ادعولي يابنات ................ ماتت ابنتي رابع العيد

اللهم لك الحمد كما ينبغي لجلال وجهك وعظيم سلطانك

في البداية كان حملي ببنتي لين طبيعي وكان وضعها ماشاء الله ممتاز ولكن فجأة جاني التهاب بالبول واعطاني الدكتور مضاد حيوي واستعملته لكن حسيت إنو الالم زاد في الجهة اليسار عند الكلى / المهم راجعت الدكتور وقالي اعملي تحليل وطلع الالتهاب زاد بشكل خيالي ، سألت الدكتور ايش مخاطر الالتهاب فقال : يسبب فتح لكيس الموية
وسبحان الله سألتو السبت في الليل وصباح الاحد بدات تنزل علي الموية وبدأ الطلق رحت للدكتور فقال الرحم مفتوح ثلاثة سم ، واعطاني تحاميل توقف الطلق عشان يقدرو يئخرو الولادة عشان يعطوني ابرة الرئة للجنين ، والحمدلله وقف الطلق معايه واعطوني الابرة وحاولو انهم يمنعو الولادة لان اليوم الواحد في بطن الام عن 10 بره المهم فجر الثلاثاء بدأ معايا الم الولادة وقد ماحولو يوقفوه مافي فايده / اذا اراد الله شيء محد يقدر يمنعه .
المهم ولدت في الاسبوع 27بتاريخ 6/8/1430 وكان وزن بنتي 900جم وحطوها في الحضانة وحطولها جهاز الاكسجين واستمرت عليه تقريبا 7 ايام والحمدلله اتحسنت رئتها وبعد كده بدأو يعطوها حليب عن طريق الانبوب لكن مااتحملت صار عندها انتفاخ غريب فوقفوه وضلو بعد كده يحاولو معاها ولكن استمرت المشكلة هذي لكن الامور الباقية الحمدلله كانت مستقرة وكانو يغذوها بالمغذيات وكان الدكتور يقولي ان شاء الله اذا اتقبلت الحليب وزاد وزنها ووصل 1900 نخرجها
كنت ازورها يوميا وأقرأ عليها ، الين جا ت ليلة العيد ورحت اشوفها لقيتهم رجعولها جهاز التنفس وقالولي عادي تعبت في الليل وحطيناه لاتخافي
وفي اول ايام العيد اتصلو وقالو تعالو شوفوها طبعا لمن رحت لقيت لونها غامق مايل على كحلي فقالولي هذا عشان نزلت نسبة الاكسجين في الدم وكمان الضغط مره نزل عندها وعندها حموضة شديدة في الدم فقابلنا الدكتور وسألناه عن السبب فقال والله الى صباح يوم السبت وهي زي الفل لكن فجأةانقلبت حالتها 180 درجة ، المهم رحت البيت والله سبحانه وتعالى يعلم بحالي ورجعت ثاني يوم العيد ولقيتها راحت في غيبوبة وتنفسها مره ضعيف وضغطها مره منخفض
وطلبو المستشفى مننا نرسل عينة من بولها لمستشفى التخصصي بالرياض ونزل زوجي لجدة عشان في العيد مايشتغل الا مركزهم الرئيسي ولما وصل قالو مشيت السيارة مافي توصيل للرياض الا يووم الخميس فاتصل على الدكتور عشان يسألو عن عينة البول إيش يسوي فيها إلا الدكتور يقولو مااقدر اكلمك لانو قلبها وقف وبنسويلها انعاش
وسبحان الله رجع اشتغل قلبها ورحنا شفناها لقيتها حبيبتي مره تعبانة وضغطها نازل مره والتنفس ضعيف وفمها عليه دم
وحسيت انها بتحتضر ولكن الامر كله لله مابيدي شي الا الدعاء
رابع يوم العيد اتصلو علينا الساعة 4 العصر وقالولنا انها ماتت ، طبعا اهلي حاولو يمنعوني اني اروح لكن ي رحت مع زوجي ولقيتها حبيبتي ملفوفة ومحطوطة في السرير فكيت الرباط وشفتها لقيتها حبيبتي زي النايمة طبعا الله سبحانه وتعالى هو العليم بقلبي وحزني عليها لانها مسكينة من يوم ولادتها وهي بالابر حتى شعرها حلقوه عشان يدورو على وريد ، وبعد مغلق ابوها الاجراءات اخذها وغسلها ودفنها وسبحان الله مالها نصيب تجلس في حضني الا وهي ميتةوما تلبس الملابس الي اشتريتها ولكن لبست الكفن واتوسدت التراب
فاأسال الله العظيم أن يشفعها فينا ويعوضنا خير يارب وعذرا على الاطالة