اذا حماك قال هالكلام عن زوجته ، وش تسوين ؟؟ ( استشاره )

بادخل في الموضوع على طول

سلفتي انسانه محترمه ولها جمايل كثيره علي ايام حملي وولادتي ونفاسي وحتى في الايام العاديه صح تعاملها رسمي معي لكن وقت الحاجه القاها جنبي دايما
المهم احنا ساكنين مع اهل ازواجنا
وسلفتي سافرت لانها نفاس عند اهلها في مدينه ثانيه
وام زوجي قالت لي اذا سويتو غداكم وعشاكم احسبوا حساب فلان معكم اللي هو حماي زوج سلفتي اللي اتكلم عنها وقالت لين عاد ترجع زوجته وانا والله ماقصرت كل يوم ازود الغدا والعشا وامه توديه له والحمدلله ماني مقصره بشي ابد
المهم الموقف صار قبل يومين ان ام زوجي وهي كبيرة سن ومريضة عندها ضغط وماتقدر تسوي شي واحنا نسوي عنها كل شي بالبيت قالت لي حطي عشا حماك المهم انا كنت مسويه عشا مرتب ومعاه حلا وودت امه العشا له في غرفة الاكل وانا كنت ارتب المقلط لانه كان محيوس والمقلط بينه وبين غرفة الاكل باب مسكر طبعا وانا اشتغل اسمعهم يسولفون والله جا الكلام باذني بدون قصد وماكنت ادري
قالت له مااكلت الا لقمتين كمل عشاك قال شبعت قالت له وين شبعت مااكلت الا لقمتين اخاف مااعجبك الاكل قال لا زين العشا والله بس اشتقت لطبخ ام فلان ( زوجته ) والله مايطعم بفمي الا الاكل اللي من يدها ضحكت امه و قالت مابقى شي وتجيك وتشبع من طبخه

هذا الموقف اللي صار واللي سمعته عادي طبعا مااكذب عليكم ان الكلام حز بخاطري شوي بس لاني تعبت بالطبخ ومااكل منه بس عذرته يمكن مايقدر يغصب نفسه لكن بنفس الوقت انبسطت على الكلام اللي قاله عن زوجته وجاني شعور قوي اني ودي احكيلها الموقف يمكن تنبسط وتفرح لان انا لو زوجي هو اللي قال هالكلام عني وربي استانس حيل

فانا محتاره وش رايكم هل اقولها الموقف اللي صار ولا مايستاهل اني اقوله واخاف اقوله لها وتكون عارفه اصلا واتفشل او ان الموقف عادي ومايستاهل
وانا نفسي افرحها لو شوي لان على كثر جمايلها علي ماقد صارت فرصه اني اقدم لها معروف او اسوي لها شي نفس مواقفها معي

انتظر ردودكم