اذا عندك ضيوف لفطور رمضان وش تسوين ؟؟؟؟
حبايبي الغاليين كل عام و انتن بخير حبيت اعرض لكم تجربتي المريحة في عمل فطور رمضان اذا كان عندك ضيوف بحيث انك تستعدين من بدري و لا تتكركبين و تنسين أي شي و تعفسين نفسك و زوجك و اولادك ... بسم الله نبدأ .
1. اول شي الفطور الاول اذا انتو من اللي يفطرون مرتين انا شخصيا من هالنوع ابدي من اليوم الاول قبل العزيمة يعني بعد ما تفطرين زوجك و الاولاد و ترتاحين شوي و تصلين العشاء و التراويح تبدين بتجهيز التمر في صحونه الخاصه و تغلفينه و تفرشين السفره في المكان اللي بيفطرون فيه الضيوف و تحطين التمر لانه ما يخترب اذا كان مغلف كويس و تحطين على السفره فناجيل القهوة و المناديل و الملاعق للحلا و الكاسات و غيره من الاشياء اللي ما تخرب.
2. بعد ما نخلص السفره تشدين همتك في المطبخ و تبدين تحطين قائمة بالاشياء اللي راح تسوينها يعني حلا الفطور الاول مثلا اذا هو بسبوسه تسوينها او بلح الشام او معمول او أي شي تحبين سويه و حطيه بالثلاجه . كمان سوي عصير الفيمتو او سن كويك سويه و غلفيه كويس عشان ريحة الاكل ما تطلع فيه.
3. خلصنا الحلا الاول نجي لحلا الفطور الثاني أي شي تحبين سويه وعلى طول بالثلاجة.
4. الحين نبدأ بعمل المشمر و المحمر طبعا الشوربة يحتاج لها لحم و بصل و طماطم طلعي اللحم و نظفيه و قطعيه صغار و رجعيه الثلاجه بس عشان على طول تستعمليه على طول بدون ماتقطعين اليوم الثاني و لا شي . قطعي الطماطم و احسبي حساب البيتزا و مكرونه البشميل او العاديه يعني على حسب الكمية اللي تحتاجين في طبخاتك . و حطي بالثلاجة .
5. مسكينة هالثلاجة وش تستحمل ... المهم اذا بتسوين مكرونة بشميل جهزي الحشوة من بدري و اذا بتسوين ورق عنب سويه من اليوم الاول ما راح يخترب أي اكله ما تخترب سويها من اليوم الاول .
6. السمبوسة الرقاق ممكن تسوينها من اليوم الاول و تحطينها في الفريزر.
7. تاكدي ان عندك قهوة و هيل كفايه عشان ما يجي يوم العزيمة و تقولين جيبو.
8. كمان نظفي البيت و عدليه وجهزي كل شي.
9. يوم العزيمة قومي بدري شوي وسوي الفطور الشوربة سويها على طول و خلي القدر على طرف يعني شيليه من الفرن لانه ياخذ مكان. و طلعي كل شي يبيله طبخ او قلي و سويه .
10. جهزي السفره الاولى و خلصيها و سكري الباب عشان الاولاد.
11. حطي شوية فحم على النار و لما ياذن حطي البخور على طول عشان ريحة القلي وابدي سخني الاكل على مهل و حطي اكلك بعد الصلاة على السفرة .
12. بكذا ياحلوات ماراح تتورطون اذا جاكم ضيوف اذا استعديتي لكل شي من بدري و نظمتي وقتك و خليتي عيالك يساعدونك.
اتمنى انكم تستفيدون من تجربتي و تسوونها و تعطوني رايكم......
وياريت تسامحوني على الاطاله.......
سمن و عسل @smn_o_aasl
عضوة شرف في عالم حواء
يلزم عليك تسجيل الدخول أولًا لكتابة تعليق.
الـــ عديل ـــــروح
•
ميرسي بكووووووووووووووو:26:
أنا مين؟
•
والله انا دايم احوووس اذا صارت عندي عزيمة..
ترتيب السفرة من الليل هي الي لفتت انتباهي..
جزاك الله خير:26:
ترتيب السفرة من الليل هي الي لفتت انتباهي..
جزاك الله خير:26:
الصفحة الأخيرة