اشتركت عشان تدعولي :

مرحبا اختي....... اول شي حبيت اخبرج اني وايد حاستبج والله يطفي هالنار اللي في صدرج,ردود افعالج طبيعيه والله يعينج. اللي حابه اضيفه بمشاركتي في موضوعج عدة نقاط استقيتهم من معاشرتي لناس مروا بنفس تجربتج وحابه اطرحهم: أولا: انا على يقين ان زوجك وصل مرحلة ما بعد ال 35يعني الفترة اللي يتصرقعون فيها الرياييل ويبون يغيرون حتى جلدهم اللي عليهم فخلي في اعتبارج انها مثل العاصفه او الزوبعه اللي لازم تحسنين التصدي لها. ثانيا: لا تعتبرين نفسج الوحيده اللي تعاني من ضغوط الزوجه الثانيه يعني في ناس في مثل وضعج واتعس ومب محصلين حتى حد يحن عليهم . ثالثا: دايما كوني المظلومه ولا تكونين الظالمه وهذ ا لنفسج اولا وللناس ثانيا لأني اعرف حريم سووا مشاكل وحشره والمجتمع أيدهم سوي وافعلي ويستاهل وآخر شي نفس هذيل الناس رمسوا عنهم وقالوا ما صبرت وهي الغلطانه ومن هذا الكلام. رابعا: وهذا شي وايد وايد وايد مهم لا تشمتين الناس فيج ولا تخلين سالفتج مضرب الأمثال وحديث المجالس لأن الناس ولو كانوا أقرب الناس لج كثر ما بتشكين بيملون منج لأنه كل واحد مشغول بهمه فلو احتجتي مساعده عندج خوات في المنتدى وناس متخصصين في حل المشكلات الزوجيه يقدرون يساعدونج. أخيرا: احنا الحريم للأسف نتريا الريال تبدر منه خيانه ولا نية زواج ثاني علشان نشوف شو ضيعنا في عمرنا من البلاده والحياه الرتيبه وعدم الإهتمام بالذات,يعني من تستوي مشكله قلنا بنطلب فلوس وبنشتغل وبندرس وبنسوق وبنعيش. ليش مانمتع الذات ونثريها قبل الريال ما يطلع الوجه الآخر. نصيحه أخيره: تحملي على عمرج وتعوذي من ابليس وقولي انزين وبعدين في الله يجازي ويحاسب ويآجر .........والله يسهل امورج ان شاء الله.

مرحبا اختي....... اول شي حبيت اخبرج اني وايد حاستبج والله يطفي هالنار اللي في صدرج,ردود افعالج...