اخيرا عثرت على افضل طبيبة نساء وولاده في الرياض .تجربتي للفائده .

السلام عليكم ورحمة الله وبركاته


حبيت انقل لكم تجربتي او باالاصح معاناتي مع طبيبات النساء والتوليد في الرياض ..

لعل وعسى ان يكون موضوعي مرجع لكل بنت محتاجه ومحتارة زي ماكنت انا ..


ويشهد الله ان ليس لي مصلحه ولاناقه ولاجمل في هذا الموضوع .. وكل ماسوف اذكره هو طمعا في دعواتكم الصادقه فقط لااكثر ..

طبعا انا لي 6 سنوات ماحملت وخلال السنتين الاخيره حملت 4 مرات وكلها اجهضتها ..

وبالصيف الماضي اكرمني الله وحملت وثبت حملي

طبعا تابعت في المستشفى السعودي البريطاني عند الدكتوره كورانا وماحبيتها وبعد كذا حولت عند الدكتوره فايزه

اخلاقها كويسه لكن معلوماتها الطبيه وخبرتها كطبيبه مهيب ذاك الزود والموعد يخلص مااستفدت منها قد شعره

كل الموعد سواليف

الزبده اني خلصت اشعتي الالترا ساوند عندهم لانها محسوبه علي وسحبت عليهم

المهم اخر مره رحت لهم سألني الطبيب اذا كان في عايلتنا اي امراض وراثيه لانو البيبي قصير طوله ..

طبعا نسيت اقولكم لمن صار لي 13 اسبوع بحثت هنا عن طبيبه شاطره في تحديد جنس الجنين

وكثير مدحوا مستوصف الكسائي دكتوره سعاد فااتصلت وطلبت موعد عندها قالوا لي سافرت من زمان

قلت لهم طيب من فيه قالي دكتوره منى النجار فحجزت عندها ورحت

طبعا المستشفى متواضع جدا جدا عباره عن شقه المهم دخلت وشفت الدكتوره وسبحان الله ارتحت نفسيا

بشكل ماتتصورونه

طبعا انا طلبت بس اشعه ماطلبت كشف

وسوتلي الاشعه وقالتلي عن جنس البيبي

قلتلها اكيد قالت باذن الله 100 % جهزي وتوكلي علا الله

كنت وقتها 13 اسبوع باالضبط

المهم رجعت للبريطاني وكملت

وماعلموني جنس البيبي الا لمن وصلت 24 اسبوع قبل كذا رفضوا تماما بحجة انو مو واضح .. وكان نفس اللي قالت لي دكتورة الكسائي بالـ 13 اسبوع

ومرت الشهور ولمن وصلت السادس حبيت اسوي رباعيه بحثت وبحثت فلقيت الكل مجمع علا مركز شعاع الطبي

رحت ولا استفدت اي شي لاشفت وجه ولا شفت اي شي ولامعلومات ولا غيره

قالتلي البيبي مافيهوش لحم

قلت كيف مافيهوش لحم قالت ضعيف اوي

وزنه 600 جرام وانتي المفروض الحين يكون وزنه 900

ضاق صدري مرررره وكتبتلي علاجات مااخذتها ولاشريتها

المهم يابنات جتني ضيقة صدر ماتتخيلونها

وكل يومين اروح اسوي اشعه بمكان رحت للحبيب رحت لعيادات الحياة

ومره المويا ناقصه ومره يقولون لي اني 22 اسبوع مع اني كملت 27 اسبوع وقتها

واصلي واستخير ربي واتذكر دكتورة مستوصف الكسائي اللي خبرتني بجنس الجنين

واجي اروح لها قبل يومين

وسبحان الله نفس الراحه النفسيه اللي اول مره ماقد حسيتها اببد بحياتي كلها

المهم قلت منيب معلمتها متى اخر دوره

وابقولها ماادري متى اخر دوره

عشان ماتكذب علي اذا البيبي فيه شي

تعطيني اللي قاعده تشوفه باالسونار

المهم

اول ماحطت الجهاز قلت لها شوفيلي كم عمره

قالت 29 اسبوع وثلاث ايام طبعا انصعقت لان هذا باالضبط باالدقيقه علا حساب دورتي مازادت ولا نص يوم ولانقصت يوم

قلتلها والوزن قالت كيلو و120 جرام وهذا الوزن الطبيعي تماما لعمر الجنين

انا بدت دميعاتي تبطط ..

منيب مصدقه

قلت يعني جنيني مافيه شي

قالت لا

وقاست المويا وقالت طبيعيه بنسبة 100%

والله يابنات اني بغيت احب يدينه

درت الرياض واكبر مراكز واغلا سونارات مارتحت الا على يدين هاالدكتوره الله يحرمها عن النار يارب

وللامانه جدا جدا تمنيت اني تابعت عندها من اول حملي ..

حتى لمن طلعت من الكشف قالت انتي ماتشربين حليب قلت صح

قالت لاتخافين الجنين مافيه شي وتضحك يعني لاتوسوسين بعد بس اظافرك واسنانك

وابقولك علا شغله فيها كالسيوم اكثر من الحليب

وهي مرقة اللحم بعظم اسلقي اللحم بعظم واشربي المرق او حطي عليه شوفان

وبحثت باالنت لقيت كلامها صحيح 100%

ودكتوره فايزه باالبريطاني لمن قلت لها علا هذي المعلومه قامت تتضحك وتتطنز قالت انتي تصدقي الحكي الفاضي ذا

فيه لحم فيه كالسيوم ؟

دكتورة منى النجار ملتزمه ومنقبه وفيها دين وفيها علم ماشاء الله

وانصح فيها كل وحده انه تتابع عندها بدون تردد

وانا ودي والله اني اولد عندها بس المستشفيات اللي تولد فيها جدا جدا بائسه بس ابستخير

الدكتوره بمستوصف الكسائي باالريان مقابل مدارس التربيه

والسونار عندها ب150

والكشف ماادري لاني ماطلبت بس طلبت اشعه ..

وامانه اي وحده تستفيد من موضوعي تدعيلي بحسن الخلق وهون الطلق وان يبلغني الله برؤية طفلي سليما معافا كاملا من غير زياده ولانقصان .

واي اسئله انا حاضره :27: