ادعو لي ولا تنسوني

السلام عليكم ورحمة الله وبركاته


مراحب حبيباتي

يمكن كثير منكم ما يعرفوني وجديدة بهالقسم ، لكني قررت بعد تفكير اني انقطع عن القسم

رغم اني متزوجه من سنه ونص بس لكني تعبت من كثر المواضيع اللي اقراها هنا صار القسم ادمان ادخل اطمن علي البنات وادعي لكم بصمت حتى لو ما رديت وهالشى مخلي موضوع الحمل 24 ساعة بتفكيري

استفدت منكم كثير يا ربي يخليكم ويفرح قلب كل محرومة وطالب ذريه
بعد فشل عمليه تلقيح صناعي وعمليه اطفال انابيب ماادري اقول يأست او تعبت من اول شهر بزواجي على طول راجعت سنه ونص كله مستشفيات لعبت بروحي من الابر والحبوب من زود حبي للاطفال .

اقرا تجاربكم وعدد مرات العمليات واقول ياربي من وين اجيب صبر والله يساعد قلب كل وحده متاخره كلام الناس والمعاناه والاحلام والحساسيه والمشاكل اللي ممكن يصير بسبب هالشى بين الازواج .

مو قادره اتخيل اني اعيد الكره معاناه وتعقيدات بالمستشفى ومواعيد والم ابر وادويه وانتظار :( وانا موظفه اضطر اقدم اجازه وكل اهلي مايعرفون مااحب احد يعرف وكل من يسأل وش فيها اماني وينها ما نشوفها واحبس روحي واحس بالذنب لما اطلع ( ياربي يرزقنا من غير عمليات )

طبعا زوجي كان عنده ضعف بسيط ومواصل علاج والدكتور مخبرنا ممكن يحصل حمل طبيعي وانا سليمه

عملنا بكل الاسباب وكان عندي ثقه بالله 100% انه بيعطيني لو عملت عمليه كنت خايفه من توام او ثلاثه لكن ربي مااراد ..

فقررت اني اقطع دخولي هنا فتره علشان ترتاح نفسيتي .. واول ماربي يعطيني راح ارجع ابشركم .

ومثل ما ادعي لكم بكل صلاه بظل ادعي .

وماابي منكم غير دعوه صادقه الله يعطيني ويعطيكم يارب اتعب كل شهر وانا احسب ايام تبويض اقرا اعراض الحمل كل مااقول لا ما راح اقرا الشهر الجاي لا شعوريا اتخيل وافكر واقراها واعيد اقراها وكله كوم ولما عملت العمليه كوم تخيلو كل يوم افتح النت اعراض اليوم 11 واللي بعده 12 وهكذا كل الايام ..
وبعدين احس باعراض الدوره واصير عصبيه مره وكل شهر تجي احس بغصه وافش غلي في زوجي مسكين . تعبت من الاحلام والاماني والخيالات انا مو صغيره عمري 31 . يمكن اكون اكثر من غيري احس بمعنى الصبر وكلام الناس لاني تزوجت متاخره لكن يمكن الصبر بدأ ينفذ ، كنت خايفه من الزواج اقول متى بجيبهم متى بربيهم وسبحان الله ربي ما كتب لي .ماادري تعرفون هالاحساس او لا لما تمر كل سنه وانتي زي ماانتي ماتغير بحياتك شى الناس اللي اصغر منك تزوجو وجابو الاول والثاني وانتي مكانك لدرجه كرهت الاعياد والجمعات سنين من عمري مرت من غيره وبعد ما ربي وفقتي بزوج لسا ما حصل الحمل واكتشفت انه هالشعور متعب اكثر من الاول يارب رحمتك .والاصعب تلقين كل اللي حولك يكلمك في هالموضوع وين ما تلتفتين تلاقين يا وحده والده يا تبشرك بالحمل .

الحمدلله والشكر على كل حال.. ادعو لي يابنات ولاتنسوني رجاءا قلبي ماعاد يتحمل كلام ونغزات ونظرات واكره سؤال وش تنتظرين وقتها مااعرف وشو ارد اقولهم انتظر رحمة ربي ولا ايش .