بسم الله الرحمن الرحيم
والصلاة والسلام على اشرف الانبياء والمرسلين سيدنا محمدوعلى اله وصحبه وسلم اجمعين
اخواتي هذا اول موضوع انزله في المنتدى وحبيت اكتبه لاني شفت العجب العجاب من ردود اغلب البنات هداهن الله ومواضيعهن !!
ونسينا او تناسينا قوله عز وجل (ما يلفظ من قول إلا لديه رقيب عتيد)
واوجه لهن اربع همسات اتمنى يتقبلونها مني بصدر رحب
اول همسه
اوجه كلماتي هذه للاخت الي تطرح مشكلتها
,انا ما انكر وجود المشاكل الزوجيه او المشاكل بين الزوجه والحموله (اهل الزوج
ولكن بعض البنات تجي تكتب مشكلتها من طرفها هي بدون ذكر كل اسباب المشكله والسبب الحقيقي للمشكله فتكون العضوه الي بترد في حيره او ترد من منطلق الي كتبته صاحبة المشكله فتصير كاتبة الموضوع مشتته كل وحده تقول لها كلمه بس لو نزلت المشكله كامله كان لقيت باذن الله الشيء الي يرضيها !!
والاغلبيه تنسى او تتناسى ان ام الزوج هي الي جابته لها لدنيا من بعد الله وخواته قطعه منه من لحمه ودمه وكلهن لهن حقووق عليه الام لها حقوق على ولدها بالبر والمصروف
والخوات لهن حقوق عليه بصلة الرحم وبعض الهدايا الي تقرب النفوس
بس للاسف اذا تزوجت الوحده هالشخص تشب فيها نار الغيره والحقد على امه او خواته
ليش يروح لهم وانا في البيت !!
طيب يمكن يبي ياخذ راحته معهم
!!
ليش اخته دقتني بكلمه !!ولا قالت لزوجي طلقها ولا تحرض زوجي علي ووو ..االخ
انتي تتهمينهم بس ما تدرين وش يقول زوجك من وراك !! يمكن في للحظة ضيق شكى لهم وما قال لك انه شكى لهم فصارت المشكله بينك وبين خواته ..
وامه اذا فضلت عيال اخوه على عيالك ولا عيال اخته على عيالك وشو له تزعلين !!
يا اختي المحبه والمعزه من الله هي اكيد ما تكرههم بس فيه فرق في محبتها لاحفدها وهذا شيء ما نقدر نحاسبها عليه لا بيدنا ولا بيدها !!
اكره اروح لحمولتي ما يحبوني !!
لو ما يحبونك ما خطبوك لولدهم وحتى لو على فرض ما حبوك مثلا خليك افضل منهم عند ربك ثم عندهم وترى كثر الدق يفل الحديد يعني ما يضرك اذا جبتي هديه لامه ...هديه لخواته ... تفجأينهم يوم بغدا او بعشا تودينه لهم !!الرسول عليه افضل الصلاة والتسليم ما ينطق عن الهوا قال (تهادوا تحابوا)
تراها اشياء بسيطه ما تضر بس تقرب النفوس من بعض ولاتنتظرين من احد حمدا ولا شكورا احتسبي كل الي تسوينه عند ربك اولا ثم لرضا زوجك ثانيا
وبعض المواضيع ينزلونها الخوات بصراحه وبدون زعل تررررررررررررفع الضغط وما كان فيه اي داعي تنزل الموضوع لانه ما فيه مشكله اصلا !!
لان زوجها ما وداها السوق !! ولا تأخر عند اهله !! ولا لانه ما جاب لها هديه !! و ..و .. الخ
اتمنى نرتقي في كتابة المواضيع
ثاني همسه
اخوات الزوج
يا اااالله انتي الحين مستوره في بيتك ومع زوجك ومبسوطه لازم تخربين بيت اخوك !!
من الكلام الي قريته
مرة اخوي وسخه ما تنظف !!
مرة اخوي ما تهتم في عيالها !!
اخوي مظلوم معها ما تهتم فيه !! ما تطبخ له !!
جالسه ع النت ما تتحرك !!
ما تزورنا !!
تحرض اخوي علينا عشان ما يكلمنا !!
اكيد ساحرته ولا مسوية له شيءساكت لها !!
اتركي الخلق للخاااااااااااالق اهتمي في بيتك وعيالك وخليهم يعيشون حياتهم براحتهم مدام اخوك راضي ومبسوط معها
ووش عليك انتي والله يا اخواتي لو كلنا نتخيل انفسنا مكان زوجة الاخ او اخت الزوج او ام الزوج ما كنا كتبنا اي شيء يجرحهم وما كنا قللنا من قدرهم بالشكوى في المنتديات
ثالث همسه
للعضوات الكريمات
ابدأ كلامي لهم بكلام افضل المرسلين عليه الصلاة والسلام
(قل خيرا او اصمت )
ترى الكلام ببلاش ادري بس تذكري !! هل يكب الناس على وجوههم في النار الا حصاد السنتهم !!
اذا كان عندك كلمه فيها مصلحه او خير لصاحبة الموضوع ادلي بدلوك وان شا ءالله تكون في ميزان حسناتك واتمنى اتمنى اتمنى والله يا بنات قبل لا تردين تحطين نفسك مكان كاتبة الموضوع والله اني متاكده راح يكون ردك غير الي ناويه تكتبينه
رابع همسه
موجهه للبنات الي تمدح في زوجها او اطفالها او اهلها !!
انا ما اقول لاتذكرين الخير منهم اذكريه بس بحدود تلميح بدون تصريح
وخلي في بالك دائما ان المنتدى يقراه الكثييير من فئات المجتمع المختلفه
مو بس المتزوجات المرتاحات مع ازواجهم يقرأون واللبيب بالاشاره يفهم !!
واخيرا
كل الكلام الي كتبته والله ليس له قصد الا النصيحه ومن باب احب لاخيك ما تحب لنفسك يكفينا يا بنات اوزار نا وذنوبنا لسا بنحمل ذنوب غيرنا والله لو تفكرنا في الدنيا ما تسوي جناح بعوضه
واتمنى اني ما اكون زعلت احد ..ان اصبت فمن فضل ربي ربي وان اخطأت فمن نفسي والشيطان
واختم كلامي بحديث لرسول صلى الله عليه وسلم
قال أنس بن مالك رضي الله عنه:
كنا في المسجد عند رسول الله فقال النبي عليه الصلاة والسلام: ((يدخل عليكم من هذا الباب رجل من أهل الجنة))، قال: فدخل رجل من الأنصار، تنطف لحيته من وضوئه، قد علق نعليه بيده، فسلم على النبي وجلس، قال: ولما كان اليوم الثاني قال: ((يدخل من هذا الباب عليكم رجل من أهل الجنة))، قال: فدخل ذلك الرجل الذي دخل بالأمس، تنطف لحيته من وضوئه، مُعلقاً نعليه في يده فجلس، ثم في اليوم الثالث، قال عبد الله بن عمرو بن العاص: فقلت في نفسي: والله لأختبرن عمل ذلك الإنسان، فعسى أن أوفّق لعمل مثل عمله، فأنال هذا الفضل العظيم أن النبي أخبرنا أنه من أهل الجنة في أيامٍ ثلاثة، فأتى إليه عبد الله بن عمرو فقال: يا عم، إني لاحيت أبي – أي خاصمت أبي – فأردت أن أبيت ثلاث ليال عندك، آليت على نفسي أن لا أبيت عنده، فإن أذنت لي أن أبيت عندك تلك الليالي فافعل، قال: لا بأس، قال عبد الله: فبت عنده ثلاث ليال، والله ما رأيت كثير صلاةٍ ولا قراءة، ولكنه إذا انقلب على فراشه من جنب إلى جنب ذكر الله، فإذا أذن الصبح قام فصلى، فلما مضت الأيام الثلاثة قلت: يا عم، والله ما بيني وبين أبي من خصومة، ولكن رسول الله ذكرك في أيامٍ ثلاثة أنك من أهل الجنة، فما رأيت مزيد عمل!! قال: هو يا ابن أخي ما رأيت، قال: فلما انصرفت دعاني فقال: غير أني أبيت ليس في قلبي غش على مسلم ولا أحسد أحداً من المسلمين على خير ساقه الله إليه، قال له عبد الله بن عمرو: تلك التي بلغت بك ما بلغت، وتلك التي نعجز عنها
والله ان احيانا اكرهه اكتب موضوع بسبب الي ترد او تكذيبي:icon33:
يعني بفتح موضوع واتعنا وبالاخير بدل شكرا او بدل كلمه تبرد الخاطر
الااا رد يرفع ضغطك مليووووووووووووووووون:icon33:
والله شي يقهر بصراحه
وفعلا
قل خيراااا او اصمت
يعني محد جابرك تردين على الموضوع برد بايخ كذا:icon33:
ويعطيك الف عافيه على المووضوع ياعسل