اخيرا عرفت من يسبب لي المشاكل😔

بسم الله الرحمن الرحيم
تحيه طيبه معطره وبعد....
اخوتي في الله أمس اكتشفت من يسبب لي المشاكل ونفور الناس مني وانا جالسه في بيتي وانا انسانه مسالمه وما احب المشاكل ..
امس أتضح كل شي ..هذا يا اخواتي عندي اخت اكبر مني الله يهديها عندها غيره وحقد غير طبيعي منا كلنا احن اخواتها والله من قبل لا اتزوج وهيه مئذتنا ضرب وتضرب اهنات وتهين وحن صابرين تزوجت وما سلمنا منها تجي معنا ونخدمها ونسكت والله انها حتى في شرفنا اتهمتنا والله ما انسى لما رجعت في يوم من المدرسه كنت بالثانويه عطاني ابوي كف ما انساه الله يرحمه وتفل في وجهي والسبب ان اختي اتهمتني اكلم واحد وجلست احلف واخواني وقفو في صفي كلهم وكذبوها ..ولما جاء زوجها طردوها اخواني وقالو لها روحي مع زوجك ما نبيك المهم ..هذا شي بسيط من ذكرياتي المؤلمه معها غير تكسير اغراضي وسرقة ذهبي ومرت الايام والسنين وتزوجة الحمد لله وربي عوضني خير في زوجي وسامحت اختي ونسيت الماضي وفتحت صفحه جديده وكل مره تسوي لي مشكله وانا اطنشها واتحشاها وما اكبر المواضيع معها ..
وجات فتره شفت اخوات زوجي تغيرن علي بدون مقدمات والله وما دريت ايش السبب ..وبعد السنين انتقلت بيت جديد ونفس الشي يصير معي لما ازور اهل زوجي اشوف الجفاء والقسوة منهم وصبرت انقطع واروح وبعد فتره ارجع ازورهم ويرجع كل شي زين فتره بسيطه وترجع المعامله القاسيه مره ..وانا اتحطم من الداخل ومشكلتي ما واجه ولا اعرف ايش السبب اخاف اسئل ويطول الموضوع واقول في نفسي الصبر طيب يمكن اختبار من الله عشان ما اخلي احد في قلبي غيره او اني مقصره مع ربي ...
وامس بصدفه ربي كشف اختي وعرفت انها تنقل كلام على لساني كذب وفتراء هذي اختي انا حذره معها ما اكلمها في خصوصياتي ابدا ..والي زاد الطين بله انه وحده من اخوات زوجي اسلوبها نفس اسلوب اختي وتعاونن علي ..في خلق المشاكل والفرقه بيني وبين اخوات زوجي الثانيات ..واخت زوجي واختي صديقات طبعا بعد زواجي تعرفن على بعض وبينهن مصالح مشتركه وتجاره ..عشان توضح الصوره اكثر..
المهم انا وكلت الله عليهن وقلت في نفسي ربي كشفهن لي وان شاء الله يكشفن عند اهل زوجي وتبان الحقيقه وخليني في صمتي احسن لين يفرجها ربي ..
وسلامتكن وسمحلي على الإطالة ...