ادخلوا...ابيكم بكلمة راس..

السلام عليكم حبيباتي..
انشاء الله تكونون بأحسن حال ..
حابه ادردش معكم شوي وحطيت نقاط علشان ارتب افكاري اللي حابه اقولها لكم...
والله يوفقكم..
1-اعرفي نوعية شعرك اولاً (دهني,جاف,عادي) ثم المشكله اللي تعانين منها (تساقط,خشونه,تقصف...)واستفيدي من خبرة خواتك وتجاربهم بالشي اللي يفيدك بس يعني عندك تساقط وشعرك ناعم مايحتاج تستخدمين خلطه لتنعيم الشعر..خوذي اللي ناقصك وتحسين انه راح يفيدك بسسسس.

2-كثير بعض البنات يبالغون ,يعني تكتب الوحده عنوان موضوعها:اللي تبي تروح كل مشاكلها مع الشعر بيوم تدخل , او الي تبي شعرها يوصل للركبه باسبوع تدخل.....الخ
بصراحه المبالغه بالوصف تفقد الموضوع مصداقيته ..معليش الوحده تكتب موضوع وتتحمس له بس اللي ماله داعي المبالغه بعدين غيرها ينصدم بالنتيجه :icon33
: ..يعني خلونا واقعيين أحسن..

3-نصيحه لاخواتي ..والله اني احبكم في الله وانصحكم انكم ماتلعبون في شعوركم يعني مو كل خلطه تقرينها علطووول تطبقينها -الله يعين هالشوشه مسكينه- تلقين بعض البنات ماخلت زيت ولاكريم ولا بصله ولاثومه الا وحطتها على شعرها,ميخالف اهتموا بشعوركم ماقلنا شي بس مو كل شي تحطينه على شعرك ونصيحه لوجه الله لاتخلين شعرك حقل تجارب ..لاتحطين اي شي تقرينه على شعرك ممكن تكون فروة رأسك تعبانه وشعرك مو ناقص خلقه يتساقط وتضرينها بدل ماتنفعينها,واحياناً بعض الاخوات يكتبون عن خلطات فيها اعشاب قويه مكن ماتحملها اي فروه خاصه الحساسه ممكن ناس تفيدهم بس انتبهي البشرات تختلف..أسألي خواتك اللي جربوا واستفسري قبل ماتحطين اي شي...الزيوت والخلطات العاديه والاعشاب المعروفه انشاء الله مامنها ضرر انا اتكلم عن الخلطات الثقيله والاعشاب القويه الغير معروفه...

4- الاحظ بعض الاخوات من باب حسن النيه ينقلون اي كلام يقال لهم مثلاً:
#شفت مغربيه وسألتها وش تحطون بشعوركم واكتشفت السر!! : 2thmup: :2thmup:
# شغالتنا الهنديه قالتلي :icon28: :icon28: :icon28:
#سولفت مع سريلانكيه :freak6: وابشركم اكتشفت وش تحط بشعرها :o :o
.....................الخ
توقع جانب المصداقيه من الناس شي طيب لكن ماناخذ كلام اي وحده شفناها بالشارع ونطبقه على روسنا !!
وكأن الي تكلمت بروفيسوره شعر ؟!
وبصرراحه اللي اعرفه ان مافيه بالعالم كله زي شعور الامااااااراتيات وهالشي معروف ...ماشآء الله حتى بناتهم الصغار طوووول ونعومه..قليل ماتلقين شعورهم قصيره وخشنه..ياليت يقولون لنا السرررر ;)

5-انتبهوا يابنات من الحاله النفسيه لكم تراها مهمه خصوصاً عند تساقط الشعر..اذا عندك ضروف معينه الله يعينك ويفرجها عليك لكن انتبهي تركزين على شعرك طمني نفسك انها مرحله وراح تعدي وتذكري ان الشعر تمر عليه مراحل ويتأثر لكن قولي انشاء الله راح يرجع لطبيعته..انتبهي انك تحطمين نفسك بكلمات مثل(شعري خلاص رااااح ,او مافيه امل يزين وينعم.., ياحساافة شعري.....الخ) توكلي على الله ولاتركزين علر الموضوع وتزعجين نفسك بدون فايده..

6-اذا الله عطاك شعر حلو وناعم ومافيه مشاكل تذكر لاتصيرين طماعه ..استفيدي من المعلومات واحتفظي فيها للخبره والاطلاع فقط يعني لاتستعملين شي زيادة على شعرك انتي مو محتاجه له جد..

7-خيراً اتمنى من كل اخت تكتب وصفه او منتج هنا انها انها تبتغي بذلك وجه الله والاجر والثواب اولاً وقبل كل شي..وانتم ماشاء الله عليكم وبدون مجامله مايحتاج الواحد يوصيكم بشي زي كذا بس حبيت اذكركم انشاء الله يكون لي فيها اجر...الله يوفقكم انشآء الله ويسعدكم يارب...

اتمنى اني ماكنت طولت عليكم...
ام عبد العزيز.....