اذا احد قال لك
مشكوره ماتقصرين
او ماتقصرين بس
وش تردين ؟

كل عام وانتم بخير♡♡♡♡♡

مره رحت ابارك لقريبة زوج خروج ولدها من السجن والحرمه ومو بالعتني كذا بدون سبب وهم من عاداتهم في ظروف زي كذا تقولي قرة عينك بس عجوز النار ردت علي بصوت واطي عمت عينك ع بالها ماسمعتها وانطنشت سلمت عليها وع البنات وباركت لهم وطلعت بس ماعرفت الرد اذا احد قالي قرة عينك خايفه اسوي زيها وقول عمت عينك😫😩

جمعت لي قاموس 😁للحالات الطارئه احيانا تسكتي وتوقف الحروف ونفسك يوقف معها عشان كذا جبت لكم هذي الكلمات دعواتكم لي بالعفو والعافيه ولذريتي
اذا قيل لك محلوه اليوم او حلو لبسك او ماكياجك اواي شي =الحلوه عيونك او الله يحلي ايامك
ماتقصرين =انابالخدمه حببتي
كيف حالك وحال الاهل والاولاد =الحمدلله بنعم الله يديمها علينا وعليكم
وعساكم وكل من يعز عليكم بخــير
اذا بتودعين احد =استودعكم الله اللذي لاتضيع ودائعه .. يسر الله دربكم .. عين اللي ماتنام تحفظكم
او يحفظكم اللي عينه ماتنام
الله يحفظكم وين مارحتو او (( كــنتو )) ..
او ترافقكم السلامه
اذا قالت مع السلامه =الله يسلمك من كل شر ويحفظك
تصبحين علي خير=تلاقين خير طبعا عند النوم نوع من الاستئذان
اذا الصباح صبحك الله بالخير= صبحك الله بنور والرضي والسرور
اذا مشغولين :: الله يشغلكم بالخـــير ..
اذا حد اعتذر وقال عن اذنك =اذنك معك ههههههه اكيد اذنه معه وين تروح يعني 😝
لاحد ناداني .. :: نـــعم ... سمي .... امري ..
اذا امي نادتني =آمريني جعلني افداج بعيني وماها
واذا احد طــلبني شي .. وكنت قادره عليه
ابـــشر بعـــزك .. يرخصلك الغالي .. ماطلبت شــي .. غالي والطلب رخيص ..
انت تامر امر اذا تعزينه
اذا احد سوالك خدمه =الله يعطيك العافيه ماقصرت ،مشكوره ياقلبي ماقصرت، جزاك الله خير ،
خدمك المال والبنون والزوج الحنون ،جعلك بالجنه ووالديك ، الله يسعدك ،الله يرضي عليك الله يجعل بكل خطوه خطيتها حسنات ،اذا ابوك عطاك فلوس او زوجك =الله يخلف عليك بكل ريال عشره تتضاعف الدعوه من اختراعي 😉جربوها يمكن يدفعون لكم من غير مايحسواابس شرط النص بالنص هههه
او الله يرزقك من واسع فضله .
اذا قالت تعبتي معي =تعبك راحه ياقلبي.
واذا احد مدحك او شي اقولها تسلمين ياعمري ..
واذا في نفاس وقالت طالعه من شر او الله يطلعك من اخر شره=الشر مايجيك
اذا وحده ظلمتك =الله يسامحك "الله يهديك .
كلمات متداوله "
مقصره معاك ومااشوفك =ولو فيك الخير،معذوره او عذرك معك ،الله يكون بعونك
اذا احد لبس جديد =ملبوس العافية او لبس العافيه عليك بالعافية
البس جديدا وعش حميدا ومت شهيدا
واذا احد قالك نعيما علي الاستحمام او قص الشعر =نعمة حالك
الله يعطيك على قد نيتك
الله يرزقك بالذرية الصالحه
عسى الله يعوضك خير
مبروك الزواج بارك الله لكما وبارك عليكما وجمع بينكما بخير
الله يوفقك ويسعدك
اذا وحده جلست تنقدك وزودتها قولي من ذوقك حببتي 😷
واذا قريبه منك مرره بحيث ماتزعل قولي المره الثانيه اشاورك 😋وعطيها ابتسامه كانك تقولين ماسالتك
او حتي تمدح شي نفس الكلمه تمشي هههه قولي من ذوقك حببتي .
او مدحت شي لبس او شنطه اي شي معك =مايغلي عليك .
اذا احد من زمان ماشفتيه=-وينك من زماااااااااااااااان عنك لك وحشة
- أشتقت لصوتك وقعداتك او سوالفك
تحرمينا من شوفتك تراك غالية علينا حيل
اذا بتعطين كاس مويه =هناء وعافيه
اذا عطاك حد مويه وكنتي عطشانه =الله يسقيك من حوض نبيه او من نهر الكوثر.
اشلونك =بخير يامال الخير او بخير دامك بخير
وحشتيني =مايوحشك غالي حببتي
اتفضلي =دام فضلك
تسلمين الله يطولي عمرك
لما احد ينادينيك ارد : سم , امر , تدلل
عند المباركة للوالدة : مبروك ماجاكم الله يجعله بار صالح حافظ لكتابه
او بورك لك في الموهب وشكرت الواهب وبلغ اشده ورزقت بره
فحالة المواساة : الله يجعله آخر الاحزان
عند الشكر : ولو عزيزه وغاليه , ابد ماطلبتي شي غاليه و الطلب رخيص 'آمري كم فلانه عندي
اذا كنت افكر في احد و طلعلي فجأة سواء شفتها او اتصال منه : القلوب عند بعضها تو على بالي
او قالت لك مكياجك حلو اليوم تردين عليها تقولين لها = عيونك احلى
الحلو ما يشوف الا الحلو ين
في بعض الناس لاحظت تحاول تحبطك بشكل غير مباشر
تقولك انتي شهادتك ما فادتك بشيء
ردي عليها انتي مبتسمه
الارزاق بيد الله اذا الله ما كتب لي اشتغل ماراح اشتغل
اذا قالت ليش ماتزوجتي للحين =قسمه ونصيب .
ليش اخرتي الحمل احراج وخاصه اذا قالت هو يبي ولاانتي ولا ماعالجتي ولا منه الخلل =الله يرزقنا او ماعلى الله عسير وتسكت 😉.
الزوج حلو تخصينه بكلمات يحس انه له فقط (ياقلبي ياعمري فديتك حبيبي الله لايحرمني منك ياغالي حياتي ،حبي ،،سندي ،روحي،اسمه.تصغير له الخ ..)
اذا طلبات مثلا :- شوكولاته بيضاء بياض قلبك " فراوله مثل حبك" قفازات زرق مثل عيونك ههههه
هذي بغيت انجلط معليش ماهضمتها😂
الوالدين (الله يقدرني وارد بعض تعبكم ، تاج راسي،نور عيوني،ماعاش من زعل الحب،الله يخليك لنا ،جعل يومي قبل يومك ،ماتشوف شر جعله فيني ولا فيك، جعل الجنه مثواي ومثواك، الله يجمعنا بالجنه علي سرر متقابلين احسن كلمه سمعتها .
منقوول بتصرف مع اضافات 😊

هههههههههههههههههه الله يهديها
المعروف إذا احد قال قرة عينك تردين بعين نبيك معناه تقر بشوفه النبي صلى الله عليه و سلم احفظيها لا تغلطين بالرد و تزعلين الناس ههههههه