ادخلو شوفو وين المشكله في حياتي

السلام عليكم يامدامات وانسات عالم حواء
انا بدخل دوغري في موضوعي <<<مأجله الفلسفه وسعة الصدر وتقطيع المصران من الضحك وتقشيم الحب لين تسفهل:06:

انا واعوذ بالله من كلمة انا متزوجه من 6 شهور تقريبا
وانا في ليلة زواجي كان ضايق صدري مررره مادري ليش ووقت ماكان زوجي معي نصور كنت ابتسم له بس مجامله وعلشان التصوير المهم جتنا امي وقالت يله ماودكم تروحون للفندق انا هنا بغيت اصيح وجلست ااشر بعيوني لامي واقولها ماابغى اروح الحين فهمتني امي الله يخليها لي وقالت اجلسوا شوي

المهم ياطولين العمر يوم جت اللحظه الحاسمه وقت روحتنا وجابو لي عبايتي انا هنا جلست اصيح اصيح من قلب واي وحده تسلم علي اصيح واصيحها معي وجت صديقتي تسلم علي انا هنا ماقدرت اقاوم وجلست اصيح واقولها فلانه ماابغى اروح ماابغى اروح
المهم محد عطاني وجه ولبست عباتي ورحت ويوم ركبت السياره جاء ابوي يسلم علي وخالي وانا اسلم على خالي من كثر صياحي صيحته معي<<<قالبتها نكد

المهم رحت للفندق وكنت طول وقتي ساكته وان سألني ماغير اهز راسي تقل هنديه وعلى هالحال لين من بكره المغرب
وبعدها رحت لاهلي ومن يوم دخلت وشفت امي انفجرت صياح قدامهم (امي وابوي واخواني)هم ارتاعو قالو فيك شي قلت لهم لا
المهم جلست مع اختي شوي وهدتني وضحكتني وبعدها طلعت منهم وجلست كم يوم في الرياض وبعدها سافرنا شهر العسل(والله العظيم يااخوات من ليلة زواجي لين ماسافرت وانا يوميا اجلس اصيح احس فيني ضيقة صدر بس مو قدام زوجي )
سافرت وطول ماانا هناك احس مافيه شي يحسسني اننا متزوجين ومعاريس كان برنامجنا هناك نقوم الصباح وننزل نفطر وبعدها نطلع نتمشى ونتغداء ونرجع للفندق نريح وبعدين نطلع مره ثانيه علشان العشاء ونرجع ننام(لحد هنا تقولون برنامجكم مافيه شي صح)بس انا بقولكم انني مااسولف معه ومااضحك ضحكة وحده فرحانه شي يخليني مااقدر اسولف معه واخذ واعطي
جلسنا على هالحال اسبوعين وبعدها رجعنا لديرتنا ولاتغير شي كان يسود الصمت في بيتنا لدرجة اني صرت اتحاشى الجلوس معه يااما اكون في المطبخ ولا في غرفة الملابس ولا في اي مكان وكنت انبسط مره مره اذا طلع وراح لشي واذا رجع ارجع زي ماكنت
بعدها بكم يوم كنت عند اهلي مسكتني امي وقالت لي فيك شي شكلك مو عاجبتني انا هنا خنقتني العبره وقعدت اصيح عندها وقلت لها انه فيني ضيقة صدر قالت لي اجلسي عندي اسبوع بس انا رفضت ورجعت للبيت
بعدها باسبوع كنت معزومه عند حمولتي ويوم جيت كنت مره مره متضايقه بشكل غير طبيعي ورحنا ننام وانا منسدحه على السرير حسيت بشي يكتمني قلت لزوجي بس ماصدقني توقعني ابالغ انا قمت وطلعت للصاله الساعه 3 الفجر وقعدت ادور فيها يوم شافني طولت طلع لي قالي وش فيك قلت احس اني تعبانه مره وبموووت وكل ماقرب مني انا بعدت عنه لحد مالزقت بالجدار وقعدت اصيح وقلت له ودني لاهلي هو رفض قالي الحين الفجر قلت له ودني الحين الحين ووداني لهم دخلت على اهلي الفجر وراحت اختي تقوم امي ويوم جتني قالت وش فيكم متهاوشين انا قلت لا وضميتها وقعدت اصييييييييييييح واقولها يمه ماابيه ماابيه هي هدتني وقالت نومي الحين ويصير خير
طبعا انا انسدحت ونمت نومه تجنننن من زمااان مانمتها
من بكره وانا جالسه مع امي فوق جاء زوجي بيشوف وش السالفه والله العظيم يابنات لا شعوريا من دريت انه جاي قمت من مكاني ورحت لغرفة خواتي جتني امي وقالت وش فيك قلت لها لا شعوريا خايفه يمه ياخذني غصب
جلست على هالحال تقريبا شهر مستحيل اكلمه مااقدر بس كلمت امه واخته بس هو لاااا:06:
بعدها كني بديت اكلمه شوي واطلع معه بس مستحيل اروح لبيتي نطلع وارجع لاهلي
وجلست على هالحال تقريبا 3 شهور كنت اكلمه فيها وصرت طبيعيه الحمدلله بس كنت رافضه الرجعه لبيتي قررنا ننقل عنه قلنا يمكن هو السبب ب سقبل ماننقل قررنا ناخذ شقه مفروشه نجرب حياتنا فيها
والله العظيم يابنات من قررنا ناخذ الشقه المفروشه وانا ماغير اتعذر واتنحش ماابغى اطلع معه وكم مره تهاوشنا علشان هالموضوع لحد ماغصبت نفسي من كم يوم واخذنا شقه ورحنا فيها والله والله من تسكر باب الشقه علينا والصمت سايد المكان بس جالسين قدام التلفزيون ونفس الشي ان سألني سؤال وارد غطاه بس طلعنا نتشعى وانا طالعين كنت اسولف معه عادي ويوم رجعنا للشقه رجع لي نفس الي صار لدرجة اني مانمت معه على نفس السرير
من بكره وداني لاهلي وكان بيروح لمشوار وانا عند اهلي ارسلت له مسج وقلت له ان نفسيتي زفت وبجلس عند اهلي وانا الان عند اهلي احس اني مااقدر اعيش معاه مااقدر
احيانا اقول في نفسي ابرجع وبتصير الامور تمام بس من اطلع معه يجيني شي مدري وشو ماانبسط لين يرجعني لاهلي

الي تقراء قصتي ياحلوين تشوف وين المشكله فيه وتعلمني

احب اضيف بعض النقاط للموضوع
*رحت لمشايخه مو لشيخ علشان يقرون علي بعضهم قالوا فيك عين وقرو علي بس مااحس ان حالتي تحسنت
*في بداية زواجي استخدمت حبوب حمل وقلت يمكن منها ضيقة الصدر وتركتها بس يوم اخذنا شقه مفروشه رجعت لي نفس الحاله
*انا وافقت عليه بكيفي يعني مو مغصوبه الحمدلله
*احيانا افكر اني اطلب الطلاق واريح نفسي من ضيقة هالصدر دام اني كذا وبأول الطريق وكل من شافني قال ناااااااااااااااحفه مررررررررررررررره وانا صدق مره ناحفه
*يوم كنت في بيتي كان حدي قميص حرير لحد الركبه ويعتبر عندي شي وقت النوم يعني ابدا ابدا ماافكر البس خفيف ومفتوح وماادري ايش

وبــــــــس
استناكم ياحلوين