اخيرا اشتريت هديه لزوجي رحت لنوردان شوفوا وش صار

طبعا ياحبيباتي الفضل لله وحده ثم لأفكار بنات حواء جعلكم ووالديكم الجنه

انا حطيت موضوع في(( قسم ساعدوني ))سألت فيه عم محل ليلة الرجل ونوردان


طبعا مارحت ليلة الرجل دورت غليه مالقيته قلت خيره رحت لمشغل نوردان
استقبلتن بنت صاحبة المحل ايش ذوق وايش اتيكيت والمحل من جوا والله مره حلو اول مادخلت قلت انا ابي هديه لزوجي وسمعت ان عندكم
طبعا ورتني كذا حاجه لكن عجبتني لوحة السيراميك وتولة العود وطلبتها ودفعت ورحت وانا حاطه ايدي على قلبي لأني ماأخذت الفاتوره بس قلت لها اسمي وطلعت
ولمل خرجت علمت اخويه وش سويت وكم دفعت وقام يهاوشني ويقول حريم دايم مستعجلات عقولكم في عيونكم و----و-----------و-------------الخ
وحاطيت ايدي على قلبي لأن ماصار عندي وقت ومناسبتي قربت
رحت الثلاثاء واخذت الهديه يوم الجمعه طبعا وقت قياسي على الشغل اللي سووه
انا مارحت اجيبها راح اخويه علشان مايهاوشني
ولما اخذها اتصل عليه وقال اش اش اش يابنت والله طلع عندك ذوق انا ماتخياتها كذا بالفخامه هذي
والله بكره لما اتزوج وماتجيب لي حرمتي زي كذا مشكله
انا فرحت ولما شفتها على الطبيعه مرررره انبسطت وفرحت البرواز اكبر من البرواز اللي وروني اياه والتوله بعد افخم واحلى
باكمل بعدين علشان اولادي جو من المدرسه

الحمد لله اتغدينا ورجعت لكم جري
طبعا لما وصلت الهديه اخذت التوله وحطيت فيها عود من عندي ونسيت المثل اللي يقول اعطي الخبز لخبازه
انكب العود
على جوانب التوله ومسحته بسرعه لكن وش حصل انمسحت صورة زوجي وياه على القهر دمعت عيوني اليوم الجمعه والأحد مناسبتي وش اسوي توكلت على الله واتصلت على المشغل وردت علي صاحبة المحل وحكيت لها على السالفه ماتتخيلون يابنات كيف كان ردة فعلها ماقالت انا ماني مسؤوله وهذا خطأك لاوالله كأن الهديه لها مو لي قالت لاتزعلين ولاشي جيبيها مره ثانيه واحنا نسويها ونعدلها لك ولاتهتمين وانا باوصي الورشه عليها علشان يطلعونها يوم الأحد العصر واذا بغيتي تحطين فيها عود خلي محل العود يحط فيها بعنايه
وترا مانمسحت الصوره الا لأني استعجلت عليها والا لواني ماني مستعجله كان امداها تنشف عندهم
انتظروني باقولكم كيف باقدم الهديه ان شاء الله
المحل على طريق التخصصي بعد تقاطع الملك عبدالله تمشين يمكن كيلو او اكثر شوي تلاقينه جنب مشغل الجميله على ايدك اليمين وانتي متجهه للشمال

بالنسبه للصوره ماقدر احطها لأن فيها صورة عيالي وماأبي احد يعرف هويتي لأن فيه ناس من قرايبي يموتون يعرفون وش اسمي هنا وكمان فيها شعري الخاص اللي كتبته انا في زوجي