوج وهذا السبب
والله زوجته الخليجيه هي صديقتنا واختنا وماتستاهل يتزوج عليها انيقه وطيوبه وكل الاوصاف الحلوه فيها
وبالنسبه لنا الخبر صدمه كبيره
لكن اخت زوجي جاها فضول قوي تبغى تعرف السبب الي خلاه يتزوج عليها بنت من امها لبنانيه وهي ماخذه سلكهم ...
الموضوع هذا صار له ٣ سنوات تقريبا واحنا ماندري
بس زوجته واخته درو بنفس الوقت
المهم وهي جايبه الطاري في اخر مره قعدت معانا
صدمتنا انه متزوج وعندهم بنت والحين حامل بعد
وقالت لنا تبغون تنصدمون اكثر؟
(اخت زوجي على الفضول ونقل الحجي .. لكن احس قلبها نظيف وحقانيه)
تكملة الموضوع
قلنا لها وش صاير (ترى كلنا متضايقين من الموضوع) مو فضول ابدا
قالت و اعرف الاسباب ليش تزوج عليها
قلنا بس حرام هي مو مقصره معاه ابد ..
قالت وهم انا ما اشوفه معذور على الي سواه
زوجته محترمه وبنت ناس ومو مقصره معاه والثانيه مافيها زود عن الاولى بس
لهالسبب ضغطت عليه ابغى اعرف ليش تزوج
قالت في البداية كالمعتاد وش يقولون
يقولون الشرع حلل اربع
والشرع حلل اربع
قالت له مافيها زود عن الاولى
قال انا ماهمني بياض وجمال خارق
وبعدين سوا مقارنه قوية بين زوجته الاولى والثانيه
يقول لها زوجته الاولى تلبس من اغلى الاماكن
وانا ماشوف اي ذوق بصراحه في لبسها قطع مركبة في بعض
وبس عشان سعره هي تشتريه
يقول في بانطلون تلبسه كأنه مال مساجين مخطط بابيض واسود انا يجيني منه صداع
(مع ان بالعكس حنا نشوفه حلوووو لبسها بس هم نظرتهم للشي تختلف)
قال وزوجته الثانيه
تشتري حتى من اماكن اسعارها معقوله وجودتها عاليه وحتى اماكن رخيصه والاماكن الغاليه للمناسبات الكبيره اكثر شي
عارفه تختار القطعه الي تلوق عليها
تلبس فساتين وحتى الجينز اللي اكرهه تلبسه وتلبس عليه فنيلات حلوه بحيث ان اشوفه حلو وراكب مع اللبس يعني ما احسه لبس شباب
اناقة وذوق ونعومه
يقول اناقة وذوق وعارفه تنسق ماتشتري قطع مركبه في بعض
وعبايتها ساده او فيها ديزاين خفيف يعني حتى التطريز اسود
يقول وزوجته الاولى عبايات ملونه رصاصي وماروني والهبات الغريبه قال لدرجة كنت استحي اطلع معاها بالرغم انها محتشمه بالكامل
مو بس زوجته الاولى بصراحه كلنا كذا بس هم والله نظرتهم للشي تختلف مايهتمون للموضه
المهم
وقال تعالي شوفي الفرق بين البيتين
قالت بعد وش بتقول
زوجتك الاولى بيتها نظيف
قال صحيح بس الفرق
ان الثانيه بيتها يلق من النظافه بسبب انها تتخلص من كل غرض ماتحتاجه ولا تجمع اغراض كثيرة وتخزن وانا ماقد دخلت البيت الا وهو نظيف وهي تقعد فاضيه ومقابله بنتها
بينما الاولى
تجمع اغراض وتخزنهم مالهم اي لزوم
واذا ادخل البيت لازم مكركب وهي تنظف فيه ولا راضيه تخلص
وتعصب على عيالها اللي مالهم ذنب ومزاجها كريه ولا تفضى لي
وكم مره نصحتها عن هالموضوع ولا دايرة بال بحجة انها يمكن تحتاج الاغراض.
الثانيه عندها بنت وحامل
يقول بنته مو قليله فيها فرط حركه وتجنن امها جنون وتكسر وتوسخ وامها حامل بالرغم من هذا يقول تلاطف بنتي واذا عصبت عليها ماتعقدها واذا اعصب انا على بنتي هي ماتتكلم ولا تقول شيء ولا تعلق
يقول عياله من الاولى بيتعقدون من عصبية امهم
(بصراحه معظمنا كذا)
يقول يعني مو قادر اشوفها تعاملني معامله وتعامل عيالي كذا وتقول لا تدافع عنهم ولا تدخل عشان الدلال يفسدهم
احسها طيبه مزيفه
و بعدين البنت حلاتها ناعمه ورقيقه مو اذا تعصب في البيت احس كأنها رجال غيري في البيت .
انا شخصيا صاحبة الموضوع شايفه عصبية زوجته على اولادها مثل عصبيتي على عيالي
بس ارجع واقول رجالنا نظرتهم تختلف للشي
واخته تقول هو مايحب الازعاج واحنا صغار يشوف ابوي يعصب علينا وامي ماتعصب
وكان حنون علينا
ارجع للموضوع
اخته تقول انه قال
انا اعصب مع الاولى ومع الثانيه
اجي ملعون خيري من الدوام تعبان مزاجي متعكر
لكن الاولى ما تتحمل مزاجي معظم الاحيان وتزعل وتتجاهلني وعلى اقل شي حساسة بزيادة
وتناقشني وتتحدى
تقول اذا انت مضغوط من الدوام انا مضغوطه من عيالك
لا تضغط علي اكثر انا مالي ذنب بشغلك
(بصراحه كلامها صح مايعذرون ابد )
يقول وتصير مشكله من لا شيء وانا اضطر اهرب من البيت وانفر منه البيت بالنسبه لي جحيم في هاللحظات .
والثانيه المسكينه تسكت وتهديني لدرجة ان انا صرت استحي ازعلها وهي عودتني على هالشي
اجي استسمح منها وهي ولا في بالها شيء ونهت الموضوع من لحظته وحسيت انها هي تحبني فعلا
الاولى عندها مشكلة المظاهر
لازم تكون احسن من غيرها وتشتري من افخم واغلى الاماكن
ومايبين بعينها شي .. واذا اكلمها تقول انت مسؤول عني
انا مو مقصرة معاك بشي
يعني خدمتها لي تبغى عليها مقابل
والثانيه ولا عمرها عايرتني بشي
وتطلب الحاجه الي محتاجتها
وانا مني ومن نفسي احب اهديها
ولازم اسألها عن اي شي في خاطرها بين فتره وفتره
عشان تطلب الي تبغاه واذا هي تدري عندي امكانيه تخبرني
قالت اخته الكلام هذا كان على لسانه
من بعد ما نصح زوجته اكثر من مره
وقال لها بتزوج عليك
في رجال ما يصارحون حريمهم وفجأه تشوف على راسها ضره
وبعد قالت اما قلت الكلام لزوجة اخوي عن الكلام الي قاله اخوي على لسانه عشان تعرف كيف تكسب زوجها
واقولكم عشان اذا عندكم اخطاء تصلحونها
وسبحان الله كلنا مثل زوجته الاولى .
وازواجنا فيهم تصرفات من بعض
وقلت انقلها بالمنتدى عشان الي مثلنا يستفيدون
مثل ماقلت لكم يشوفون اشياء حنا مانشوفها .
ويمكن الموضوع مايخص لبنانيات او سوريات او غيرهم
بس جد احنا في الخليج واجد عندنا شخصيات مثل شخصياتنا
عندنا مثلهم وعندهم مثلنا مو الكل
وعندهم شخصيات مثل شخصية زوجته الثانية بكثرة اذا نشأت البنت يربون فيها
الصبر .. التواضع .. الحنان .. الرقه مع الزوج .