لمسه دفى @lmsh_df

محررة فضية

اذا كنتي معزومه عند ناس هذي وصيتي لتس.. تعالي ادخلي فديتس..

صباح الخير والمسرات..كيفكم اخواتي؟؟
قريتوا العنوان؟؟؟
انا بعطيتس على بلاطه لاني سمعت ناس كثير يشكون بس يستحون..

شوفي يااوخيتي ان كنتي معزومه على فطور برمضان ياليت اذا رحتي تجبين معتس طبق..تكلمين اللي عندهم العزيمه وتقولين انا بسوي هاالطبق..تساعدينهم.. انا موضوعي مو هذا..
الاهم عندي هو شي وااااحد انتس اذا رحتي لناس تفطرين عندهم ياليت بعد الفطور ع طول ترجعين بيتس؟؟

لان اهل البيت وراهم صلاه..راعيت البيت ودها تصلي التراويح مو تجلس معتس.. وتجلس هالمضيفه معتس الى الساعه 11 ليه؟؟ هي تبي تصلي.. الناس يبون الخير والاجر يبون يصلون..وانتي قطعتي عنها هالشي عشان وشوا عشان تسولفين والاعشان معندس احد..روحي بيتس الله يستر عليتس صلي واقري قران ماعليتس صلاه اقعدي استغفري.. لاتعطلين الناس عن اعمال الخير.. السوالف لاحقه عليها بس رمضان يروح وكله من وقتس.. حلات تصلين تراويح والمساجد تصلي انا وحده تسذا..
حتى لو راعيت البيت الزمتس تجلسين اعرفي انها تتعذر ..خلي الناس يصلون وبعضهم ياخذون غفوه بعد الطبخ والفطور..كوني خفيفه..
وغير تسذا على السفره وانتو تفطرون مو تقولين مثلا احنا لازم نحط على السفره هريس والامكرونه والا اي شي ثاني.. وهذا اللي قلتيه مو موجود على سفره الحرمه..لاتحرجينها..
انا مااتكلم من فارغ لان في ناس ماتستحي..همها نفسها..وان شفت بعيني بعد لاني كنت مره جالسه على سفره وصار هالموقف مع وحده..ومن جد اكسرت خاطري.. اكلي من خير الله وانتي ساكته..غيرتس ماعنده فطور احمدي ربتس..ياحليل راعيت البيت تطبخ وتسوي ومن الصبح وهي في المطبخ وانتي موعاجبتس..الناس ترى احاسيس ومشاعر.. وحتى لو مااعجبتس الفطور مو تروحين تقولين لاهلتس او خواتس او اي احد والله ان فطورهم ماش وقليل الاكل وقيماتهم قويه او ان اكلهم مافيه ملح او بارد..عيبن عليتس.. اخواتي انا صديقاتي صارت لهم مواقف كثثثثثثثثثثيره مع جماعتهم زي اللي قلت ويشكون لي.. لاتستغربون ان في ناس تسذا..الله لايبلانا..
وماانسى اذا جلستي ياليت يكون كلامتس في شي مفيد..موتقولين انا شريت من افخم الماركات وانا رحت واكلت في افخم المطاعم والا فصلت فستان بها السعر.. راعو مشاعر الناس ترى البيوت اسرار وفي ناس مساكين على قدهم واقل بكثير تلاقين على باب الله..وفي ناس ماتروح للمطاعم.. وفي ناس فساتينهم رخيصه على قدهم..رخيصه مره..مو تجين انتي وتقولين فستاني تعدى 4000 .. وغير تسذا مو تقولين انا واجد خطبوني وماادري وشو وقالو انتي جميله.. يااختي خلي عندس ادب وذوق راعي مشاعر الناس..لا والادهى والامر بعظهم اخرطي لا راحت ولاجت,, بس شايفه نفسها.. وصدقيني البنت اللي عايشه بعز وعندهم خير تلاقينها ماتمدح نفسها..
صار موقف مره قدامي..قريب لنا توه متزوج المهم انا طلعت من المجلس ماادري وش طلعني المهم يو جيت ادخل المجلس مره ثانيه الا العروس تقول لام المعرس وعمته هم اللي بس كانوا في المجلس تقولهم انا شريت مسكتي من جاردينا حق الورد.. واساسا ام المعرس وعمته عجايز مايعرفون الا الريحان والله مايفرقون بين الورد الطبيعي والصناعي وغير تسذا مايعرفون ينطقون اسم جاردينا هالعجز ياحليلهم اكبار مايعرفون الا سوق الحريم وحق المواعين.. وهذي جايه هالعروس تشوف نفسها على هالعجز..

يااختي خلي عندس ذوق ترى الذوق نعمه..اذا كان عندس ذوق احمدي ربي لان في ناس ماعندها ذوق..
خليتس متزنه مع الناس الهاي كوني هاي ومع الناس اللي على قدهم كوني قدامهم انتس زيهم مو افضل..لاتغترين بنفسس..

اخواتي انا كتبت هالموضوع لاني سمعت عن ناس وقريت وقالوا لي..واخرتها قريت موضوع وحده امس تقريبا زي اللي كتبت صار لها موقف,,يمكن قريتو موضوعها..

الله يستر عليكم...ويحفظكم ويتقبل صالح اعمالكم..اذكري الله وصلي على محمد..
سبحان الله.والحمدلله..

يلزم عليك تسجيل الدخول أولًا لكتابة تعليق.

تسجيل دخول

هذي غلطتي • 15 سنة

الله يعافيك والمسلمين اجمعين

استغفر الله واتوب اليه

أهون عليك..!! • 15 سنة

ما اقول الا ياااااااخف دمك ياشيخه

الله يرزقك الجنه قووووولي امين

علم حواء • 15 سنة

الله يجزاك خير درر
اللهم صل على محمد
ماشاء الله الله يكثر من امثالك
انا والله اتضايق من اختي لما تجينا تخيلي تقعد لين الفجر يوميا
صدق هي اختي بس هذا شهر عبادة
ابغى اغتنمه مو قادرة لان عيالها على راسي
غير الوقت الي تسولف فيه الله يصلحها
انا ماودي اقول عنها كذا لكن من جد شي مضيق خلقي
تجي من بعد العشاء الى الساعة ثلاث او2
والله اني عادي لو بللايام العادية لكن رمضان لربي حتى لو ماصلينا الاستغفار البرامج الدينية
كل هذا مااستفدت منه بهالشهر بسبب الزيارات الطويلة الله يصلح الحال ويكثر من امثالك

(alwan) • 15 سنة

مشكورة على النصيحة :)

نادر وجودي • 15 سنة

وربي سوالفيك تجنن
اسلوبك عسسل

وابشري ماطلبتي شئ
الف شكر ياقلبي عالموضوع الحلو الخفيف