مساء الخير،
راح أحاول أحكيلك القصة باختصار قدر الإمكان بس علشان تشوفوا أثر التسامح بين الزوجين شو بعمل وأكيد مش للتفاخر بنفسي أبداً...
أنا متزوجة من خمس سنين ونص وعندي بنت وولد، زوجي طيب كتير وبسيط كتير بس أكيد عنده مشاكل متل كل الناس ومن مشاكله إنه لسانه طويل كتير ومرات ايده كمان..
وأنا كمان قلبي طيب كتير ومتفانيه في خدمة بيتي وزوجي وأولادي لأبعد الحدود ومدبرة وشاطرة بس ما بحط واطي لما تصير مشكلة، يعني كلمة بكلمة، كرامتي ما بتسمحلي..
أنا زوجي بتصير كتير بينا مشاكل على أشياء تافه ما راح احكيها هلا بس من أهمها طولة لسانه وكلامه الغير مناسب ينقال قدام الأطفال وحتى معي، أنا ما بحب اللسان الزفر نهائياً حتى بالمزح..
المهم قبل أسبوعين صارت مشكلة بيني وبين زوجي سببها الأساسي طولة لسانه ورفع إيده علي، ضربني كف :mad: وأنا عملت مشكلة وزعلة كبيرة وقلبت البيت فوقاني تحتاني.. وصارت بينا قطيعة واحنا بنفس البيت..
الآن زوجي عنده مشكلة تانية هي إنه بدخن أرجيله في البيت، وأنا هذه من أول زواجنا مشاكل بسببها، كان في ليلة بحضر فيها قمت مستكتها ورميتها ورجعت كبرت المشكلة وضربني كمان مرة كف، وقتها ثرت وطلعت لأمه وقلتلها اللي صار ونزلت سمعته كلمتين في جنابه وكبرت المشكلة بيني وبينوا وحبال التواصل انقطعت بينا نهائياً، كأنه مش في البيت بالنسبة إلي وهو كمان..
الآن بنتي عمرها أربع سنوات طبعا حاسة إنه الوضع مش تمام، وكل يوم تيجي تسألني ماما إنتي بتحبي بابا، طبعاً أنا أحكيلها أكيد بحب بابا وبابا بحني واحنا بنحبك إنتي وأخوكي كتير.. بس هذا السؤال كان كتير يضايقني ويأثر فيه.
ومن يومين وبعد قطيعة أكتر من أسبوعين بيني وبين زوجي وفي وقت كنت أصلي فيه، قلت لنفسي الله يخزيك يا شيطان وربنا يهديكي يا زوجي.. والله الدنيا ما بتسوى الزعل وما بنعرف ايمتى بنموت، وشو إذا حدا فينا أجت ساعته واحنا زعلانين من بعض؟
وبعدها رحت على الغرفة كان هو لسة نايم، رحت وبسته على خده وقلتله "الله يسامحك" قام هو اتطلع فيه وقالي "الله بسامح الجميع".
وبالليل رجع على البيت وأول ما دخل أجى حضني وباسني وقاللي سامحني أنا غلاطان، وما راح تسمعي مني كلام متل اللي صار مرة تانية، وأنا بحبك وما بشوف بالدينا غيرك ومن هالكلام.. والحمد لله من بعدها صرنا سمنة على عسل الله يديمها علينا... قولوا ما شاء الله.
خلاصة الكلام، إذا قدرتوا تتسامحوا اتسامحوا، الدنيا ما بتسوى حدا ينام وهو زعلان من التاني.. ومتل ما قلت ما حدا بعرف ايمتى ساعته وإذا فقدت زوجي لا سمح الله أكيد راح أتمنى إنه يرجعلي حتى بكل عيوبه بس وقتها ما راح يكون هالشي ممكن.
يا ريت أكون قدرتك أغير اشي في أي مشاعر كره أو زعل على أي حدا حتى مش بس زوجك،وربنا يهنيكم كلكم وتصير أيامك كلها أحلى من العسل.:27:
القمر الأزرق @alkmr_alazrk
محررة برونزية
يلزم عليك تسجيل الدخول أولًا لكتابة تعليق.
fhh30
•
الله يسعدكم ويهنيكم صادقه ما في زي التسامح وللاسف الزوجه هي اللي دايماتراضي زوجها طبعا جنتها ونارها لكن اكثر الرجال ما يقدروا هذا الشئ
والله يأخوات لو نحتسب الأجر وأحنا نعامل أزواجنا وأنهم جنتناو نارنا كان يسلام وبتقل المشاكل كثيرررررررررررر
الصفحة الأخيرة
الله يسعدك