اذا نقص ماء الجنين...هل يمكن ان تزيد ثانية؟ ضرورى للغاية

صباح الخير على كل حواء فى المنتدى

يا جماعة انا تعبانة و زعلانة و حالتى ما يعلم بيها الا الله
انا حامل فى الاسبوع 32 يعنى دخلت الشهر الثامن من يومين
و من حوالى اسبوعين او 20 يوم بالظبط بدات اقلق
حسيت ان بطنى محجرة و ناشفة و ان البيبى بيتحرك بالعافية
حسيت وقتها ان السوائل قلت و طبعا انا بقيت خبرة فى موضوع السوائل القليلة دة
لانى مريت بية مرتين قبل كدة
اول حمل السوائل قلت جدا و انا فى الشهر الخامس و لقلة خبرتى انا و الطبيب و الولد اللى كنت بتمناه اتوفى
تانى حمل بردة السوائل قلت لكن فى الشهر الثامن و ولدت بنتى الله يخليها لى فى اخر الشهر الثامن
و طبعا كانت و مازالت ضعيفة و تعبتنى جدا لكن الحمدلله هى اكبر نعمة فى حياتى
هذه المرة كنت عشمانة فى ربنا ان السوائل لا تقل لكن قدر الله و ما شاء فعل
نقصت السوائل و انا فى نص السابع و من يوم ما عرفت و انا فى حالة سيئة جدا
خايفة على البنوتة اللى جوة بطنى يحل لها حاجة لا قدر الله
الدكتور كتب لى على حقن سولكوسيريل و دى مش موجودة خالص حاليا فى مصر
و طلب منى اشرب سوائل كتير جدا و اعطانى مكمل غذائى علشان البنت تكبر شوية و يولدنى
و اعطانى جرعة كورتيزون بتاع الرئة من اسبوعين و جرعة تانى هاخدها بكرة و ميعادى يوم الاربعاء
و طلب منى تحاليل و اعطانى مضاد حيوى على امل ان السوائل تزيد شوية لكن بردة مازادش

هل فى احد حصل معاه ان السوائل قلت و رجعت زادت تانى؟؟
و لا دى حاجة مش بتحصل اصلا

ادعولى لانة احتمال اولد بعد اسبوع او 2 يعنى هكون فى نص الثامن
ادعو لبنتى تطلع سليمة ومعافاه و لا تحتاج الى حضانة