اذا اجتهدتي في شي معين عادي احد ينسبه له و يتجاهلك..حركة سلفتي!!!!

السلام عليكم و رحمة الله
كيفكم اخواتي وكل عام وانتو بألف خير بمناسبة العام الدراسي الجديد.. والله يوفق اطفالنا و يبلغنا فيهم ما نتمنى ❤️❤️
اخواتي انا ولله الحمد هاوية طبخ ( مو طباخه لا فقط هاويه ) وصرت معروفه بين اهلي و اهل زوجي و صاحباتي بهالشي واصور كثير والكل يعرف . وكثير منهم يسألوني عن اي استفسار يخص الطبخ او ادوات الطبخ .. يعني قدرت اثبت نفسي بهالشئ..
حصل لي موقف جدا ضايقني .. سلفتي دايم تسألني عن بعض الاصناف و الطرق المعينه في الطبخ واحيانا اكون في بيتها وادخل معها مطبخها و اعلمها بالضبط هالاكله كيف تتسوا وكيف طريقتها .. واعطيها من اسرار الطبخ اللي اعرفها ومرات تسألني عن وصفه واصور لها الخطوات من بيتي .. وللأمانه هي بنفسها تمدح طبخي سواء عند اهلها او اهل زوجي .. اللي حصل ان في اكله جربتها عندي وعجبتها مره و طلبتني الطريقه و عطيتها الطريقه وكل المكونات الخاصه حقت الاكله.. طبعا هالاكله انا تدربت عليها و سويتها اكثر من مره لين عرفت اسرار نجاحها وعلمتها انا بكل الخطوات … وصارت تسويها في بيتها لزوجها و عيالي وحبوها حتى هم لدرجة تسويها ثلاث اربع ايام ورا بعض .. اللي حصل انه مره سوت جمعه في بيتها و كل حمولتنا حضرو.. وسوت هي هذي الاكله بإعتقاداها انها اكثر صنف بيجملها عند المعازيم.. حتى انها نادتني للمطبخ عشان تسألني كيف احط كمية كذا و متى احط هالشي لانها سوت كميه كبيره للضيوف .. ويوم اكلو منها الكل انهبل وجلسو يمدحون في الاكله للأمانه توقعتها بتقول (فلانه علمتني عليها وانا اضفت لمساتي) .. هذا اقل شي المفروض تقوله بس ما تكلمت انا بصراحه حزت بخاطري بس قلت اكيد ما جا في بالها .. ويمكن لانها ما حست بتعبي في هالاكله اول ما بديت اتعلمها وكيف اضفت لها مكونات جديده وكيف كنت ابحث في مقاطع اليوتيوب و كيف تعبت وطلعت معي بهالنتيجه اللي هي تعلمتها مني في الاخير بكل حذافيرها فعذرتها .. بس قبل فتره كانت في بيت اهل زوجي اللي هم اهل زوجها و سوت نفس الاكله وعجبت الكل و برضه مااا ذكرتني اني انا اللي علمتها..!!!
عارفه بعضكم بيقولي ماعندك سالفه ،، بس انتو لو تتعبون في شي معين مثل طبخ او تكتسبين خبره معينه و تبذلين فيها جهدك ويجي شخص ياخذها بطلبه و برضا منك .. اقل شي اقل شي انه يذكر انه تعلمها منك هذا اقل شي … اعتقد ان هاويات الطبخ او الطباخات او اي وحده عندها مجال تتعب فيه هم بس اللي بيفهمون قصدي .. انا ما حبست العلم اللي تعلمته انا اعلم عادي لو عدوي علمته بس ما احب احد يبخسني حقي و كأنه ينسب تعبي له مافيها شي لو ذكرت انها تعلمتها مني !!!
اذا حتى طباخات الانستاقرات اغلبهم يكتبون ما احلل نقل الوصفات من غير تاق او منشن !! وهذا من حقهم طبعا ….
للأمانه فكرت اني ماعاد اعلمها عن شي من اسرار طبخي او اي مكون خاص لأي صنف .. وبنفس الوقت ما احب حركة اذا سألتني عن وصفه ما اعلمها او اصرفها بس هي اذا بتبخسني بضطر اصير ما اعلمها .. بقولها هالاكله اسمها كذا ابحثي عنها في اليوتيوب وبس ..
رأيكم يهمني ❤️❤️❤️