لحن الوداع 00000000000000
الله يهون عليك ويحقق لك كل امانيك
انا ملقوفه تدخلت بدون اذن صاحبة الموضوع بس انا استفدت اشياء كثيره من اللي كتبتيه
الله يوفقكم اجمعين
ام فارس
•
ربي يهون عليك و يتمم نقلك..... و نقلي ...............
شكرااا ما شاء الله عليك
لحن الوداع انا استفدت بعد .جزاك الله خير.
شكرااا ما شاء الله عليك
لحن الوداع انا استفدت بعد .جزاك الله خير.
الصفحة الأخيرة
و كما ما أقدر لأحدد نوع الأساس ،،،
و دائما بأقول لك لا تاخذين إلا شي جربتيه و اقتنعتي فيه لأن اللي ناسبني ممكن ما يناسب أختك ،،
بالنسبة للألوان ،، أختك قمحية ،، أعتقد معناها عادية لا سمرا و لا بيضا ،، و بالتالي ممكن تحط جميع ألوان المكياج
نبدأ بالمكياج:
* الأساس و الكونسلير ما أقدر أحدد لأني ما أعرف نوع بشرتها.
* كريم الإضاءة و هو الكريم اللي يعطي لمعة قويةمثل لمعة الزيت لكن طبعا بشكل راقي ، و الأفضل يوضع قبل كريم الأساس ، الأفضل و بلا منازع هو سكين skin lights من ماركة ريفلون و طبعا خذي أفتح درجة اللي هي ( natural light 01 ) ، و طبعا هي درجة لونها طبيعي و مناسب للجميع و لا تاخذين أي كريم إضاءة غيره مهما مدحوه لأن هذا أفضل لون و هو الوحيد اللي يعكي نتيجة و سعره 55 ريال و موجود في مي وفي السواني .
* بودرة حرة أو منثورة بلمعة تنفع للوجه و الجسم خذي من شركة كازانوفا و خذي أفتح درجة رقم ( 1 ) و هي موجودة بمحلات محمود سعيد و هي رائعة و كثير بالمنتدى يستخدمونها و سعرها بس 20 ريال ، و ممكن أيضا تحطينها تحت العيون و انتي ترسمين الظل عشان لو تبعثر ظل تحت العين ما يلصق على الوجه و إذا خلصتي تنفضينها بالفرشة و بتلاحظين إنها راحت لكن تركت لمعة حلوة تحت العين.
* كحل القلم ، بأعطيك الأنواع اللي سوادها شديد و ما تسيح عندك كحل ديانا أوف لندن خذي اللي لونه فضى و غطاه شفاف ، و سعره 15 ريال و تلاقينه في المحلات العادية ،، الثاني هو كحل لورد آند بيري و هذي ماركة موجودة في محلات نكتار خذي منها الكحل اللي درجته (إن ذا بلاك 701 ) و سعره 35 ريال.
* الكحل السائل فيه عندك من ماركة لانكوم و سعره حوالي 80 ريال ( أقصد اللي ريشته نحيفة مثل الشعره ) و هذا استخدامه صعب جداً للمبتدئين في المكياج ، و فيه كحل سائل ثاني يعطي سواد أكثر بكثير لكن مشكلته يحرق العين لو دخل فيها و هو كحل كازانوفا من محمود سعيد سعره 15 ريال و يوجد في محلات محمود سعيد و محلات مي.
* أما الآي لاينر و هو كحل سائل لكن بدال الريشة له راس مدبب طويل فهو أسهل للمبتدئين لأن العصا أقصر و رأس الكحل أعرض و أطول بتلاقين اللون الأسود في ماركة ميك أب فور إيفر و توجد في وجوه و في السواني ، و أيضا بتلاقين من ماركة بودي شوب في محلات بودي شوب الموجودة في المملكة و الفيصلية و صحارى و في أغلب المراكز التجارية ، لكن ترى لون الآي لاينر مو أسود حيل يعني تحسينه باهت ، عشان تزيدين سواده ممكن ترسمين عيونك أول بكحل القلم ديانا أوف لندن بعدين ترسمين فوقه بالآي لاينر.
* أيضا فيه كحل كريمي يجي في علبه مدورة و يستخدم بواسطة ريشة خاصة تشترينها لوحدها و تبللينها بالمويه ، وموجود في ماركة ماك و ماركة كريولان ، لكن استخدامه صعب و يحتاج وقت ، و الأهم من هذا لو حبت تعدل الكحل و هي في مناسبة او حفلة لازم يكون معاها الكحل و الريشة و الموية تخيلي!!!!! يعني ما أنصحك فيه.
* الإضاءة تحت الحاجب فيه لون لؤلؤي حلو جداً من بورجوا الدرجة ( Neige Doree 15 ) ، يجي بعلبه لونها من برى سكري و سعره 40 ريال و موجود بالسواني و وجوه.
* أيضاً فيه إضاءه لتحت الحاجب لؤلؤية من ماركة كريولان الصراحه ما أعرف رقم الدرجة لكن اسم المنتج ( ساتين باودر ) و يجي بشكل علبة رصاصية فاتحة مدور و الغطا فيه دائرة شفافة و هي بوردة منثورة ، و الأفضل تبللين الفرشة بمويه ، طبعا فيه منها كل الدرجات إنتي اطلبي اللون اللؤلؤي ، و طبعا ماركة كريولان لها محل واحد بالرياض و هو محل بالدور الأرضي بمركز حياة المرأة اللي بجنب مركز النمر الثاني بالعليا ( كلهم على شارع موسى بن نصير بالتحديد الجزء الواقع بين شارع العليا العام و شارع الملك فهد ). على فكرة مركز حياة المرأة مركز نسائي يعني ممكن تجرب بنفسها ، و فيه بعد محلات ملابس تجيب أشياء غريبة نوعا ما ،، لكن انتبهي لا تشترين اللبس اللي يعجبك على طول دوري على كل محلات المركز لأن بعض محلاتهم تجيب نفس القطع و السعر يختلف ،و الغريب عندهم اللبس العادي مو لبس السهرة لأن لبس السهرة عندهم قديم و غالي حيل ، و أدخلي بعد محل سيدة الفخامة للعبايات بالدور الأرضي ممكن تلاقين عندهم أفكار للطرح ، لكن إذا تبين طرح فيها حركات أحلى روحي لمحل الوشاح اللي بشارع التحلية و هو بالضبط يجيك إذا إنتي ماشية على طريق الملك فهد من الشمال للجنوب و جات إشارة التحلية لفي يمين و خذي الخدمة و على طول التفتي يمين و اقري أسماء المحلات بتلاقينه قريب من اللفة.
* الظل الأسود و هو مهم جداً لعمل المكياج الدخاني و فيه ظل أسود من ماركة
ماك اسمه كاربون ، و سعره حوالي 60 ريال و محل ماك بمركز المملكة الدور الثاني ، و أيضا عندك درجة أسود رائعة من ماركة نوبا رقمها 45 و تجي بشكل ظل مضغوط بالعلبة ( فيه نوع ثاني يكون الظل على شكل قبة لا تاخذينه ) و موجوده نوبا في محلات مكياجي لها فروع بالمملكة و الفيصلية و صحارى.
* أحمر الخدود أو البلاشر راح تحتاج درجتين وردي فاتح و الثاني مشمشي و هذولا يعتمدون على لون بشرتها و لون الأساس و راح تلاقين الدرجات في ماركة نوبا اللي بمحل مكياجي و في بورجوا اللي بالسواني و وجوه ، و لو ما لقت عندهم ألوان فاتحه ممكن تدور في محل ماركة ماك اللي بمركز المملكة.
* نجي للظل هالموسم دارج اللون التركواز المعدني أو التركواز المطفي و ينثرون فوقه قلتر ( حبيبات لمعة ) تركواز و بتلاقين كل هالثلاثة في ماركة ميك أب فورإيفر و توجد في وجوه و في السواني و ما أعرف الأسعار بالضبط.
* و فيه آي لانر من ماركة ميك أب فور إيفر أيضا لونه تركواز بلمعة معدنية رائع رائع جدا خاصة إذا كحلتي العين من فوق بالأسود و من تحت بهذا التركواز و سعره 58 ريال ، هو رائع لكن جربيه بالمحل و حددي إذا هي راح تستفيد منه و تستخدمه كثير و إلا لا ،، عشان ما تضيعين فلوسها بدون لازمة.
* و أيضا دارج هالسنة الظل البنفسجي الفاتح و فوقه ظل وردي و كلهم مطفيين بدون لمعة مثل إليسا فس آخر فديو كليب ( حبك وجع) و تلاقين اللونين في ماركة ميك أب فور إيفر وهي تشبه الألوان بهالصورة بس مكياج إليسا أحلى و الألوان أوضح
* أيضا دارج هالسنة الظل الأخضر الفاتح جدا بشرط يكون اللون يلمع لمعة معدنية و يعطي تدرجات مع النور يعني تقريبا لون فستقي بلمعة ذهبية ، و أعتقد تلاقين هاللون في ماركة ماك .
* و طبعا لازم يكون عندها ظل بلون مشمشي و هذا أيضا تلاقينه في ماركةميك أب فور إيفر لكن ما أقدر أعطيك درجة معينة لأنه يعتمد على لون بشرتها ،، يعني البيضا تاخذ مشمشي فاتح عشان ما يطلع عليها بني أو برتقالي و السمرا ممكن تاخذ لون غامق و راح يناسبها.
* طبعا بتستغربين ليش أغلب الظل قلت لك من ماركة ميك أب فور إيفر ؟ الجواب لأني جربته و هو رائع ما يتكتل و لا يتوسخ في العلبة و أيضا ممكن تحطينة مباشرة بالفرشة ، أو تبللين الفرشة و بعدين تحطين فيها الظل و بالتالي يكون اللون أوضح و أثبت ، أيضا ممكن تدمجينه بسهولة على الجفن مع أي ظل ثاني حطيتيه قبله على جفنك ، و ممكن تستعملينه أيضاً كأحمر خدود باستخدام الفرشة الخاصة بأحمر الخدود .
* بالنسبة للظل البني الغامق أتذكر إن مشرفتنا الأسطورة شوكولاته قالت إن فيه لون ظل بني محروق من كرستيان ديور لكن ما أعرف رقمه ممكن تسألينها ، لكن لو تبغين رايي أختك صغنونة و الأفضل لها الألوان الطفولية أو الألوان الصارخة أما الألوان الكلاسيكية مثل البني ممكن تبينها مثل اللي لابسة ملابس أكبر من عمرها.
* ممكن أيضا تاخذ إختك ظل فوشي لو تحب و موجود في ماركة ميك أب فور إيفر.
* بالنسبة للظل باللون الأزرق ، عندك أولا اللون السماوي اللي بلمعة معدنية لكن أشوفهم راحو عنه من فترة و أيضا ما يناسب كل الناس لأنه ممكن يسمرهم جداً ، اما اللون الكحلي الغامق أو اللون الأزرق الغامق فهم دارجين في المكياج الدخاني لكن صعب تضبطين هاللون لو كنتي مبتدئة ، و أعتقد صعبة تلاقين هاللونين و هذي صورة لمكياج أزرق مدموج مع أصفر ذهبي هادي و المكياج للخبيرة اللبنانية جوزيت قصارجيان:
×××××
مخالفه للقوانين
* فيه ناس كثير ممكن يقولون لك اشتري لها العلبة اللي يجي فيها 30 لون ظل و توجد في محل مي اللي بطريق الامير عبدالله و اسمها LORANCE لورانس ، و سعرها يمكن أقل من 100 ريال ، أقولك ممكن تشترين هالعلبة بالأول و تشترين معها فقط الظل الأسود من ماك أو نوبا و تبدأ تتدرب على وضع الظل لكن لازم تحط كميات كبير ة على الريشة و تكون الريشة مبللة بالموية ، و بعد كذا بتعرف الألوان اللي ناسبتها من هالعلبة و اللي تكون واضحة و ثابته على العين ، بالتالي تشتري من الماركات الثانية فقط الألوان اللي مو متوفرة بهالعلبة مع أني أخاف تكون مصنوعة من مواد ضارة.
* و طبعا ما يحتاج أقول لك إن الظل ما تبان حلاوته إلا إذا كانت مشقرة حواجبها يعني تكون الحواجب مرسومة صح و المنطقة اللي تحتها نظيفة ، لكن عشان أبري ذمتي أقول لك ترى المشايخ اختلفو على حكم التشقير و اعتبره البعض تحايل على الله علاوة على ضرر الكيماويات المستخدمة في التشقير ( و لا تلقوا بأنفسكم إلى التهلكة ) و الله أعلم.
* أثناء التدريب على وضع الظل لو حسيتي أن لون الظل غامق ممكن تبللين الفرشة و تحطينها في الظل بعدين تحطين على يدك شوية أساس أو كونسيلر و تدمجين الفرشة في الأساس من جميع جهاتها بيطلع لون حلو و هادئ و ثابت.
* بالنسبة للأرواج بما إنها صغيرة بيناسبها القلوس أكثر و القلوس متوفر من كل الماركات عندك بورجوا في السواني و مي و وجوه ، و عندك ريفلون في السواني ، و عندك بودي شوب ، و ماك في المملكة ، نوبا في مكياجي ، و في كاراجا و هذي الماركة موجودة في محل مي بشارع الأمير عبدالله و محل مي اللي في صحارى بس تراهم محلين منفصلين أصحابهم مختلفين و تختلف البضاعة ، طبعا بتحتاج القلوس الشفاف ، و الوردي الفاتح ، و الفوشي ، و المشمشي ، طبعا ما أقدر أعطيك درجات لأنه يعتمد على لون بشرتها و لون شفايفها بعد ، و ما ودي أمدح لك شي و يطلع مو مناسب لها ، و الحلو في القلوسات إنها ممكن تنحط مع المكياج الثقيل و الخفيف أو حتى بدون مكياج ، و بعد القلوسات هالفترة صارت لها ريحة و نكهة من الفواكة يعني تتحمسين إنك تستعملينها ، و لو حست إن القلوسات تخلي وجهها باهت ممكن تاخذ أرواج ألوانها قريبة من القلوسات تحط الروج و تضغط عليه منديل بعدين تحط عليه قلوس و الأرواج ممكن تاخذينها من كاراجا في مي و من نيفيا في مي و من ريميل في السواني.
* نصيحة أكيد بتشوفين الأرواج اللي يقولون إنها ثابته و لا تزول بعد الأكل و تستمر 10 ساعات ، احذري منها لأنها تسبب جفاف الشفايف و تشققها ، بينما القلوسات ترطب الشفايف و تنعمها زيادة.
* المحددات خذي ألوان طبيعية يعني وردي فاتح و بيج على بني و اختاري نوع يكون ناعم عند الرسم و ما يعور الشفايف و تلاقينها في مي اسم الأقلام look و يحطونها بعلبة و انتي تجربين يعني مو ماركة.
* الماسكار طالما رموش أختك كثيفة ماشاء الله تبارك الله ، فالمسكرة اللي راح أقول لك عليها بتناسبها أكيد و مع شطارتها في وضع المسكرة بتلاقيها تكثف و تطول و تقوس و تفرق بعد يعني الشطارة في وضع المسكرة تغنيك عن شراء الأنواع الغالية و المسكرا من ماركة ماكس فاكتور و اسمها CALORIE Dramatic Look 2000
و توجد هالماركة في السواني و في عطورات المتنبي و اعتقد في مي و سعرها بس 30 ريال ، و غير كذا لو تظل عندك لمدة سنة ما تنشف و لا تخرب ، بينما الأنواع الغالية 4 شهور بالكثير و تخرب.
* نجي الحين لفرش المكياج طبعا هي ضرورية جداً لمزج الظلال و وضع البودرة طبعا صعبة أوصفها لك ، لكن ممكن تروحين لماركة ماك و فرشهم غالية أو تروحين لماركة ميك أب فور إيفرأسعارهم متوسطة سعر الفرشة من 40 ريال إلى 100 ريال بالسواني خاصة اللي بصحارى لأن البياع ممكن يشرح لك استخدام كل فرشة و اهم الفرش: فرشة رسم الكحل الكريمي و الحلو فيها إن لها غطا ، فرشة الظل اللي نهايتها خط مائل ( هذي ممكن تاخذينها من بودي شوب رخيصة و رائعة عندهم ) ، فرشة الظل اللي نهايتها على شكل قوس وهالثنتين من الشعر ( هذي ممكن تاخذينها من بودي شوب رخيصة و حلوة عندهم )، و أيضا فرشة الظل اللي عبارة عن اسفنجه مثلثة ، و فرشةعريضة و كبيرة لوضع أحمر الخدود عندهم ثنتين وحدة كبيرة مرة و منبسطة و لها مقبط منبسط مو عصا يعني هي مو مدورة مثل العمود و الثانية أصغر منها و مدورة و عصاها عمود الثانية تستخدم للبودرة المنثورة و للبلاشر بينما الأولى فقط للبلاشر، و فرشة من الشعرشكلها مثل مروحة الورق و هذي مو مهمة لأن فايدتها محصورة في نفض البودرة اللي حطيتيها تحت العين عشان تلقط الظل المتناثر ، و فرشة رسم الروج.
* و طبعا لازم تاخذين مزيل لمكياج العين يكون قوي على المكياج يعني يزيله من مسحه و لطيف على العين ما يجففها و لا يحرقها و أفضل شي مزيل المكياج من ماركة كلارنس و خذي اللي لون مويته سماوي مو أزرق غامق يعني اللي يشيل المكياج المضاد للماء و ما يسوي حساسية و اسمه
Instant Eye Make Up Remover
Heavy Make Up Sensitive eyes
سعره 110 ريال و تلاقينه في مي و في السواني و وجوه و لازم ترجينه كويس قبل الاستعمال
* عزيزتي صدق بتتعبين من قراية كلامي الكثير ،،، لكن هذا كله من حرصي عليك عشان ما يضيع وقتك تحوسين و تدورين ،،و لا تضيع فلوس أختك ،،، أو تبتلش و ما تدري شتسوي بالمكياج ،،، و أي شي ما تقتنعين فيه لا تاخذينه لأن اللي يناسب غيرك ممكن ما يناسبك ،، و الله يوفقك و يسعد اختك
حبيبتي لي عندك طلب ،،و أتمنى ما ترديني ،، أبيك تدعين لي ربي يهون علي و يتمم نقلي ،،،،