اذا قلتله نطلع السوق يقوم الدنيا ولا يقعدها ..

انا في مدينه بعيده عن اهلي .. والمدينه اللي انافيها مافيها احد اعرفه ..

يعني من اجي من عند اهلي .. ماعاد اشوف احد ليييييين اروح لهم ثانيه ..

تعرفت على جاراتي .. وبعدين انقطعت عنهم .. بسبب زوجي ..

هو يحب اني اتعرف على الناس .. بس اذا قلت له جب لي اغراض بسوي حلا والا جب مكسرات .. والا ابشتري صياني جديده عشان اللي عندي قديمه يتضايق ويصير هوشه بعض الاحيان ..

وانا صراحه كرهت اني اعزم الناس على شي يفشل ..

وقطعت بالعالم .. والله ان مواعيني قديمه من 7 سنين ماغيرتها ..

واثاثي حق زواجي .. هو حلو الاثاث موب شين بس ماغيرنا فيه شي حتى الاكسسوار .. والبيت ينقصه اشياء كثييييييره .. والله بيتي اقل من عادي .. مقارنه ببيوت خواتي وخواته ..

واللاب توب حقي قدييييييييييييم ...... والجوال شرى لي قبل سنتين سوني اريكسون قعد معي سنه وطفى ماعاد يشتغل .. رحت انا وشريت لي من فلوسي .. جوال نوكيا موديل جديد يعني انا اللي مدلعه نفسي .. ويوم شافه تدرون وش قالي قال ترى ان خرب قبل 3سنين مافيه جوال << هذا وهو موب من فلوسه ..

والله العظيم ساعتي اللي علي لها 7 سنين .. شرى لي ساعه رخيصه بـ 200 وخربت على طول ..

يوم نفاسي الاول طلعني بطقم ذهب وبعد 6 اشهر جا زواج اخته قام باع طقم الذهب حقي وشرى لاخته طقم .. وقالي برجعها لك والله والى ساعتكم ماشفت شي ..

ذهبي بعته اغلبه واكل فلوسها ..

ويوم طلعت من نفاسي بولدي الوسطاني جمعت 7 ألاف .. وقلت له حطها لي باسهم في بنك البلاد .. وخسر وتحسبونه رجع خسارتي .. لا والله مارجع لي ولا فلس ..

والله اني مااشري ملابس زي الناس لا لي ولا لعيالي .. ملابسنا اقل من عاديه .. وكله عشان مانخسره .. هو يسدد قرض للبنك .. لنا 7 سنين وحنا نسدد فيه ..

واذا طلعنا للسوق يعلني علل اذا بغيت اشري لعيالي او لي .. والله يابنات الاكسسوار مالي فيه خبر والجزم وانتم بكرامه والشنط مالي فيها خبر ..

بس اشري تيورين للصيف وتيورين للشتا .. وتيور لعيد الفطر وتيور للعيد الضحيه .. واذا صرت ابشري اكثر عطاني محاضره وش طولها .. قسم بالله اني اكره نفسي ..

المشكله انه يشوف نفسه انه ماقصر معنا وانه مدلعنا ..

واليوم طلعني للسوق بشري ملابس صيفيه عاديه تمشينا لين ينزلون الصيفي لاني بروح لاهلي واهلي يقولون عندنا صيف .. يوم وجمعت للولدي الصغير ملابس .. وقلت له بروح اشري لعيالي الكبار .. وقال وشوله تشرين لهم .. عندهم ملابس العام .. تخيلوا .. وعيالك مايكبرون مايطولون .. ويوم قلت له كذا رجع الملابس حقت ولدي الصغير وقال ياللا مشينا للسياره ..

والله انبطت كبدي وبصراحه قعدت طول الطريق وانا اهاوش عليه .. قهرني مايبينا نصرف .. مع العلم ان راتبه معليه زين ..

وهو ساكت بس قالي اصلا انتي منتيب كفو من يشري لك شي ..

بنات وش اسوي معه انا رايحه رايحه لاهلي يعني موب عشان اني زعلانه .. اذا رحت لاهلي اطنشه ولا اكلمه ..

والا وش اسوي ..

المشكله انه متعود اني انا اللي اتاسف له دايما وانا اتاسف عشان ماتكبر المشاكل ولااحب الزعل يطول بينا ..